گاڤ

دۆنالد ترەمپ، سەرۆکێ ئەمریکا د بەرسڤا جێگرێ سەرۆکێ جڤاتا ئاسایشا رووسیا، دو ژێرئاڤێن ئەتۆمی ل نێزیکی رووسیا جهگر دکەت.

ئەڤرۆ، ئەینییێ، 1-8-2025، دۆنالد ترەمپ، سەرۆکێ ئەمریکا راگەهاند؛ ژبەر گۆتنێن بێ-رێز یێن دیمیتری مێدڤێدێڤ، جێگرێ سەرۆکێ جڤاتا ئاسایشا رووسیا و سەرۆکێ پێشتر یێ وی وەلاتی، من فەرمانکرییە دو ژێرئاڤێن هەلگرێن ئەتۆمی ل دەڤەرەکا گونجایی و نێزیکی وی وەلاتی بهێنە جهگر کرن.

دیارکر ژی؛ گەلەک جاران داخۆیانی دەرئەنجامێن خراب د دویڤخۆدا دئینن، هیڤیدارم گۆتنێن مێدڤێدێڤی چ خرابییان د دویڤخۆدا نەئینن.

ترەمپی گۆت ژی: ژ دەستپێکا شەڕێ رووسیا و ئۆکراینا پتری 112 هزار سەرباز هاتینە کوشتن و بتنێ ڤێ مەهێ نێزیکی 20 هزار سەربازێن رووسی د شەڕەکێ بێ-رامان دا هاتینە کوشتن و ژبلی وان سەربازێن هەتا نوکە چارەنڤیسێ وان یێ نەدیارە.

ئەڤە د دەمەکی دا یە، دۆنالد ترەمپ، سەرۆکێ ئەمریکا 28-7-2025، راگەهاندبوو؛ 10 بۆ 12 رۆژان مۆهلەت بۆ پۆتینی ئەو شەڕی ب راوەستینیت و ل گەل ئۆکراینا رێکبکەڤیت.

هەروەسان، دیمیتری مێدڤێدێڤ، جێگرێ سەرۆکێ جڤاتا ئاسایشا رووسیا 31-7-2025، د بەرسڤا ترەمپی دا راگەهاند؛ ترەمپ یارییێ ل گەل رووسیا دکەت، پێدڤییە بزانیت رووسیا نە ئسرائیل و ئیرانە ڤان یارییان بکەت.

هەورەسان ترەمپی هەمان رۆژ د بەرسڤا گۆتنێن مێدڤێدێڤی دا راگەهاند؛ بێژنە مێدڤێدێڤی، سەرۆکێ شکەستنخواری یێ پێشتر یێ رووسیا بلا ب هوشیاری بئاخڤیت.