سەرکەفت ڕەشید

دناڤ جەرگێ دهۆک دا و ب تایبەتی دناڤ پارکا ئازادی دا، دو حەفتییێن بۆری دیدەڤانییێ ل سەر ژدایکبوونا تاقیکرنەکا نوی یا وەرزشەکا پری وێنە ددەن ئەوژی: قارەمانییا  Three 90ـــە ئەوا ژ ئالییێ پەیمانگەها ڤیا یانەحکومی ڤە بۆ تیمێن کولانێن دهۆکێ هاتییە رێکخستن.

دبیت بۆ گەلەک ژ مە وەک خرڤەبوونەکا تەپا پێی بۆ کولانان دەربکەڤیت، لێ د راستی دا پڕۆژەیەکێ کلتووری یێ جۆرە وەرزشەکا نوییە و بهایێ تەپا پێی دناڤ جڤاکی دا وەک ژێدەرەکێ ئیلهامبەخش و دیارکرنا شیانان ڤەدگەڕینیت.

ئەوا د ڤێ رویدانا وەرزشی دا سەرنجا مە راکێشایی خوانێن هزری و رێڤەبەرێن وێ ب خۆ بوون کو ب شێوەیەکێ پیشەییانە برێڤەدبەن.

مامۆستا عەلی سەعید، رێڤەبەرێ پەیمانگەها ڤیا و ستافێ وی رۆلەکێ گرنگ دگێرن ژ ئالییێ رێکخستن و برێڤەبرنا هەمی هویرکاتی و تێبینییێن قارەمانیێ ڤە، هەر ژ خشتەیی هەتا دادڤانیکرنێ و ئەڤە ژی وێ چەندێ دگەهینیت کو هەر جۆرە وەرزشەک ژ هەژی ناڤێ دهۆکێ یە، سەبارەت مامۆستا ‘وێران عەبدولعەزیز’ خودانێ پەیمانگەهێ، ئەوا پشتەڤانییا ڕاستەقینەیا وەرزشا گرێدایی ب جڤاکی ڤە بەردەست دکەت و هزرێن گەنجان ب باشی دخوینیت و پشتەڤانییێ لێ دکەت، ژ پێخەمەت خزمەتکرنا گەنجان و پرکرنا وێ ڤالاهییێ ئەوا بۆ حەزێن خۆ یێن وەرزشی دەردبرن و ب تایبەتی یاریا تەپا پێی.

قارەمانییا Three 90 نە بتنێ قارەمانییەکە کو یاریێن وێ ب فیرکەکێ دەست پێدکەن و ب دویماهی بهێن بەلکو ئەڤە پەیامەکە دبێژیت: تەپا پێی ژ کولانان دەستپێدکەت و دناڤ جاددە و گۆرەپانێن کولانان دا یاریزانێن مەزن و بناڤودەنگ و ستێر ژ دایک دبن و هەر ل وان کولانان روح و هەستا ئالیگرییێ دروست دبیت.

دهۆکێ پێدڤی ب ڤان دەستپێشخەرییان هەیە کو گەنجان خرڤەبکەت و ژینگەهەکا ساخلەم یا دویر ژ تێکدان و دەمارگیریێ پەیدا بکەت، ژ پێخەمەت دوپاتکرنا وێ چەندێ کو وەرزشا دهۆکێ فاکتەرەکێ باش و کارلێککەرە بۆ پێشخستنا جڤاکی بەری ببیتە هەڤرکییا ناسناڤی.

پشتی ڤێ چالاکیێ پێشبینی یا وێ چەندێ دکەین ئەڤ قارەمانییە ببیتە قارەمانییەکا سالانە و یا هەلکەڤتان، دیر نا بینین پشتەڤانییەکا زێدەتر ژ ئالییێ دەزگەهێن ناڤخشۆیی و ناڤدەولەتی بدەستخۆڤەبئینیت، ژ پێخەمەت وێ چەندێ ئەو شەمالکا پەیمانگەها ڤیا یا نەحکومی ب ستافێ خۆ ڤە ل پارکا ئازادی هەلکری، سال بۆ سالێ گەشتر و بریقەدارتر لێ بهێت.