سه‌رۆكێ حكومه‌تا هه‌رێمێ و سه‌رۆكێ ئیماراتێ په‌یوه‌ندیه‌كا تله‌فۆنى ئه‌نجام دا.
بەلاڤ بکە
گاڤ
ئێڤارا ئه‌ڤرۆ سه‌رۆكێ حكومه‌تا هه‌رێما كوردستانێ مه‌سروور بارزانى په‌یوه‌ندیه‌كا ته‌له‌فۆنى دگه‌ل سه‌رۆكێ میرنشینا عه‌ره‌بى یا ئێكگرتى (ئیمارات) ێ شێخ محەمەد بن زاید ئالنەهیان ئه‌نجامدا، باس ل هنارتنا به‌رهه‌مێن هه‌رێمێ بۆ ئیماراتێ كرن.
ل گۆره‌ى راگه‌هاندنه‌كا حكومه‌تا هه‌رێمێ، د په‌یوه‌ندیه‌كا ته‌له‌فۆنى دا، بارزانى و ئالنه‌هیان باس ل پێشڤه‌برنا په‌یوه‌ندیێن دو ئالى ب تایبه‌تى پێشڤه‌برنا بازرگانیێ و وه‌به‌رهێنانێ كرینه.
هه‌روه‌سا سه‌رۆكێ حكومه‌تا هه‌رێمێ سپاسیا سه‌رۆكێ ئیماراتێ كر ل دۆر پشته‌ڤانی و هاریكارى و هه‌ماهه‌نگیا بهێز یا به‌رپرسێن ئیماراتێ بۆ سه‌رخستنا پرۆسه‌یا هنارتنا به‌رهه‌مێ چاندنێ یێ هه‌رێمێ ب تایبه‌تى هناران بۆ ئیماراتێ و ژ وێرێ ژى بۆ وه‌لاتێن كه‌نداڤى.
هه‌روه‌سا مه‌سروور بارزانى رژدى ل وێ ئیكێ كر كو هه‌رێما كوردستانێ دشێت ب هاریكاریا وه‌لاتێن ده‌ڤه‌رێ، رۆله‌كێ گرنگ د داینكرنا ئاسایشا خوراكى دا بگێڕیت، دیاركر ژى هنارتنا هناران ده‌ستپێكه بۆ هنارتنا هنده‌ك به‌رهه‌مێن دى وه‌كو سیڤ، ترى و هنگڤینى.
