گاڤ

سه‌رۆكێ لژنه‌یا بلند یا دویڤچوونا بازاری بۆ گاڤ دا زانین؛ سوبه‌هى دێ دویڤچوونێ کەین، خوارنگه‌هێن پێگیرى ب رێنمایێن نوى یێن ساخله‌مییێ نه‌كرین دێ هێنه‌ سزادان.

شەمبییێ 30ێ تەباخا 2025ێ، ملله‌ت زكرى، سه‌رۆكێ لژنه‌یا بلند یا دویڤچوونا بازاری ل قائیمقامییا دهۆكێ تایبەت بۆ گاڤ راگەهاند؛ سوبەهی دێ هەوەکا بەرفرەھ ل دۆر دویڤچوونا بجهئینانا رێنماییێن نوی ل خوارنگەهێن باژێرێ دهۆکێ هێتەکرن.

هەمان ژێدەر بۆ گاڤ دیارکر ژی؛ هەر کەسێ پێگرییێ ب رێنماییان نەکەت دێ رێکارێن یاسایی ل دژی هێنە وەرگرتن و رێنما ژی ئەڤێن ل خوارێنە:

● نابیت مایونێز ل خوارنگەهان بهێتە چێکرن و بکارئینان.

● نابیت زەرزەواتێ بەلگدار وەک خەس، جەرجیر، کەلەمی و کەرەفس بهێتە پێشکێشکرن.

● بتنێ خیار، باجانسۆر، لەیمون و پیڤاز بهێنە پێشکێشکرن و پێدڤییە ب رەنگەکێ باش بهێنە شویشتن و ب رێکا پەرمەنگەناتی پۆتاسیوم، خوێ و خەلێ بهێنە 'تعقیم' کرن.

● ل دەمێ کارکرنێ پێدڤییە هەمی کرێکار جلوبەرگێن کاری وەک دەزگۆرک، کولاڤ و بەرملک بپۆشن و بەردەوام بکاربئینن.

● نابیت خوارنا کەڤن بهێتە هەلگرتن و دوبارە بهێتە پێشکێشکرن.

● پشتی شویشتنا ئامانان پێدڤییە بهێنە هشککرن

● هەروەسان پێدڤییە سرک 'خەل' ل سەر هەمی مێزەیێن خوارنێ بهێتە دانان.

ئەڤە د دەمەکی دا یە، دوشەمبییێ 25ێ تەباخێ، هەدار رەشید، پەیامنێرا گاڤ راگەهاندبوو؛ وەلاتییان ل خوارنگەهەکا بازارێ دهۆکێ خوارن خوارییە و تووشی زکچوون و دلرابوونێ بووینە.

هەروەسان دیارکربوو ژی؛ ل دەستپێکێ نێزیکی 45 کەسان نەخۆش ببوون لێ رێژە بلندبوو و گەهشتە پتری 200 کەسان.

پەیامنێرا گاڤ دابوو زانین ژی؛ هەتا نوکە سێ خوارنگەهـ ل دهۆکێ هاتینە دائێخستن.