گاڤ

ساخلەمییا دهۆکێ تایبەت بۆ گاڤ دا زانین؛ کەسێ ل حەفتییا بۆری ل تووشی تایا خوینبەربوونێ بوویی، نوکە ساخلەمییا وی جێگیرە و کارێن پێدڤی بۆ دهێنەکرن.

وەلاتییەکێ قەزا سێمێلێ کو د ژییێ 43 سالییێ دا یە و کارێ گۆشتفرۆشییێ دکەت تووشی تایا خوینبەربوونێ بوویە و ل ژێر چاڤدێرییا نۆشداران دایە.

شەمبییێ 30ێ تەباخا 2025ێ، ساخلەمییا پارێزگەها دهۆکێ تایبەت بۆ گاڤ راگەهاند؛ ل حەفتییا بۆری پشتی کو کەسەک ب گۆمانا تووشبوون ب تایا خوینبەربوونێ هاتییە تۆمارکرن، پشکنین بۆ هاتنەکرن و بۆ بەغدا هاتنە رەوانەکرن، ل رۆژا پێنجشەمبییێ هۆسا دیاربوو کو تووشی تایا خوینبەربوونێ بوویە.

دیارکر ژی؛ ب خۆشحالی ڤە نوکە ساخلەمییا وی جێگیرە و کارێن پێدڤی بۆ دهێنەکرن.

ل دۆر ئامارێن تووشبوون گۆمانلێکرییان ساخلەمییێ دا زانین ژی؛ ل سالا 2023ێ، هەشت گۆمانلێکری هاتبوونە تۆمارکرن، لێ شەش کەس هاتنە پشتراستکرن و چو ژ وان ژیانا خۆ ژدەست نەدا.

دیارکر ژی؛ ل سالا 2024ێ، حەفت گۆمانلێکری هاتبوونە تۆمارکرن، لێ پێنج کەس ژ وان تووشبوویی بوون و ئێک ژ وان ژیانا خۆ ژدەستدا.

ساخلەمییێ هەروەسان گۆت ژی: ل ئەڤ سالە هەتا نوکە شەش گۆمانلیکری هاتینە تۆمارکرن، لێ چار ژ وان تووشبوویی نە و دو ژ وان ژیانا خۆ ژدەستدایە.

تایا خوینبەربوونێ ژ ڤایرۆسەکێ بچویک دروست دبیت کو ئەو ڤایرۆسە دناڤا پیستێ ئاژەلان دا دژیت و گەشەیێ دکەت و بەهرا پتر تووشی وان کەسان دبیت یێن کارێ بخودانکرنا ئاژەلی دکەن.