گاڤ

سەرۆکوەزیر مەسروور بارزانی، د روینشتنەکێ دا ل گەل هژمارەکا گەنجان راگەهاند؛ قەرەکێ مەزن یێ حکومەتێ ل نک خەلکییە، لێ رەوشا خەلکی ل بەرچاڤ هاتییەوەرگرتن.

پێنجشەمبییێ 6ێ چریا دویێ یا 2025ێ، مەسروور بارزانی، سەرۆکوەزیرێ هەرێما کوردستانێ ل هەولێرێ روینشتنەک ل گەل هژمارەکا گەنجان گرێدا و خەلکی پرسیارێن جودا-جودا ئاراستەیی وی کرن.

مەسروور بارزانی دیارکر، "بەری نوکە داهاتەکێ مەزن ل هەرێما کوردستانێ هەبوو، حکومەتا فیدرال بێ کێشە داهاتێ هەرێمێ دهنارت، لێ پشتی سالا 2018ێ، سیاسەتا وان بەرامبەری هەرێمێ هاتەگوهۆرین، بودجە بڕی ب تایبەتی د وان چار سالان دا کو شەڕێ داعشێ هەیی ژ 2014 هەتا 2017 بودجە بۆ هەرێمێ نەدهات. لەوما حکومەتا هەرێمێ نەچار بوو وان کۆمپانییێن کو پەترۆل ژێ دکڕی قەران ژێ وەربگریت و ئەڤە بوویە قەر ل سەر مە و هەتا نوکە ئەو پرسە چارەنەبوویە."

مەسروور بارزانی گۆت: "د بەرنامێ مە دایە کو داخوازێ ژ کۆمپانییێن جیهانی بکەین بهێنە کوردستانێ و هەم گەنجێن مە زێدەتر شارەزا ببن، هەم ژی دەلیڤەیێن کاری بۆ وان دابین بکەن."

مەسروور بارزانی دازانین؛ "دو جۆرێن کارکرنێ ل کوردستانێ هەنە، ل کەرتێ گشتی و کەرتێ تایبەت. ژ سالا 2013ێ وەرە حکومەتا ئیراقێ رێک نەدایە خەلک ل هەرێما کوردستانێ ب رەنگەکێ هەردەمی ل کەرتێ گشتی بهێتەدامەزراندن، ئەڤە ژی ڕێگربوویە ل وێ چەندێ کو خەلک ل وی کەرتی کار بکەن، لێ د هەمان دەم دا ل کەرتێ تایبەت دشیاندایە دەلیڤەیێن کاری بۆ گەنجێن مە بهێنەدابینکرن."

مەسروور بارزانی ئاشکراکر؛ "هەتا نوکە 140 هزار دەلیڤەیێن کاری بۆ گەنجێن مە ل کەرتێ تایبەت هاتینەدابینکرن. مە پرۆژەیێن دی هەنە وەک پرۆژەیێ گەشەکرنێ، کو هاریکاریا گەنجێن مە دکەت دا کو ببنە خودان کارێ خۆ. ئەو پرۆژە بەردەوامە و ئەم هاریکارییا گەنجێن خۆ دکەین بۆ هندێ کو کارێ خۆ بەرفرەهتر بکەن."

مەسروور بارزانی ئەو ژی دیارکر؛ "دڤێت مە ژێرخانەیەکا دروست یا ئابۆری هەبیت. ئەگەر ئەو ژێرخانەیە دروست بوو، وی دەمی وەلاتی دشێن مفایی ژ خزمەتگۆزارییێن بەنکێ وەربگرن و ئەڤە ژی پشکەکا گرنگە بۆ دروستکرنا دەلیڤەیێن کاری بۆ گەنجان."

مەسروور بارزانی گۆت: "ژ لایەکێ دی ڤە، دروستکرنا دەلیڤا کاری ڤەدگەڕیتە سەر پرۆژەیێن حکومەتێ. ل کوردستانێ مە نەڤیایە ب تنێ گرنگییێ ب نەفت و گازێ بدەین، لێ مە گرنگی ب کەرتێ چاندنێ ژی دایە و مە ئابۆرێ خۆ هەمەجۆر کریە."

مەسروور بارزانی ئاشکراکر؛ "ئەو بەرنامەیێ مە دەستپێکری، ب تایبەتی د کەرتێ چاندنێ دا، وەلێ هات کو بەرهەمێ جۆتیارێن مە ل ناڤخۆ بهێتەفرۆتن. نە ب تنێ ئەڤە، بەلکو مە دەرگەهێ هناردەکرنا بەرهەمێن ناڤخۆیی بۆ دەرڤەی کوردستانێ ژی ڤەکریە. ئەڤێ چەندێ و کر کو خەلکەکێ مەزن بەرێ خۆ بدەتە چاندنێ  ب بەرهەمێن خۆ پێشڤەببەن و دەلیڤەیێن کاری ژی د وی کەرتی دا زێدەتر ببیت."

مەسروور بارزانی گۆت: "مە هاریکاریەکا مەزن یا کەرتێ گەشتوگۆزارێ کریە و ئەم هێشتا ل دەستپێکێینە و مە گەلەک بەرنامەیێن زێدەتر هەنە کو گرنگییێ ب هەمی کوردستانێ بدەین، چونکی هەر جهەکێ کوردستانێ تایبەتمەندییا خۆ هەیە."

مەسروور بارزانی تەکەزی ل سەر وێ چەندێ کر، "د کابینەیا بهێت دا دێ گرنگییەکا زێدەتر ب کەرتێ پیشەسازی دەین، بۆ هندێ کو گەنجێن مە یێن کو شارەزایی د وی کەرتی دا هەین بشێن کاری تێدا بکەن. ژ ئالییەکێ دی ڤە، دێ زانست و تەکنەلۆژیا پێشکەفتی یا وەلاتێن دی ئینینە کوردستانێ، و ئەڤە ژی بۆ دروستکرنا دەلیڤەیێن کاریە و خەلکێ مە دشێت مفایی ژێ وەربگریت."

مەسروور بارزانی ئاشکراکر؛ " حکومەتا فیدرالی مامەلەیەکا شاش ل گەل هەرێما کوردستانێ دکەت، چونکی د حکومەتا فیدرالی دا تشته‌ک  ب ناڤێ مووچەیی نینه‌، دڤێت بودجەیێ هەرێمێ ژ بودجەیا گشتی بهێتەتەرخانکرن، وی دەمی حکومەت و پەرلەمانێ کوردستانێ دێ ژ چاوانییا بکارئینانا بودجەیی ل هەرێمێ بەرپرس بن، لێ نوکە وەزارەتا دارایی یا ئیراقێ دەستوەردانێ د هەمی کارێن هەرێما کوردستانێ دا دکەت.