گاڤ

حکومەتا هەرێما کوردستانێ رۆهنکرنەک ل دۆر سەرەدانا سەرۆک بارزانی بۆ جزیرێ بەلاڤکر و راگەهاند؛ خواندنێن جودا و دویر ژ مەبەستێ هاتنە هەبوونێ و دلگرانی د دویڤ خۆ دا ئینان.

پێنجشەمبییێ 4ێ کانوونا ئێکێ یا 2025ێ، حکومەتا هەرێما کوردستانێ د بەیانەکێ دا راگەهاند؛ سەرەدانا دیرۆکی یا سەرۆک بارزانی بۆ پارێزگەها شرناخ و دەڤەرا جزیرێ و پشکداریکرنا وی د سەمپوزیۆما مەلایێ جزیری دا و نیشاندانا پشتەڤانییا خۆ بۆ پرۆسەیا ئاشتییێ و ئەو پێشوازیسا گەرم یا کو ژ ئالسیێ دام و دەزگەهێن فەرمی یێن حکومەتێ و خەلکێ دەڤەرێ ل وی هاتییە کرن، جهێ سوپاسییێیە.

حکومەتا هەرێما کوردستانێ گۆت: د دویڤدا شرۆڤە و خواندنێن جودا و نەخوازراو و دویر ژ مەبەستێ هاتنە هەبوونێ، کو دلگرانی د دویڤ خۆ دا ئینان. یا گرنگ ئەوە کو سەردەمەکێ هەرەباش د پەیوەندییێن دناڤبەرا کۆمارا تورکیا و هەرێما کوردستانێ دا هەیە.

حکومەتا هەرێما کوردستانێ هەروەسان ئاشکراکر، پرۆسەیا ئاشتییێ ژی گاڤەکا دروستە د چارەکرنا پرسەکا گرنگ و هەستیار دا و دەستخۆشییێ ل حکومەت و حزبێن دەستهەلاتدار یێن تورکیا و هەمی ئالییان دکەین یێن کو رۆلەکێ کاریگەر د پێشڤەبرنا ئاشتی و سەقامگیرییێ دا ل تورکیا و دەڤەرێ هەبوویی.

حکومەتا هەرێما کوردستانێ ئەو ژی گۆت: ب پێدڤی دزانین ئەم هەمی ئالی ب هەڤکارییا ئێکدو، بزاڤان بۆ رەڤاندنا دلگرانییان بکەین و تەکەزێ ل کویرکرنا پەیوەندییان، بجهئینانا ئاشتەواییێ، پاراستنا بەرژەوەندییێن خۆ یێن هەڤپشک و سەقامگیرییا دەڤەرێ بکەین.

رۆژا 29-11-2025، سەرۆک مەسعوود بارزانی پشکداری د چارەمین سەمپۆزیۆما ناڤدەولەتی یا مەلایێ جزیری دا ل باژێرێ جزیرێ سەر ب پارێزگەها شرنەخا باکورێ کوردستانێ کر. وێ سەرەدانا سەرۆک بارزانی کاردانەڤەیێن مەزن ل دویڤ خۆ ئینان.

ئێک ژ وان کەسێن رەخنە ل زیرەڤانێن سەرۆک بارزانی گرتی کو ئەو ژی هێزا دژە تیرۆرا هەرێما کوردستانێ ب ئالایێ کوردستانێ ڤە چوو ناڤا جزیرا بۆتان، باخچەلی بوو. دەولەت باخچەلی راگەهاند؛ "دەولەتا مە خودانا دەستهەلات و شیان و شارەزاییا پێدڤییە بۆ پاراستنا هەر سەرەدانکەرەکی."

ژ ئالییەکێ دی ڤە، سێشەمبییێ 2ێ کانوونا ئێکێ یا 2025ێ، بارەگەهێ بارزانی راگەهاند؛ "ب مخابنی ڤە دەولەت باخچەلی ل دۆر سەرەدانا سەرۆک بارزانی بۆ جزیرێ جارەکا دی ل سەر بنەمایێ عەقلیەتا شۆڤینی ئاخڤتییە و لێدوانەکا دویر ژ هەمی عورفان دا یە و خزمەتا چو ئالییەکی ناکەت."

بارەگەهێ بارزانی گۆتبوو: "مە هزر دکر کو خودێ دەولەت باخچەلی ب هیدایەت ئینایە و دەست ژ رەگەزپەرستی و شۆڤینییەتێ بەردایە، لێ دیارە کو هێشتا گورگێ گەور یێ جارانە و نوکە د پیستێ میهێ دا یە."