خورشید ئەحمەد سوورچی

ل 13/3/2014ێ لدەمێ هێرشا داعش بۆ سەر ئیراقێ، ب فەتوایەکا جیهادی حەشدا شەعبی هاتە دامەزراندن، حەشد ژ کۆمەکا هێزێن شیعی یێن چەکدار پێکهاتییە کو بەری شەڕێ داعش هندەک ژ وان هێزان ب خۆ لگەل ئێک د ناکۆک بوون، لێ دەما داعش هاتی و شیعەیان هەست ب مەترسیەکا مەزن کری و داعش دیتی وەک پلانەک دژی هیلالا شیعی، ئێکسەر ب چاڤدێریا ڕاستەوخۆ یا (قاسم سولەیمانی) فەرماندێ فەیلەقا قودسا ئیرانی و (عەلی سیستانی) مەرجەعێ شیعەیێن ئیراقێ، ل 13ێ خزیرانا هەمان سال، بڕیار هاتە دان کو هەمی هێزێن شیعە ناڤێن خۆ تۆماربکەن دناڤ ڕێکخراوا حەشدا شەعبی دا، ب مەرەما هندێ شیعە ب ئێک ڕێزی و ئێک دەست رویبرویی مەزنترین دوژمنێ خۆ ببن. ڕۆژ ب ڕۆژ پێگەهێ حەشدێ بەرفرەهتر دبوو حەتا وەلێهاتی ل سالا (2015)ێ د بودجەیا ئیراقێ دا (60 ملیۆن دۆلار) بۆ هاتنە تەرخانکرن و ل سالا (2016)ێ وەک هێزەکا فەرمی هاتە ناساندن، هەروەسا د ناڤ دەزگەهێن فەرمی یێن دەولەتێ دا کار هاتە کرن بۆ سیستەمکرنا حەشدێ، لێ یا بێ مفا بوو، چونکی فەرماندە و ئەندامێن حەشدێ بتنێ ئاخفتنا (سیستانی) وەردگرن و ئەو ناچنە بن بارێ چ بڕیارەکا سیاسی و سەربازی و کارگێری یا دەزگەهێن فەرمی یێن دەولەتێ.

یاسایا حەشدا شەعبی چییە؟ مەرەم ژێ چییە؟

ل سالا (2016)ێ ل پەڕلەمانێ ئیراقێ دەنگ ب پڕۆژەیاسایا حەشدێ هاتە دان و وەک هێزەکا فەرمی یا ئیراقی هاتە دانان، نوکە هێزێن شیعی یێن داخواز دکەن ئەڤ یاسایا سالا (2016)ێ بهێتە هەموارکرن و هندەک یاسایێن نوی بهێنە بنەجهکرن و دەرئێخستن، کو ئەڤە هندەک ژوان داخوازیانە کو ئەو لایەن داخواز ژێ دکەن (یاسایا خانەنشینییێ بۆ ئەندامێن حەشدێ، تەرخانکرنا وەزارەتەکا تایبەت ب کاروبارێن حەشدێ، تەرخانکرنەکا بودجەیەکا دیارکری، هتد) ئەڤە هندەک ژوان داخوازینە، پێکهاتەیێن دی ژی یێن ئیراقێ یێن نە شیعە ددەنە دیارکرن کو ئەڤ پڕۆژەیاسایە دێ بیتە ئەگەر (دەولەتەک د ناڤ دەولەتا ئیراقێ دا) دروست ببیت کو ئەوژی دەولەتا حەشدێ یە. لەوڕا ترسا وان گەلەکە ژ پڕۆژەیاسایا حەشدێ، ئەو وەسا هزر دکەن مەرەم ژ وێ پڕۆژێ ئەوە حەشد ببیتە هێزەکا مەزنتر ژ وێ یا هەیی و بهێزتر ببیت، بێگۆمان ئەڤەژی دێ مەترسییا لسەر پێکهاتەیێن نەشیعی زێدەتر کەت.

هێزێن شیعی یێن بزاڤان دکەن ئەڤێ یاسایێ دەربازبکەن و حەشدێ بکەنە هێزەکا بهێزتر ژ وێ یا هەیی. کارڤەدان یێن پەیدابووین لسەر ئەڤێ یاسایێ، ئەمریکا هەر زی هاتە خەت و ڕاگەهاند ب هیچ ڕەنگەکی چێنابیت ئەڤ یاسایە دەرباز ببیت، هەروەسا پێکهاتەیێن نەشیعی یێن ئیراقێ ژی  د نەڕازینە لسەر ئەڤێ یاسایێ ب تایبەت پێکهاتێ سوونی، چونکی ئەو  دبێژن (حەشد یا هاتی بۆ حەلاندنا پێکهاتێن نەشیعی) . ڕەنگە ئەڤە پسیارا مە هەمیان بیت، هەکە ئەڤ یاسایە دەربازببیت ل پەڕلەمانی دێ چ چێبیت؟

ئەز پێشبینیا ڤان دو رویدان و گریمانان دکەم

ئێک/ دووبارە سەرهەلدانا داعش.

دو/ لێدانا ڕاستەوخۆ یا ئیسرائیل و ئەمریکا ل ئیراقێ ب تایبەت دەڤەرێن شیعی ئاکنجی.