گاڤ

ب فەرمی بانگەشەیا هەلبژارتنێن جڤاتا نوینەرێن ئیراقێ دەستپێکر، ئالیێن سیاسی و کاندید دشێن ب ئاشکرایی ل هەمی باژێر و دەڤەرێن ئیراقێ و هەرێما کوردستانێ، بانگەشەیێ بۆ لیست و ژمارەیێن خۆ بکەن.

ئەیینیێ 3ێ چریا ئێکێ یا 2025، ل دەمژمێر 12:00 ب فەرمی بانگەشەیا هەلبژارتنێن جڤاتا نوینەرێن ئیراقێ بۆ خۆلا شەشێ دەستپێکر، ئالیێن سیاسی و کاندید دشێن ب ئاشکرایی د چارچۆڤەیێ ڕێنمایێن کۆمسیۆنا بلند یا سەربخۆ یا هەلبژارتنێن ئیراقێ دا، ل هەمی باژێر و دەڤەرێن ئیراقێ و هەرێما کوردستانێ، بانگەشەیێ بۆ لیست و ژمارەیێن خۆ بکەن.

ل گۆرەیی کۆمسیۆنا بلند یا سەربخۆ یا هەلبژارتنێن ئیراقێ، ل سەرانسەری ئیراقێ ب هەرێما کوردستانێ، 21 ملیۆن و 404 هزار و 291 وەلاتییان مافێ دەنگدانێ هەیە، کو 20 ملیۆن و 63 هزار و 773 کەس ژ وان دێ پشکداری دەنگدانا گشتی بن و 1 ملیۆن و 313 هزار و 980 وەلاتی دێ پشکدارییێ د دەنگدانا تایبەت دا کەن.

د ڤان هەلبژارتنان دا، 38 پارتییێن سیاسی، 31 هەڤپەیمانی و 75 لیستێن تاکەکەسی دێ پشکدارییێ د هەلبژارتنان دا دکەن، حەفت هزار و 768 کەس ژی ژ هەردو ڕەگەزانە، پێنج هزار و 520 زەلام و دو هزار و 248 ژنان خۆ کاندید کرییە.

ئەڤە د دەمەکی دا یە، 1ێ چریا ئێکێ یا 2025، جومانەگلایی، پەیڤدارا کۆمسیۆنا بلند یا سەربخۆیا هەلبژارتنێن ئیراقێ راگەهاندبوو، دەما بانگەشەیا هەلبژارتنان، ل دەمژمێر 12ێ نیڤ شەڤ ئەیینییێ 3ێ چریا ئێکێ، دەستپێدکەت.

ل دۆر دویماهیهاتنا دەمێ بانگەشەیێ ژی، گلایی گۆتبوو: سپێدەهییا ڕۆژا شەمبی، 08ێ چریا دویێ 2025، بانگەشەیا هەلبژارتنێن خۆلا شەشێ یا جڤاتا نوینەرێن ئیراقێ ب دویماهی دهێت.

ل 9-4-2025، نڤیسینگەها محەمەد شیاع سوودانی، سەرۆکوەزیرێ ئیراقێ راگەهاند؛ ب پترییا دەنگان، جڤاتا وەزیران 11ێ چریا دویێ یا ئەڤ سالە وەک رۆژا هەلبژارتنێن جڤاتا نوینەرێن ئیراقێ بۆ خۆلا شەشێ دەستنیشان کر.