گاڤ

هژمارا وان کەسێن ژ بەربژارییێ ھاتینە دویرخستن گەهشتە نێزیکی 850 کەسان.

پێنجشەمبییێ 6ێ چریا دویێ یا 2025ێ، جومانە گلایى، پەیڤدارا كۆمسیۆنا بلند یا سەربخۆ یا هەلبژارتنان راگەهاند؛ سەرجەمێ گشتی یێ ژمارا بەربژاران بۆ ھەلبژارتنێن خۆلا شەشێ یا جڤاتا نوینەرێن ئیراقێ، حەفت ھزار و 744 بەربژارن.

پەیڤدارا كۆمسیۆنێ دیارکر ژی؛ هژمارا وان بەربژارێن ژ هەڤرکییا ھەلبژارتنان ھاتینە دویرخستن، گەھشتییە 848 بەربژاران.

کۆمسیۆنا بلند یا سەربخۆ یا ھەلبژارتنان، پشتی کو لیست و ھەڤپەیمانییان ناڤێن بەربژێران خۆ ڕادەستکرین، پرۆسەیا هویربینیکرنا ناڤێن بەربژاران دەستپێکر.

کۆمسیۆنێ، ناڤێن بەربژاران بۆ وەزارەتا ناڤخۆ یا ھەرێما کوردستانێ، دەستەیا دەستپاکییێ، بەلگەیێن تاوانان، جڤاتا دادوەرییێ یا ھەرێما کوردستانێ، وەزارەتا ناڤخۆ و بەلگەیێن تاوانان، دەستەیا دەستپاکییێ، جڤاتا دادوەری و لێپرسینێ و دادپەروەری یا ئیراقێ ھنارتینە، ب مەرەما ڤەکۆلینێ ل دۆر ژ هەژیبوونا بەربژاران بۆ پشکداریکرنێ د پرۆسەیا ھەلبژارتنێ دا.

ل 9-4-2025، نڤیسینگەها محەمەد شیاع سوودانی، سەرۆکوەزیرێ ئیراقێ راگەهاند؛ ب پترییا دەنگان، جڤاتا وەزیران 11ێ چریا دویێ یا ئەڤ سالە وەک رۆژا هەلبژارتنێن جڤاتا نوینەرێن ئیراقێ بۆ خۆلا شەشێ دەستنیشان کر و دڤان هەلبژارتنان دا 30 ملیۆن ئیراقییان ژ سەرجەمێ 46 ملیۆن کەسان مافێ دەنگدانێ هەیە. نێزیکی حەفت ملیۆن ئیراقی ژی ژبەر نەبوونا کارتا دەنگدانێ یان کێشەیا کارتا وان، دێ ژ مافێ دەنگدانێ بێبەهربن.

دەنگدەرێن پشکدار ل سەر ئاستێ پارێزگەهێن هەرێمێ:

دهۆک: سەرجەمێ وان کەسێن مافێ دەنگدانێ هەیی (778 هزار و 846) کەس، دەنگدەرێ گشتی (722 هزار و 853) کەس، دەنگدەرێ تایبەت (55 هزار و 993) کەس.

هەولێر: سەرجەمێ وان کەسێن مافێ دەنگدانێ هەیی (ملیۆنەک و 87 هزار و 880) کەس، دەنگدەرێ گشتی (ملیۆنەک و 2 هزار) کەس، دەنگدەرێ تایبەت (85 هزار و 793) کەس.

سلێمانی: سەرجەمێ وان کەسێن مافێ دەنگدانێ هەیی (ملیۆنەک و 201 هزار و 846) کەس، دەنگدەرێ گشتی (ملیۆنەک و 119 هزار و 111) کەس، دەنگدەرێ تایبەت (82 هزار و 547) کەس.