گاڤ

سەرۆک بارزانی ل گەل بەرپرس و کادرێن لقا شەش یا ئەورۆپا یا پارتی دیمۆکراتی کوردستان کۆمبوو و دیارکر، ئەو هەمی ستەم و مالوێرانییا ب سەرێ گەلێ کوردستانێ هاتی، نوکە ژی هەرێما کوردستانێ خودانا قەوارەیەکێ سیاسییە.

پێنجشەمبییێ 6ێ چریا دویێ یا 2025ێ، سەرۆک مەسعوود بارزانی ل پیرمام ل گەل بەرپرس و کادرێن لقا شەش یا ئەورۆپا یێ پارتی دیمۆکراتی کوردستان کۆمبوو.

ل گۆرەیی بارەگایێ بارزانی، "د دەستپێکا کۆمبوونێ دا سەرۆک بارزانی دلخۆشبیا خۆ ب ڤەگەریان و پشتەڤانییا شاندێ مێهڤان بۆ سەرئێخستنا لیستا 275 یا پارتی دیمۆکراتی کوردستان نیشاندا. سەرۆک بارزانی بەحسی رۆل و ماندیبوونا ھەڤالێن دیاسپۆرایێ کر کو ھەردەم بۆ سەرئێخستنا پرسێن نەتەوەیی و نیشتیمانی رۆلەکێ بەرچاڤ ھەبوویە و تێکۆشاینە، و ھیڤییا سەرکەفتنێ بۆ وان خواستن."

بارەگایێ بارزانی دیارکر، "سەرۆک بارزانی ل دۆر پرۆسەیا سیاسی یا ئیراقێ و دەڤەرێ و ھەرێما کوردستانێ و ھەلبژارتنێن بھێت یێن جڤاتا نوینەرێن ئیراقێ کورتیەک بۆ ئامادەبوویان پێشکێشکر و بەحسی بنەمایێن دەستوورێ ھەردمی یێ ئیراقێ و بجهنەئینانا بەندێن دەستووری کر کو بوونە ئەگەرێ سەرھلدانا ب دەھان کێشە و ئاریشەیان دناڤبەرا ھەولێر و بەغدایێ دا، ھەروەسان سەرۆک بارزانی تەکەزی ل وێ یەکێ کر کو بجهئینانا بەندێن دەستوورێ ئیراقێ ئەگەرێ سەرەکی یێ سەقامگیری، ئاڤەدانی و پێکڤەژیانێیە."

بارەگایێ بارزانی دازانین؛ "سەرۆک بارزانی کورتەییەک ل دۆر زولم و تاوانێن ڕژێمێن ئێک ل دویڤ ئێک یێن ئیراقێ بەرامبەری گەلێ کوردستانێ پێشکێشکر و گۆت: پشتی وێ ھەمی زولم و زۆرداری و مالوێرانییا ب سەرێ گەلێ کوردستانێ ھاتی، نوکە ژی ھەرێما کوردستانێ خودان قەوارەیەکێ سیاسییە و د وی چارچۆڤەیی دا ل گەل ھەبوونا ئاستەنگ و ڕێگرییێن بەردەوام ھەرێما کوردستانێ د بزاڤێن چڕ دایە بۆ پێشئێخستن و ئاڤەدانکرنا باژێر و باژێرکان بێ جوداھی و پرۆژەیێن گەلەک مەزن ژی ھاتینەبرێڤەبرن و پشکا شێری یا وان پرۆژەیان ب شیانێن دەستێ ناڤخۆیی ھاتینەبرێڤەبرن، ھەروەسان سەرۆک بارزانی گۆتە ئامادەبوویان کو چەوا ل بۆری پێشمەرگە ئاسا تێکۆشاینە نوکە ژی بەردەوام بن دژی وان بزاڤان کو بۆ خەلک و حکومەت و ھەرێما کوردستانێ ب گشتی دھێنەدروستکرن. سەرۆک بارزانی ئەو ژی دیارکر کو دوژمن ب پلانێن جۆراوجۆر بزاڤێن تێکدانا ئەزموونا ھەرێما کوردستانێ دکەن، ب تایبەتی ب رێیا بەلاڤکرنا ماددەیێن ھوشبەر د ناڤ جڤاکی دا."

بارەگایێ بارزانی ئاشکراکر؛ "سەرۆک بارزانی گۆتە ئامادەبوویان کو پێدڤییە ئەم ھەمی پشت ب خۆ گرێبدەین و چاڤێ مە ل دەستێ کەسێ نەبیت. د دیرۆکێدا دیارە چ دەمێ کوردستان کەفتییە د ڕەوشەکا مەترسیدار دا و بەر ھێرشێن نەحەزان، ھەر پێشمەرگە بوویە ب تنێ بەرگری ژ خاک و کەرامەتا کوردستانییان کری."

بارەگایێ بارزانی دیارکر، د دویماھییا گۆتارا خۆ دا سەرۆک بارزانی گۆت: "مە پشت ب خودێ و گەلێ خۆ گرێدایە، لەوما د چ ڕەوشەکێ دا و ل ژێر چ فشارەکێ دەستان ژ مافێن ڕەوای ێن گەلێ خۆ بەرنادەین."