گاڤ

کۆمسیۆنا هەلبژارتنان یا ئیراقێ راگەهاند؛ شەش هەڤپەیمانی ژ پشکداریکرنا هەلبژارتنێن جڤاتا نوینەرێن ئیراقێ هاتنە دورخستن.

پێنجشەمبییێ 7ێ تەباخا 2025ێ، جومانە گلایی، پەیڤدارا کۆمسیۆنا بلند یا سەربخۆ یا هەلبژارتنێن ئیراقێ راگەهاند؛ دێ دویڤچوون بۆ هەڤپەیمانییێن کۆمسیۆنێ هێتەکرن، ئەگەر پارتییەکێ خۆ ژ هەڤپەیمانییەکێ ڤەکێشا و بتنێ پارتییەک ژ هەڤپەیمانییێ ما، ل وی دەمی پێدڤییە پەنایێ ببەتە بەر پێکئینانا هەڤپەیمانییەکا دی یان ژی ئیئتیلافێ ل گەل پارتییەکا دی بکەت.

جومانە گلایی دازانین ژی؛ چو هەڤپەیمانی ب پارتییەکێ بتنێ ناهێتە پێکئینان و پێدڤییاتی و رەگەزێ هەڤپەیمانییێ تێدا دیار نابیت، لەوما شەش هەڤپەیمانی هاتنە هەلوەشاندن و نەهاتنە پەسەندکرن.

ئەڤە د دەمەکی دا یە، 5ێ تەباخێ، جومانە گلایی، پەیڤدارا کۆمسیۆنا بلند یا سەربخۆ یا هەلبژارتنێن ئیراقێ راگەهاندبوو؛ 31 هەڤپەیمانی، 38 پارتییێن سیاسی و 79 کاندیدێن سەربخۆ، بۆ پشکداریکرنێ د هەلبژارتنێن جڤاتا نوینەرێن ئیراقێ دا تۆمارکرییە.

هەروەسان، بڕیارە ل 7ێ تەباخێ دێ تیروپشكا ژمارەیا هەڤپەیمانی، پارتی و کاندیدان ھێتەکرن.

ل 9-4-2025، نڤیسینگەها محەمەد شیاع سوودانی، سەرۆکوەزیرێ ئیراقێ راگەهاند؛ ب پترییا دەنگان، جڤاتا وەزیران 11-11-2025، وەک رۆژا هەلبژارتنێن جڤاتا نوینەرێن ئیراقێ بۆ خۆلا شەشێ دەستنیشان کر.