ئەیمەن عیماد

بابەتێ خوارنا پیس یا خوارنگەهان هەر سال ئەڤ کێشەیە دوبارە دبیت و ژبەر خوارنا ژەهراوی یا ئێك ژ خوارنگەهان، خەستەخانە دێ تژی نەخۆش بن، ئەگەر گەلەکن ئەڤ کێشەیە ب ڤی قەبارەی هندە دوبارە دبیت بەلێ یا ژ هەمییان گرنگتر، سڤکییا رێنمایانە د سزادانێ دا، سزا بتنێ دائێخستنا خوارنگەهێ یە بۆ چەند رۆژەکان و سزادانەکا ماددی یە و ناڤێ خوارنگەهێ ژی یێ پاراستییە و پاشی دێ زڤریتە سەر کارێ خۆ یێ ئاسایی و هەر وەکی چ چێنەبووی.

د خوارنگەهان دا پاقژیێ تێچوویێن خۆ هەنە، ب پیساتییێ ئەو تێچوویە لسەر خودانی کێم دبن، دەمێ خوارنگەهەکا سەرپێچکار هوسا ب ساناهی بزڤریتەڤە وەکی بەرێ، ل ڤێرێ پا کا مافێ وان ئەوێن ژ دەستپێکێ هەتا دویماهییێ خەرجییێن مەزن ل پاقژییێ د مەزێخن؟

بۆ چارەسەرییەکا دادپەروەرانە، ژبلی توندکرنا سزایان کو ئەو یا گرنگە، مە پێدڤی ب دادڤانەکێ هەیە، باشترین دادڤان ب بۆچوونا من دروستکرنا پێگەهەکێ دیجیتالی یێ حکۆمی یە، د ڤی پێگەهێ دیجیتالی دا هەر خوارنگەهەکا خەلکی ڤییا ناڤێ وێ سێرچ بکەت ئێکسەر هەمی مێژوویا خوارنگەهێ تێدا بهێتە دیارکرن، چەند سەرپێچی کرینە، چەند جاران هاتییە سزادان، ئەگەرێن سزادانێ چ بوون، و ئەو خوارنگەهێن سزا لسەر ئایکۆنەکێ جودا ژ یێن پاقژ و بێ سەرپێچی ل بەرامبەری ناڤێ وان بیت.

ب ڤی رەنگی باوەرم هەر کەسەك دێ گەهیتە مافێ خۆ، هەر ئێك دێ مێژوویا سومعەتا جهێ خۆ وەکی وی دڤێت ب خۆ دروست کەت.