گاڤ

پارتییێن سیاسی و فراکسیۆنێن پەرلەمانێ تورکیا، بۆ کۆمسیۆنێ ناڤێ پەرلەمانتارێن خۆ ئاراستەیی سەرۆکاتییا پەرلەمانی کر، 48 ئەندام هاتینە هەلبژارتن و 19% ژ وان ژنن.

ل حەفتییا بۆری کۆمسیۆنەکا 51 کەسی ژ ئالییێ سەرۆکێ پەرلەمانێ تورکیا ڤە بۆ پرسا ئاشتییێ ل تورکیا و باکورێ کوردستانێ هاتە پێکئینان.

ئەڤرۆ، پێنجشەمبییێ، 31-7-2025، پارتییێن سیاسی و فراکسیۆنێن پەرلەمانێ تورکیا، ناڤێ پەرلەمانتارێن خۆ ئاراستەیی سەرۆکاتییا پەرلەمانی کرن.

ژ سەرجەمێ وان 48 کەسان، نەهـ ژ وان ژنن کو دبیتە 19% ژ سەرجەمێ هەمی ئەندامان.

ژ سەرجەمێ 21 ئەندامێن پارتییا داد و گه‌شه‌پێدان (ئاکپارتی) حەفت ژوان پەرلەمانتارێن دەڤەرێن باکورێ کوردستانێ نە و بتنێ چار ژ وان ژنن، هەروەسان ژ 10 ئەندامێن پارتییا کۆماری یا گەل (جەهەپە) بتنێ ئێک ژوان ژ باکورێ کوردستانێ یە کو ئەوژی سەزگین تانریکولو، پەرلەمانتارێ بازنەیا دیاربەکرێ یە.

ژ سەرجەمێ ئەندامێن جەهەپەیێ بتنێ چار ژ وان ژنن و ئێک ژوان تورکان ئەلچیی، هەڤژینا پارێزەر و سیاسییێ ناڤدار یێ کورد تاهر ئەلچییە، کو ل 28ێ چریا دویێ یا سالا 2015ێ، د کۆنگرەیەکێ رۆژنامەڤانی دا ل دیاربەکر، دەما داخوازا ئاشتی و بێدەنگکرنا چەکی دکر هاتە تیرۆرکرن.

پارتییا یەکسانی و دیمۆکراسییا گەلان (دەم پارتی) چار ئەندام هەنە، دو ژ وان ژنن کو ئەوژی مەرال دانش بەشتاش و گولستان کلچ ـە.

هەروەسان پارتییا نەتەوەپەرست یا تورکیا (مەهەپە) ب هەمان شێوە چار ئەندام هەنە، لێ چو ژن بۆ ئەندامبوونا کۆمسیۆنێ دیارنەکرینە.

ژ ئالییەکێ دی ڤە، ئیی پارتییێ بڕیار دا یە پشکدارییێ د کۆمسیۆنێ دا نەکەت و هەتا نوکە دیار نینە ئەرێ ب ڤان 48 ئەندامان دێ کۆمسیۆن کارێ خۆ کەت یان جهێ ئیی پارتییێ ب فراکسیۆن و پارتییان هێتە پرکرن، ل دۆر ڤێ چەندێ ژی عەبدوللا گولەر، سەرۆکێ فراکسیۆنا ئاکپارتی راگەهاند؛ کۆمسیۆن دێ بڕیارێ ل دۆر ڤێ چەندێ دەت.

ئەڤە د دەمەکی دا یە، ل 25-7-2025، نوعمان كورتۆلمۆش، سه‌رۆكێ په‌رله‌مانێ توركیا، بڕیار ل سه‌ر پێكئینانا كۆمسیۆنەکا 51 دا و داخواز ژ پارتییان و فراکسیۆنان کر هەتا دویماهییا ڤێ مەهێ ناڤێ ئەندامێن خۆ دیاربکەن.

ل گۆرەیی نڤیسارێ، ئاكپارتى 21 ئه‌ندام، جه‌هه‌پێ 10 ئه‌ندام، ده‌م پارتى چار ئه‌ندام و مه‌هه‌پێ چار ئه‌ندام، ئیی پارتی سێ ئەندام، فراکسیۆنا رێیا نوی کو ژ پارتییا پاشەرۆژ، سەعادەت و دەڤا پێکدهێت سێ ئەندام هەنە.

هەروەسان ئەو پارتییێن ژ ئەگەرێ کێمییا هژمارا پەرلەمانتار فراکسیۆن نینە، دێ هەر ئێک ژ وان ئەندامەک هەبیت، ژوان ژی پارتییا هوداپار، پارتییا سەرژنوی رەفا، پارتییا کەدێ، پارتییا کرێکارێن تورکیا، پارتییا چەپ یا دیمۆکراتیک و پارتییا دیمۆکراتیک، ب ڤی رەنگی ژی دبنە 51 ئەندام.