گاڤ - تایبەت

ل خوارنگەهەکا دهۆکێ پتری 80 کیلۆیێن گۆشتێ قەدەغەکری یێ هندی کو ب ناڤێ یێ خۆمالی دهاتە فرۆتن، لیژنەیا بلند یا قائیمقامییێ دەست دانا سەر و دێ خودانێ جهی ژی هێتە سزادان.

پێنجشەمبییێ 11ێ ئیلۆنا 2025، دکتۆر پێهەل، ئەندامێ لیژنەیا بلند یا دویڤچوونا بازاری یا سەر ب قائیمقامییا قەزا دهۆکێ بۆ گاڤ دازانین؛ ب بەردەومی ژ ئالییێ لیژنەیێن مە ڤە دویڤچوون دهێتە کرن، لێ پشتی زانیاری گەهشتینە مە و مە سەرەدان بۆ جهی کری، هۆسا دیاربوو گۆشتەکێ هاوردەکری یێ بەستیگرتی ب خەلکی دهێـتە دان.

پێهەلی دیارکر ژی؛ پشتی مە دویڤچوون بۆ کری، دیاربوو کو ئەو گۆشتێ بەستیگرتی هەر ژ دەستپێکێ دناڤا بازارێن هەرێما کوردستانێ دا هاتییە قەدەغەکرن.

ل دۆر ژێدەرێ ئینانا وی گۆشتی پێهەلی بۆ گاڤ گۆت ژی: ئەو گۆشتێ بەستیگرتی ل وەلاتێ هندستانێ بۆ هەرێما کوردستانێ هاتییە هنارتن، گۆشتن یێ گامێشییە و ل گۆرەیی رێنماییێن ساخلەمی و ڤێتەرنەری قەدەغە یە.

ل دۆر بڕێ وی گۆشتی هاتییە گرتن، پێهەلی ئاشکراکر ژی؛ دهێتە تەقدیرکرن بڕێ وی گۆشتی دناڤبەرا 80 کیلۆ هەتا 100 کیلۆیان دا بیت.

ل دۆر داخستنا وی جهی، پێهەلی ئاشکراکر ژی؛ دێ دانوستاندن ل دۆر هێنە کرن و دویماهی بڕیار دێ ژ ئالییێ قائیمقامی ڤە هێتە دان، ب پشتراستی ڤە ل گۆرەیی رێنماییان دێ رێکارێن توند ل دژی هێنە گرتن.