گاڤ

پەیامنێرێ گاڤ دازانین؛ ل تەنشت کەمپا چەممشکۆ دێ کۆمەلگەهەکا وەرزشی هێتەدروستکرن کو یاریگەهەکا مەزن و ئێکا بچویک بۆ یانەیا زاخۆ بخۆڤەدگریت.

پێنجشەمبییێ 30ێ چریا ئێکێ یا 2025، نۆح سلێمان، پەیامنێرێ گاڤ راگەهاند؛ ل ئیدارەیا سەربخۆ یا زاخۆ ل چەممشکۆ تەنشت کەمپا ئاوارەیان و ل پشت رێڤەبەرییا پۆلیسێن زاخۆ 400 دۆنەمێن ئەردی بۆ دروستکرنا کۆمەلگەهەکا وەرزشی هاتینەتەرخانکرن.

 پەیامنێرێ گاڤ گۆت: دناڤا ڤێ کۆمەلگەهێ دا یاریگەهەکا مەزن کو جهێ 40 هزار پشتەڤانان بخۆڤەدگریت کو ژ دو قاتان پێکدهێت دێ بۆ یانەیا زاخۆ هێتەدروسکرن.

پەیامنێرێ گاڤ ئاشکراکر ژی؛ هەروەسان یاریگەهەکا بچویک بتنێ بۆ راهێنانان دێ بۆ یانەیێ هێتەدروستکرن، لێ جهێ تەماشەکرنێ بۆ پشتەڤانان تێدا نابیت.

نۆح سلێمان ئاماژە ب وێ یەکێ ژی دا؛ کۆمەلگەها وەرزشێ هەر ئێک ژ مۆل، هۆتێل، مارکێت، کافێ و هۆلێن وەرزشی و هتد بخۆڤەدگریت.

ل دۆر وی کۆژمەیێ کو دێ ل هەردو یاریگەهێن یانەیا زاخۆ هێتەخەرجکرن، پەیامنێرێ گاڤ گۆت: 40 هەتا 45 ملیار دیناران وەک خەرجییەکا دەستپێکێ هاتینەدانان و دا کو دەست ب وی پرۆژەیی بهێتەکرن بتنێ رازەمەندییا سەرۆکێ حکومەتا هەرێما کوردستانێ مایە.