گاڤ

جڤاتا وەزیرێن هەرێمێ کۆمبوون و بەحسی دانوستاندنێن ڤان دویماهییان یێن هەولێر و بەغدایێ ل دۆر پشکا فیدرال ژ داهاتێ نەپەترۆلی و هنارتنا پەترۆلا هەرێمێ هاتەکرن و دیارکر سوبەهی دێ شاند سەرەدانا بەغدایێ کەت.

چارشەمبییێ 3ێ تەباخا 2025، جڤاتا وەزیرێن هەرێما کوردستانێ ب سەرپەرشتییا سەرۆکوەزیر مەسروور بارزانی و بەرهەڤبوونا قوباد تالەبانی جێگرێ سەرۆکوەزیری کۆمبوو.

ل گۆرەیی بەیانا جڤاتا وەزیران، سەرۆکوەزیر مەسروور بارزانی بۆ یادا ژ دایکبوونا پێغەمبەر موحەمەد سلاڤ لێ بن، پیرۆزباهی ل بسورمانێن کوردستانێ زو جیهانێ کر و هیڤی خواست ببیتە جهێ خێر و خۆشی و ئاشتییێ بۆ هەمییان.

جڤاتا وەزیران گۆت ژی: سەرۆکوەزیر مەسروور بارزانى دلگرانییا خۆ ل دۆر رویدانێن ڤێ دویماهییێ یێن سلێمانییێ نیشاندا و سەرەخۆشی ل مالباتێن وان کەسان یێن گیانێ خۆ ژدەستدایی کر و هیڤییا زوی بسەخۆڤەهاتنێ بۆ برینداران خواست و دوپاتی ل وێ یەکێ کر کو پێدڤییە کێشە و ناکۆکی ب رێیا یاسایێ بهێنە چارەکرن.

جڤاتا وەزیران ئاشکراکر ژی؛ سەرۆکوەزیر مەسروور بارزانى، داخواز ژ قوباد تالەبانی کر رۆهنکرنەکێ ل دۆر رویدانێ بۆ جڤاتێ بدەت و جێگرێ سەرۆکوەزیری ب هویری بەحسی رویدانێ کر و ئاماژە ب وێ یەکێ کر و گۆت: پێشتر بزاڤ دهاتنەکرن بەرەلایی دروستببیت و پیلان هەبووینە د چار جارێن جودا-جودا دا سەرۆکێ ئێکەتی نیشتیمانی بهێـتە تیرۆرکرنـ لەوما ئەو کارێ هاتییە کرن نەهێلانا وان پیلانێن خراپکاری و چەسپاندنا یاسایێ بوو و نوکە ژی رێکارێن یاسایی بۆ ئێکلاکرنا بابەتی گرتینەبەر.

ل ئێڤارییا رۆژا پێنجشەمبییێ 21ێ تەباخێ، هێزەکا مەزن یا ئێکەتی نیشتیمانی کوردستان کو پێکهاتبوون ژ کۆماندۆ، ئاسایش و دژەتیرۆر بەرەڤ لالەزار برێکەفتن کو جهێ مانا لاهوور شێخ جەنگی، سەرۆکێ بەرەیێ گەلە و مالا وی هاتە دۆرپێچکرن و ل دەمژمێر 7:00 سپێدێ لاهوور هاتە دەستەسەرکرن.

جڤاتا وەزیران هەروەسان گۆت ژی: پاشی رێرەوێ دانوستاندێن ڤان دویماهییان یێن دناڤبەرا هەردو حکومەتان دا کەڤتنە بەر بەحسکرنێ، ل دۆر دۆسیەیا ڤاڤارتن و دەستنیشانکرنا پشکا گەنجینەیا فیدرال ژ داهاتێ نەپەترۆلی یێ هەرێمێ و دۆسیەیا هنارتنا پەترۆلا هەرێمێ، د چارچووڤەیێ بڕیارێن جڤاتا وەزیران، لێکتێگەهشتن و کۆنووسێ هەڤپشک یێ لیژنەیان هاتەکرن.

جڤاتا وەزیران دا زانین ژی؛ جڤاتا وەزیران شاندێ دانوستاندکار یێ هەرێمێ راسپارد سوبەهی ل بەغدا کۆمبوونەکێ ل گەل هەڤکویڤێن خۆ یێن فیدرال بکەت، ل سەر بزاڤێن خۆ بەردەوام بن و لەزێ د چارەیێن گونجایی دا ژ پێخەمەت هەر زوی هنارتنا پەترۆلا هەرێمێ ب رێیا کۆمپانییا سۆمۆ دەستپێبکەت، ب تایبەتی کو هەر ئێک ژ وەزارەتا پەترۆلێ یا فیدرال، وەزارەتا سامانێن سروشتی، کۆمپانییا باکور و کۆمپانییا سۆمۆ کۆنووسێ هەڤپشک یێ پرۆتۆکۆلی یێ دەستپێکرنا هنارتنا پەترۆلێ ئیمزاکرییە و بۆ نەهێلانا ئاستەنگان یا ل سەر ملێن حکومەتێ ب زێدەهی ڤە بجهئینایە و بزاڤ د بەردەوامن بۆ وێ یەکێ ئاستێ بەرهەمئینانا پەترۆلێ بۆ بەری هێرشێن تیرۆرستی ڤەگەریت.

ل دۆر هەڤپشکییا داهاتێ ناڤخۆ یێ هەرێمێ دناڤبەرا هەولێر و بەغدایێ دا، جڤاتا وەزیران هەروەسان دیارکر ژی؛ تەکەزی ل وێ یەکێ هاتەکرن کو پێدڤییە ل گۆرەیی یاسایا برێڤەبرنا دارایی یا فیدرال و یاسایا بودجەیا گشتی یا فیدرال هاتییە رێکخستن کو دادگەها فیدرالی دوپاتی لێ کرییە، لەوما داخوازێ دکەین د چارچووڤەیێ ڤان هەردو یاسایان دا بابەتێ داهاتێ نەپەترۆلی ژی بهێتە چارەکرن، هەروەک د دویماهی بڕیارا جڤاتا وەزیرێن فیدرال دا تەکەزی لێ هاتییەکرن و لیژنەیەکا تایبەتمەند یا هەڤپشک بۆ هاتییە پێکئینان، دا کو ئێدی ڤان دو بابەتان وەک بەهانە بۆ خەرجنەکرنا مووچە و شایستەیێن مووچەخۆرێن هەرێما کوردستانێ نەهێتە بکارئینان.

جڤاتا وەزیران ل دۆر گیرۆبوونا مووچەیێ مووچەخۆرێن هەرێما کوردستانێ هەروەسان گۆت ژی: ب لێبۆرین ڤە د مەها ئیلۆنێ داینە لێ نوکە مووچەیێ مەها خزیرانێ یێ دهێتە هنارتن، کو هەروەک د بڕیارا دادگەها فیدرال دا تەکەزی لێ هاتییەکرن، پێدڤی بۆ مووچە و شایستەیێن مووچەخۆرێن هەرێما کوردستانێ تێکهەلی ناکۆکییێن دناڤبەرا هەردو حکومەتان نەهێتەکرن.