مەسروور بارزانی: بهرسڤا نهزانان بێدهنگییه
بەلاڤ بکە
گاڤ
مەسروور بارزانی، جێگرێ سەرۆکێ پارتی د کەرنەڤالێ بانگەشەیا لیستا 275 یا پارتی دا ل دهکۆێ دیارکر، "ئەم خزمەتکرنا خەلکێ کوردستانێ ب منەت نزانین، بەلکی ب ئەرکێ خۆ دزانین".
سێشەمبییێ 4ێ چریا دویێ یا 2025ێ، ب بەرهەڤبوونا هەردو جێگرێن سەرۆکێ پارتی دیمۆکراتی کوردستان، نێچیرڤان بارزانی و مەسروور بارزانی ل دهۆکێ ئاهەنگا پشتەڤانی و سەرئێخستنا لیستا 275 یا پارتی بۆ خۆلا شەشێ یا هەلبژارتنێن جڤاتا نوینەرێن ئیراقێ هاتە گێران.
ل دەستپێکا کەرنەڤالێ، نێچیرڤان بارزانی جێگرێ سەرۆکێ پارتی، گۆتارەک پێشکێشکر و تێدا ئاماژە ب وێ چەندێ کر، دیرۆکا پارتی و دەڤەرا بەهدینان ژئێک جودا نابن، ئێکەمین لقێ پارتی ل ڤێ دەڤەرێ بوویە و ئێکەمین داستانا شۆرەشا ئیلۆنێ ژی هەر ل ڤێ دەڤەرێ بوویە، داستانا زاویتە ب فەرماندەییا ئێکسەر یا بارزانییێ نەمر و ب خوینا باب و باپیرێن هەوە هاتییەتۆمارکرن. ئێک ژ ئێکەمین مەفرەزەیێن شۆرەشا گولانێ ژی دیسان ل ڤێ دەڤەرێ بوویە، کەس نەشێت بەحسی دیرۆکا مللەتێ مە و قوربانییێن گەلێ کوردستانێ بکەت، ئەگەر بەحسی قارهمان، دلسۆزی و خهباتا بەهدینان نهكهت.
دەقێ گۆتارا مەسروور بارزانی ل کەرنەڤالا پارتی ل دهۆکێ:
ب ناڤێ خودایێ مەزن و دلۆڤان
جهماوهرێ تێكوشهر و قارهمان یێ دهۆک، سێمێل، شێخان، بهردهرهش، ئاكرێ، ئامێدی و ئیدارەیا سهربخۆ یا زاخۆ
قارهمانێن بەهدینان و کەلها كوردینی و پارتاتییێ
هوین ههمی بخێربهێن سهرسهران و سهرچاڤان
سلاڤێن خودایێ مهزن ل سهر ههوه ههمییان بن و سلاڤێن مهرجهعێ كورد و كوردستانێ جهنابێ سهرۆک بارزانی ب ههوه ههمییان دگههینم. ئهز گهلهک سوپاسییا برایێ خۆ یێ خۆشتڤی کاک نێچیرڤان بارزانی، سهرۆكێ ههرێمێ دكهم بۆ وان پهیڤێن جوان كو ب ڕاستی ئهڤه پهیڤا پارتی و پهیاما پارتییه ل جهێ مه ههمییان ب ههوه گههاند و هیڤیدارین هوین ههمی پێكڤه پشتهڤانییا پهیاما پارتی بن بۆ سهرئێخستنا لیستا 275، لیستا پارتی دیموكراتی كوردستان. سوپاسیا ئامادهبوونا ههوه دكهین، سوپاسییا پشتهڤانییا بهردهواما ههوه دكهین، سوپاسیا وێ باوهریێ دكهین كو ههوه دایه مه و ئهم بهردهوامین داكو ئهم بشێین د خزمهتا ههوه دا بین.
ل ڤێرە ب ناڤێ ههوه ههمییان، داخوازێ ژ بهربژارێن پارتی دیمۆكراتی كوردستان دكهم راببنه سهر پێیان و ئهم ههمی پێكڤه بخێرهاتنهكا گهرم ل كاندیدێن پارتی بكهین، گهلهک بخێربهێن.
خویشک و برایێن هێژا:
مه گۆتار نینه، ژ بهر كو ب ڕاستی كریارێن مه گۆتارێن مه نە، ئەو تشتێن بهری نوکە مه كرین، دیدەڤانێن وێ چهندێ نه كو پارتی چەوا شیایه خزمهتا خهلكێ كوردستانێ بكهت، ههروهک برایێ من یێ خۆشتڤی کاک نێچیرڤان گۆتی: هزار گۆتار گووری كریارهكێ بن، كریارێن پارتی هندی گەلەکن ژ سپێدێ ههتا ئێڤاری ئهم حهز دكهین بۆ ههوه بهحس بكهین و هێشتا ب دویماهی ناهێن.
ل ڤێرە من پێ خۆشه بێژم كو بۆچی پێدڤییه ئهم پشكدارییێ د ڤێ ههلبژارتنان دا بكهین و بۆچی پێدڤییه دهنگێ خۆ بدهینه پارتی؟ ئهم ل سهر دۆریانهكێ راوهستیاینه، گوهۆرین ل سهر ئاستێ ناڤخۆ و ل سهر ئاستێ دهڤهرێ و جیهانێ ب بهردهوامی ههنه، پێدڤییه دا كو ئهزموونا ههرێما كوردستانێ بهێتهپاراستن و بهرهڤ پێشتر بچیت، دا كو دهستكهفتێن زێدهتر بدهستڤهبئینین، پێدڤییه ئهم ل بهغدا بهێز بین و مە پشكدارییهكا كارا د پهرلهمانێ ئیراقێ دا ههبیت. گهلهک ئالی ههبوون چ ل سهر ئاستێ ناڤخۆ و چ ل سهر ئاستێ حكومهتا فیدرال، بزاڤێن وێ چەندێ کرینە كو نههێلن ههرێما كوردستانێ بگههیته ئارمانج و مهبهستێن خۆ، لێ سوپاس بۆ خودێ و پشتهڤانییا ههوه، ئهم بهردهوام بووین ل سهر پێشكهفتنێ و رانەوهستیاینه، ب ئانەهیا خودێ راناوهستین. گهلهک كهسان ئاخفتن د دهرههقێ پارتی دا كرن و نهههقی كر، بوختان پێ كرن و تشتێن نهراست گۆتن، ل ڤێرە پێدڤی نینه بهرسڤا وان بدهین، ژ بهر كو بهرسڤا نهزانان بێدهنگییه.
جهماوهرێ قارهمان یێ دهڤهرا بەهدینان:
ل سهر ئاستێ ناڤخۆ گهلهک بزاڤ هاتنەکرن بۆ هندێ دهستكهفتێن مه رابگرن، لێ ل ڤێرە پێچێنەبوو، چونکی ئهڤرۆ ل كوردستانێ پارتی تاكه حزبه كو چ مونافس و هەڤرک ڤێگاڤێ ل سهر ئاستێ كوردستانێ نهماینه، لهوما بزاڤکرن ب رێكێن دی و ب دروستكرنا ههڤپهیمانییان ل گهل نهیارێن كوردستانێ، گهلهک فشاران بئێخنه سهر ههرێما كوردستانێ و ب تایبهتی ل سهر پارتی، چونکی هەمی گاڤان هۆسا ددیت كو سهركهفتنا پارتی سهركهفتنا كوردستانێیه و بۆ هندێ پارتی سهرنهكهڤیت، ههمییان پیلان گێڕان دا كو كوردستان سهرنهكهڤیت، لێ دیسان ب پشتهڤانییا ههوه و پشتهڤانییا خودێ، پیلانێن وان سهرنهكهفتن و كوردستان رۆژ ب رۆژ بهرهڤ سهركهفتنێن مهزنتر گاڤ هاڤێشتن و ئهم د وێ باوهریێ داینە، پشتهڤانییا ههوه و باوهرییا ههوه ب پارتی، رۆژ ب رۆژ دێ سهركهفتنا مهزنتر ژی ب ئانەهییا خودێ بدهستڤهئینین.
گهلهک كهس نوکە دبێژن دهنگێ خۆ بدهنه مه ژبهر كو ئهم هێزا ههوەینە و دهنگێ ههوهینە، لێ ئهو جهێ پارتی لێ نهبوویی، مه دیت، نه كهسهكێ چ هێز ههبوو، نه كهسهكێ چ دهنگ ههبوو، نه كهس ژی ئاماده بوو ل سهر كوردستانێ خۆ بكهته قوربانی، بتنێ ل وی جهێ پارتی لێ بیت بهرگری ژ كوردستانێ دهێتهكرن، ئهو جهێ پارتی لێ بیت ئاشتی ئارامی و ئاڤهدانی ههیه.
گهلەک ئالییان بزاڤکرینە دا كو هەڤرکییا پارتی بهێتهكرن و گوهۆرین د یاسایێ دا بهێتهكرن، كوتایێن خویشک و برایێن مه یێن كریستیان و توركمان بهێنه گوهۆڕین و كێم ببن، ب مخابنی ڤه مه دیت د ههلبژارتنا بۆری دا، ل سهر ئاستێ كوردستانێ كوتایێن خویشک و برایێن مه یێن كریستیان و توركمان گهلهک كێم بوون، ئهوێن مایی ژی ژ بهر پارتی مان، ژ بهر كو پارتی پێداگری ل سهر وێ چهندێ كر كو پێدڤییه مافێ خویشک و برا كریستیان و توركمانێن مه بهێتهپاراستن. پارتی باوهری ب پێكڤهژیانا ئایین و نهتهوهیان هه یه، پارتی باوهری ب ئاشتی و سهقامگیرییێ هه یه، پارتی خهباتێ بۆ بدهستڤهئینانا مافێن ههر نهتهوهیهكی نه بتنێ یێن كوردان دكهت، نه بتنێ مافێ وان نهتهوهیێن كو نوکە ل كوردستانێ دژین، بهلكو پارتی ڤێ جارێ بریارا وێ ئهوه و رێنمايێن جهنابێ سهرۆكێ مه ئهوه كو پارتی بهرگرییێ ژ مافێ ههر ستهملێكریهكی بكهن، ههمی خهلكی بكهن كو نوکە ل ئیراقێ پهنا ئینایه بهر كوردستانێ و داخواز دكهن كوردستان بهرگرییێ ژ مافێن وان ژی بكهت، لهوما ڤێ جارێ كاندیدێن مه، بهربژارێن مه د پهرلهمانێ ئیراقێ دا دڤێت بهرگرییێ ژ مافێ خهلكێ ئیراقێ هەمییێ بكهن.
ل سهر ئاستێ بهغدا دیسان فشارهكا مەزن ل سهر ههرێمێ دروستكر، فشارا ئابۆری ل سهر مه دروستكر، بودجەیا ههرێمێ بڕی، پەترۆلا مه راگرت، بزاڤێن گوهۆڕینا دیمۆگرافییا و جۆگرافییا كوردستانێ ههتا نوکە ژی، دادگههـ ل دژی مه بكارئینان، هێرشێن درۆنی ل دژی ههرێما كوردستانێ هاتنهكرن، داكو ئهم وه نهكهین كو سیاسهتا دژاتییكرنا ههرێمێ بهردهوام بیت، پێدڤییه ئهم ب خۆ ل بهغدا بین د ناڤهندا بریارێ دا ههتا رێكێ نهدهین خهلكهكێ دی ل جهێ مه بریارێ بدهت، خهلكهكێ دی ل جهێ مه ل سهر چارهنڤیسێ ههرێما كوردستانێ پیلانان بگێڕیت و نههێلیت كوردستان بگههیته مافێن خۆ، ههبوونا پارتی د پهرلهمانێ بهغدایێ دا ههمی وان پیلانان ب ئانەهییا خودێ دێ تێكدهین و وه دكهین كوردستان ببیته نموونهیا پێكڤهژیان و پێشكهفتنێ ل سهر ئاستێ رۆژههلاتا ناڤین.
دا كو كوردستان پاراستی بیت، پێدڤییه پارتی بهێز بیت، پێدڤییه پارتی پاراستی بیت، سهنهدا پاراستنا پارتی خهلكێ دلسۆز و وهفادار یێ رێبازا بارزانی و پارتییه.
خویشک و برایێن هێژا:
ئهز دزانم خهلكێ دهڤهرا بەهدینان ب رەنگەکێ گشتی مهغدوور بوویه، وهكی پێدڤی خزمهتا خهلكێ مه نههاتییهكرن، ئهو ژی دوژمن و نهیارێن مه ههمی دهمان رێگر بوون ل وێ چهندێ ههمی شایستهیێن دارایی و مافێن خهلكێ كوردستانێ وهكی خۆ بهێنهبجهئینان. لێ مه گوهێ خۆ دا ههوه، گوهێ خۆ دا گازندەیێن ههوه و ههمی ل بهرچاڤ وەرگرتن، حكومهت ئێک ل دویڤ ئێكێ، پارتی دیمۆكراتی كوردستان سهرپهرشتی كرییه و ب رێڤهبرییه، ژ رۆژا دهسپێكێ ههتا ئهڤرۆ، بهرێ بنیاتێ ئاڤهدانییا كوردستانێ دانایه و نوکە ژی ئهم بهردهوامین بۆ پێشكێشكرنا خزمهتێ و دێ بهردهوام بین بۆ بدهستڤهئینانا ههمی مافێن ههوه و دێ خزمهتگۆزارییێن پتر پێشكێشی ههوه كهین.
شهرێ داعش هاتهكرن، شهرێ وان نهیاران هاتهكرن كو تهماعییا داگیركرنا كوردستانێ ههبوو، قوربانیدانا پێشمهرگهیی، خهبات و ماندیبوونا ههوه ناهێتهژبیركرن. ل ڤێرە داخوازێ ژ ههوه ههمییان دكهم، ئهم سهرێ رێز و نهوازشێ بۆ كهسوكارێن سهربلند یێن شههیدان بچهمینین و سوپاسییهكا گهرم ل پێشمهرگەیێن قارهمان و هێزێن ئاسایش و ئهمنیهتا ههرێما كوردستانێ بكهین، سوپاسییا ههمییان دكهین، دهستخوشییێ ل خزمهت و ماندیبوونا پێشمهرگهیی دكهین.
ئەو بهرنامهیێن كو حهتا نوکە حكومهتا ههرێمێ پێشكێشی ههوه كرین گەلەکن، مه ژی چو جارهكێ خزمهتكرنا خۆ ب منهت نهزانییه و ههر دهمهكی ب ئهركێ خۆ زانییه، ئهركێ مه ئهو بوویه كو خزمهتا خهلكێ كوردستانێ بكهین. مە گهلهک بهرنامه ههبوون دا كو ئابۆرییا كوردستانێ بهرفرههتر ببيت و بتنێ پشت ب تشتهكی بتنێ گرێنەدەت، ئەو كارێن كو هاتینهكرن بۆ پێشئێخستنا ژێرخانەیا ئابۆرییا كوردستانێ دیارن، ئێدی جۆتیارێن مه نهچار نینن بهرههمێن خۆ بهاڤێن، سوپاس بۆ خودێ نوکە بهرههمێ جۆتیارێن كوردستانێ ل ههرێما كوردستانێ دهێنەفرۆتن، دبینین فێستیڤال ل ههمی باژێرێن كوردستانێ دهێنهڤهكرن و دهرگههێ هنارتنا بهرههمێ ناڤخۆیی بۆ وەلاتێن دهرڤه ژی هاتییهڤهكرن.
پرۆژەیێ 'رووناکی' ئێكه ژ وان پرۆژهیێن كو گهلهكان ب خهون دزانی، لێ ب خۆراگرییا مللهتێ مه، ئیرادهیا پارتی، بێهنفرەهییا ههوه، ماندیبوونا ههوه و پشتهڤانییا ههوه، ب زهحمهت و خهباتا گهنجێن پارتی، پرۆژەیێ 'رووناکی' بوو راستی و ئهڤرۆ باژێرێ دهۆكێ و گهلهک باژێرێن دی خودانێ كارهبا 24 دهمژمێرینە و هیڤییا مه ئهوه و ب ئانەهییا سالا بهێت كوردستان ههمی دێ بیته خودانێ كارهبا 24 دهمژمێری.
گهلهک پرۆژەیێن ئاڤێ هاتنهدروستكرن، گهلهک بهنداڤ هاتنهدروستكرن، دێ بهردهوام ژی بین بۆ دروستكرنا بهنداڤان و نههێلانا قهیرانا ئاڤێ ل ههمی پارێزگههێن كوردستانێ.
كهرتێ پیشهسازی ئێكه ژ وان كهرتێن كو ل نک مه گهلهك گرنگه زێدهتر گرنگییێ پێ بدهین و د بهرنامهیێ حكومهتا ههرێما كوردستانێ دا یه كو گرنگییێ ب كهرتێ پیشهسازی بدهت ژ بهر كو دەرفەتێن كاری یێن گهلهک پتر بۆ خهلكێ كوردستانێ و ب تایبهتی گهنجان دابین دکەت.
د گهشتۆگوزارا كوردستانێ دا گهلهک جهێن سهرنجراكێش و خۆش ههنه، د بهرنامهیێ حكومهتێ دا یه كو گرنگییێ ب وان شوینوارێن كوردستانێ بدهت كو بۆ گهشتوگۆزارێ دهێنهبكارئینان و ههتا نوکە دبینن چهندین پرۆژه ل سهر ئاستێ ههمی كوردستانێ بێ فهرق و جوداهی هاتینهكرن و بێگۆمان دهڤهرا بەهدینان دهڤهرهكا گهلهک خۆش، جوان و سهرنجۆاكێشه و دێ گرنگییهكا گهلهک پتر ژی ب كهرتێ چاندنێ ل ڤێ دهڤهرێ ژی دهین.
رێك و پر، نوکە ئهگهر هەڤبەر بكهن دناڤبهرا ههرێما كوردستانێ ل گهل دهڤهر و پشكێن دی یێن ئیراقێ، هوین دبینن كو ههرێما كوردستانێ پێشكهفتنهكا گهلهک پتر بخۆڤهدیتییه و ئهو پرۆژه ژی دێ بهردهوام بن دا كو ئاسانكاری بۆ وەلاتییێن ههرێما كوردستانێ بهێنهكرن، ئاسانكاری بۆ هاتنوچوون و سلامەتییا وەلاتییان بهێنەكرن، دیسان ئهو پرۆژه چهند هاتبنهكرن، هێندهكێن دی د رێكێ دا نه و دێ بهردهوام بن.
پرۆژەیێ 'هەژماری من' من ئێكه ژ وان پرۆژهیێن كو گهلهک گرنگه بۆ دروستكرنا ژێرخانەیا ئابۆری و ڤهكرنا دهروازهیان بۆ گهنجێن مه ههتا ببنه خودان بزنسێ خۆ یان دشێن قهرێن بەنكی وهربگرن و زێدهتر مفایی ژ وێ خزمهتگیزاریان وەربگرن كو د سیستەمێ بەنكی دا حكومهتا ههرێمێ پێشكێشی وەلاتییان دكهت.
هیڤییا مه ئهوه كو چهند ئهو بهرنامه و خزمهتگۆزارییێن دهێنهپێشكێشكرن، ب پشتهڤانییا ههوه بهردهوام بن، نوکە ژی هیڤیدارم ئهم بشێین جهێ باوهرییا ههوه بین، ئەو باوهرییا ههوه ب مه دایی، ئهم بشێین وی ئهمانهتی رابگرین و د خزمهتا ههوه دا بین. نوکە ژی داخوازا من ژ ههوه ئهوه، ئهگهر هوین دیسان باوهرییا خۆ بدهنه مه، ئهز دبێژم كریارێن مه دیدەڤانێن وێ چهندێ نه كو ئهم ژی دشێین ل سهر خزمهتكرنا ههوه بهردهوام بین.
پارتی د رۆژێن بۆری دا گەلەک قوربانی داینه، پارتی نوکە دهستكهفتێن مەزن ههنه كو پێشكێشی ههوه كرینه و پارتی بۆ پاشهرۆژێ بهرنامهیێن گهلهک پتر ههنه بۆ باشتركرنا ژیانا خهلكێ خۆ و بۆ بهێزكرنا كوردستانا خۆ، بهلێ دا كو بهرهڤ پاشهرۆژێ بچین، بهرهڤ پاشەرۆژەکا رۆهنتر بچین، پێدڤییه ئهم پێكڤه بچین. پارتی جودا نینه ژ ههوه، پارتی پشكهكه ژ ههوه و هوین هێزا پارتینه، ئهگهر ههوه دڤێت كوردستان رۆژ ب رۆژ بهرهڤ پێشتر بچیت، سهركهفتیتر بیت، دهنگێ خۆ بدهنه پارتی ههتا پارتی سهربكهڤیت و هوین ژی سهربكهڤن و لیستا پارتی دیمۆكراتی كوردستان ڤێ جارێ د وی پهرلهمانی دا سهربكهڤیت، گهرهنتییا وێ چهندێ دکهت كو پتر پارتی بكهڤیته خزمهتکرنا خهلكێ كوردستانێ.
پارتی ههر دهمهكی ل گهل هێز و وزایا گهنجان بوویه، ل گهل وهرزشڤانان بوویه، ل گهل هونهرمهندان بوویه، ئهڤ یاریگههه یاریگهههكه كو گهنجێن مه گهلهک سهركهفتن تێدا تۆماركرینه. ئهم وهك پارتی و وهكی حكومهت ژی دێ ل سهر پشتهڤانیكرنا وهرزش و وهرزشڤانان دا كو سهرێ كورد و كوردستانێ ل دنیایێ بلند بكهین ب ئانەهییا خودێ بهردهوام بین. گهنجێن مه گهلهک حهز دكهن بهێنهدامهزراندن چ د كهرتێ گشتی دا و چ د كهرتێ تایبهت دا، دا كو د كهرتێ گشتی دا بهێنهدامهزراندن، پێدڤییه یاسایێن حكومهتا فیدرالی بهێنهگوهۆڕین و ئەو رێگرییه بهێنه ههلگرتن كو نوکە ل ئاستێ حكومهتا فیدرالی هه یه و ناهێلیت خهلكێ كوردستانێ بهێتهدامهزراندن، ئهڤه ئهركێ كاندیدێن پارتییه د پهرلهمانێ ئیراقێ دا كو وه بكهن ب چاڤهكێ یهكسان سهحكهنه ههمی خهلكێ ئیراقێ و خهلكێ كوردستانێ ژی مفایس ژ دامهزراندنێ وهربگریت و ئهوێن پێدڤییه د كهرتێ گشتی دا بهێنهوهرگرتن، رێک ههبیت بهێنهدامهزراندن. لێ د ههمان دهم دا پارتی رانەوهستایه، گرنگییهكا مەزن مه دایه كهرتێ تایبهت، ژ بهر كو دهرفهتهكا مەزن د كهرتێ تایبهت ژی دا هه یه. داخوازا مه ژ گهنجێن مه، ژ خویشک و برایێن مه ئهوه بەرهەڤبن و وان پێ خۆش بیت بۆ ئاڤهدانكرنا وهلاتێ خۆ كار بكهن. كهس وهلاتێ مه ئاڤهدان ناكهت ئهگهر ئهم ب خۆ نهبین، كهس پشتا مه ناگریت ئهگهر ئهم ب خۆ بهێز نهبین. لهوما هێزا كوردستانێ د هێزا پارتی دا یه، هێزا پارتی د ههوه دا یه، هوین بهێز بن، هوین سهركهفتی بن، پارتی سهركهفتی دبیت و كوردستان سهركهفتی دبیت.
د دویماهییێ دا چهند پهیڤهكان پێشكێشی ههوه دكهم:
پێشمهرگەیێن ڤی وهلاتی… سهربلندین ئهم پارتینه
فرەنەتەوە و ئایین… پێكڤه كوردستانینه
ئەلهۆیێن چیایێن بلند… شێرێن دۆل و نهالان
جانگۆرییێن گەلێ خۆ… مە بلند راکر ئالا
داكو ئالایێ پارتی و كوردستانێ ههر بلند و بلندتر بیت، دهنگێ خۆ بدهنه لیستا 275، دهنگێ خۆ بدهنه لیستا پارتی دیمۆكراتی كوردستان، هوین ههر ههبن، ههر ساخ و سهركهفتی بن، كوردستان ههر ئاڤهدان بیت، سهركهفتن بۆ پارتی، سهركهفتن بۆ پارتی دیمۆكراتی كوردستان، سهركهفتن بۆ كوردستانێ، ئاڤهدان بیت كوردستان. گهلهک سوپاسییا ههوه ههمبیان دكهم، گەلەک سوپاس.
