گاڤ

جڤاتا ئاسایشا هەرێما کوردستانێ دانپێدانانا تۆمەتبارەکی پەیوەندیدار ب ئالۆزیێن گوندێ لاجان ل هەولێرێ بەلاڤکر و دبێژیت: ئالیێن ناڤخۆیی و دەرەکی دەست ل گەل هەبوویە و ڤیایە "پەقینان ل سنۆرێ هەولێر و دهۆکێ بکەن."

پێنجشەمبییێ 4ێ کانوونا ئێکێ یا 2025ێ، جڤاتا ئاسایشا هەرێما کوردستانێ هویرکاتییێن تۆڕەکا تێکدەر ئاشکراکر کو ژ ئالییێ دەستێن دەرەکی و ناڤخۆیی ڤە هاتینە لڤاندن دا کو زەمینەیێ بۆ هاتنا ناڤا میلیشیایان خۆش بکەن.

ل دویڤ ئەنجامێن ڤەکۆلینێن چڕ یێن جڤاتا ئاسایشا هەرێما کوردستانێ، ئەو ئالۆزییێن ڤێ دویماهییێ یێن گوندێ لاجان یا سەر ب قەزا خەبات ڤە ل هەولێرا پایتەخت، تنێ رویدانەکا ئاسایی نەبوون، بەلکو دەستپێکا بجهئینانا نەخشەیەکێ بەروەخت بوون.

ل گۆرەیی راگەهاندنا جڤاتا ئاسایشا هەرێما کوردستانێ کو ئەڤرۆ دەزگەهێن ئەمنی گەهشتینە وی ئەنجامی؛ دەستەکێ تێکهەل ژ ئالییێن ناڤخۆیی و دەرەکی پلانێن زنجیرەیەکا هێرشان بجهئیناینە کو دیارترینێ وان لێدانا کێلگەها غازا کۆرمۆرێ بوو بۆ بڕینا کارەبا هەرێمێ، د دویڤ دا هێرشکرنە سەر پالاوتگەهێن پەترۆلێ و وێستگەهێن کارەبێ و کرنا پەقینان ل هەردو پارێزگەهێن هەولێر و دهۆکێ.

پشکەکا دی یا پیلانێ، وەک د ڤەکۆلینان دا دیاربوویی، شەرەکێ دەروونی و میدیایی بوویە. پلان ب وی ڕەنگی بوویە کو ب رێیا میدیایا ئالییەکێ ئۆپۆزسیۆن و میدیایێن دەرەکی خەلکی بۆ خۆپیشاندان و توندوتیژییێ هانبدەن، پاشی د ناڤ خۆپیشاندانان دا تەقە بهێتە کرن هەتا هێزێن ئەمنی نەچاری بەرسڤدانێ بن و خەلک بهێتە کوشتن. ئارمانجا دویماهییێ یا ڤێ سیناریۆیا خویناوی ئەوبوو کو کوشتنا وەلاتییان ببیتە بەهانە و بانگەشە دا کو داخوازا دەستێوەردانێ ژ گرۆپێن میلیشیایان بۆ هێرشکرنا سەر هەرێما کوردستانێ بهێتە کرن.

جڤاتا ئاسایشێ راگەهاند؛ بەروەخت هایداری هویرکاتییێن پیلانێ بوون و شیاینە د دەمەکێ گونجایی دا ڕێگرییێ لێ بکەن. د ئۆپەراسیۆنێ دا هژمارەیەک ژ وان تێکدەران هاتینە دەستەسەرکرن یێن کو فەرمان ژ ئالییێن دەرەکی و میلیشیایان وەرگرتین و دانپێدان ب وێ چەندێ کرینە کو ئارمانجا وان تێکدانا سەقامگیرییا هەرێمێ بوویە، و نوکە روییبروی دادگەهێ کرینە.

گرنگیا پویچکرنا ڤێ پیلانێ د وێ چەندێ دایە کو د هەمان دەم دایە دگەل هشیاریێن ئەمریکا و هەڤپەیمانان دەربارەی لڤینێن ئالیێن خرابکار ل دەڤەرێ.

کێلگەها کۆرمۆرێ کو ژێدەرێ سەرەکی یێ بەرهەمئینانا غاز و کارەبێ یە، بەری نوکە ژی چەندین جاران ب درۆن و مۆشەکان هاتییە ئارمانجکرن، لێ ئەڤە ئێکەم جارە پیلان ب ڤی رەنگێ بەرفرەهـ بیت کو تێکهەلەیەک بیت ژ هێرشا سەربازی بۆ سەر ژێرخانەیێ و هاندانا جاددەیێ بۆ دروستکرنا ئالۆزییان، وەک وێ چەندێ کو د ستراتیژیا شەرێ هایبرید (جەنگێ تێکهەل) دا دهێتە بکارئینان بۆ ئێخستنا قەوارەیان ژ ناڤخۆ ڤە.