شێرزاد نوورى

د بانگەشەیا هەلبژارتنان دا ل هەولێرێ، نێچیرڤان بارزانی، جێگرێ سەرۆکێ پارتى ب پەیڤەکا ب هێز و دلسۆز گوت: " دێ دەنگێن پارتی کەینە ئێک ملیۆن دەنگ". ئەڤ گۆتنە بتنێ ژمارەک نینە، بەلکو نیشانەکە ژ حەزەکا مەزçن یا سیاسی بۆ گرێدانەکا نوى د ناڤبەرا پارتی و خەلکی دا.  پارتی دیمۆکراتی کوردستان بۆ ماوەیەکێ درێژ ب رۆلێ خۆ یێ چالاک و دیرۆکی شیایە د گۆرەپانا سیاسیا کوردستانێ و ئیراقێ دا بهێزترین پارت بیت.

ئەڤ بانگەشەیا نێچیرڤان بارزانی، جێگرێ سەرۆکێ پارتى دکەت، رێکەکا نوى یە بۆ گەشەپێدانا سیاسى، بۆ وێ چەندێ کو پارتی بشێت باوەرییا خەلکی بدەستڤەبئینیت، پێدڤییە ب فەرمی پرۆگرام و پەیامەکا رۆهن بۆ گەنجان و ژنان هەبیت، ژبەرکو ئەڤە دو بنەمایێن سەرەکی یێن نشتیمان و دەنگێن سیاسی نە.

ب شێوەیەکێ گشتی، بۆ گەهشتن ب ئێک ملیۆن دەنگان، پێدڤییە پارتى بەرنامەیەکێ راستەقینە بۆ خزمەتگوزاری و چاکسازییێ پێشکێش بکەت، و ل گەل وێ چەندێ خەلک ب رێکا کارکرن و ئەنجامان پشتا خۆ ب پارتى گەرم بکەن، ئەو کەسێن دەنگى ددەن، دەنگێ خۆ ددەنە کریاران نە دەنگى ددەنە خەیال و گۆتنێن بێ کردار.

پارتی دیمۆکراتی کوردستان دڤێت بەرنامەیێن خۆ یێن میدیایی و ئاگەهدارکرنێ ب شێوەیەکێ مەزنتر و چالاکتر بکاربئینیت، ب تایبەتی د پلاتفۆرمێن سۆشیال میدیایێ دا، ژبەرکو ئەڤ گۆڕەپانا نوکە بلندترین و کاریگەرترینە ل سەر گەنجان، ئەڤە باشترین رێکە کو ب سادەیی پەیامێن سیاسی بگەهیننە هزاران کەسان.

گۆتنا نێچیرڤان بارزانی دشێت ب شێوەیەکێ سیاسی و دیرۆکی بهێتە تێگەهشتن، ژبەرکو "ئێک ملیۆن دەنگ" نیشانا باوەرییەکا نوییە بۆ هەرێما کوردستانێ، باوەرییەکا بەرپرسیار، بەرهەمدار و هەڤپشک ل گەل خەلکی. ئەگەر پارتی بشێت ئەڤێ بانگەشەیێ ب پرۆگرام و کارێن دروست پشتەڤان بکەت، گەهشتن ب ئێک ملیۆن دەنگان نەبتنێ دێ بیتە حەز، بەلکو دێ بیتە پەیامەکا هەبوونا نوکە و پاشەرۆژا سیاسى یا کوردستانێ.