گۆتار
رێدار سەلیم حسێن
د رویدانەکا کێم وێنە و دیرۆکی، دا پشتەڤانێن یانەیا زاخۆ ژ ئالییێ فیفایێ ڤە ژبەر چالاکییا وان یا مروڤاتییێ یا وەرزێ بۆری ژبۆ ناسناڤێ باشترین پشتەڤان بۆ سالا 2025ێ د چارچووڤەیێ خەلاتێن the best هاتنە دەستنیشانکرن کو دێ خەلکێ کوردستانێ  هەڤرکییا دو وەلاتێن مینا ئسپانیا و ئەرجەنتینێ کەن بۆ بدەستڤەئینانا وی ناسناڤی ژبەرکو هەر دو هەڤرکێن زاخۆ ژ وان هەردوو وەلاتانە.
فیفایێ وەکە رێزگرتن بۆ  وێ چالاکییا مروڤاتی یا پشتەڤانێن  یانەیا زاخۆ  بۆ زارۆکێن هەلگرێن نەخۆشییا تەلاسیمیایێ ل دەما ژبەری یارییا یانەیا زاخۆ ل گەل یانەیا حدوود د چارچووڤەیێ خۆلا ستێرێن ئیراقی ل رێکەفتی 13-5-2025 ئەنجام دایی بۆ باشترین چالاکییا سالێ دەستنیشانکرن. ئەڤ یەکە ژی بۆ جهێ دلخۆشییا هەر کوردەکی ل هەر قولاچەکا ڤێ دونیایێ. 
پشتەڤانێن یانەیا زاخۆ ب ئەوێ چالاکییا خۆ یا مرۆڤاتی ب هاڤێتنا بویک و یاریێن زارۆکان بۆ ناڤا یاریگەهێ سەرنجا ئیراق، ئاسیا و هەمی جیهانێ بخۆ کیشا ژبەر کو ئەو یارییە ژبۆ دلخۆشکرنا وان زارۆکێن نەخۆش بوو کو ب رەنگەکێ رێکخستی ژ ئالییێ جهێن پەیوەندیدار ڤە لسەر زارۆکێن هەلگرێن وان نەخۆشییان ل کوردستانێ هاتنە بەلاڤکرن.
ئەڤێ رویدانێ یا بەربژارکرنا پشتەڤانێن یانەیا زاخۆ ل کوردستان و ئیراقێ ب رەنگەکێ بەرفرە پێشوازی لێ هاتەکرن و کەیفا هەمی کوردان ل هەر چار پارچەیان ئینا و هەر کەسەکی ژ ئالیێ خۆ ڤە پشتەڤانییا خۆ بۆ زاخۆ دیار کر ژبەرکو بۆ جارا ئێکێ یە یانەیەک ل کوردستان و ئیراقێ بۆ خەلاتەکێ هوسا یێ گرنگ ژ ئالییێ فیفایێ ڤە دهێتە دەستنیشانکرن. 
پشتەڤانێن زاخۆ ب گەرم وگۆرییا  ڤە ل هەمی یاری و هەلکەفتێن یانەیا خۆدا دیاردبن و ئەو چالاکییا وان ژی نامەیەک بۆ ژبۆ کو دڤیا وێ یەکێ بگەهینن کو پشتەڤانیکرن بتنێ هەوار و گازی و درویشم نینن بەلکو  گەلەک جاران دشێن پشتەڤانییێ ببەنە د چارچوڤەیێ خزمەتکرنا مرروڤاتییێ دا.
دەنگدان ل 6 چریا دوێ دەستپێکریە و بریارە تا 28 هەیڤێ بەردەوام بیت و ب دیتنا من ئەگەر پشتەڤانێن  هاتنە خەلاتکرن  ژبەرکو ب هەمی پیڤەران ڤە یا ژهەژی ڤی خەلاتی یە دێ بیتە پالدەرک نەب تەنێ پشتەڤانێن یانەیا زاخۆ بەلکو هەمی پشتەڤانێن یانەیێن کوردستانی و ئیراقی کو چالاکیێن ب ئەوی رەنگی دەستپێبکەن یاکو پشتەڤانێن زاخۆ پێ هاتینە دەستنیشانکرن.
ل دویماهییێ من دڤێت بێژم، هەلبژارتنا پشتەڤانێن یانەیا زاخۆ بۆ ڤی خەلاتی ژ ئالییێ فیفایێ ڤە ژ ڤالاهییەکێ نەهات بەلکو  رەنج، خەبات و دلسۆزییا بەردەوام یا پشتەڤانێن وێ یانێ بوو هەروسا دشێم بێژم وەرزشا کوردستانێ ب هەر چار یانەیێن خۆ ڤە بوویە جهێ دانەنیاسینا تەپاپێ یا ئیراقێ بۆ کەنداڤ، ئاسیا و جیهانێ ژی.
هەلبەت هەلبژارتنا پشتەڤانێن  زاخۆ ژی رویدانەکا بچویک نینە ژبەرکو دێ ناڤێ کوردستانێ ئینیتە سەر زمانێ ب ملیۆنان خەلکێ ڤێ دنیایێ.