گاڤ

د کۆمبوونا ئەڤرۆ یا حکومەتا ئەلمانیا دا، بریار هاتەدان ئەرکێ سوپایێ وی وەلاتی ل هەرێما کوردستانێ و ئیراقێ بهێتە درێژکرن.

چارشەمبییێ 10ێ کانوونا ئێکێ یا 2025ێ، د کۆمبوونا کابینەیا حکومەتا ئەلمانیا دا بریار ل دۆر درێژکرنا مانەڤەیا سەرباز و شیرەتکارێن سوپایێ وی وەلاتی ل هەرێما کوردستانێ و ئیراقێ هاتە دان.

پەیڤدارەکێ وەزارەتا بەرەگرییێ یا ئەلمانیا راگەهاند؛ "دێ ئەرکێ سوپایی هەتا 31-01-2027 هێتە درێژکرن و چ گوهۆرین د هژمارا سەرباز، شیرەتکار و ئەرکان دا ناهێتە کرن".

ئەڤ بریارا حکومەتا ئەلمانیا، پێدڤی ب پەسەندکرنێ ژ ئالییێ پەرلەمانێ فیدرالی ڤە هەیە.

سوپایێ ئەلمانیا دو ئەرکێن سەرەکی ل هەرێما کوردستانێ و ئیراقێ هەنە

ئێک: رویبرویبوونا داعشێ

دو: دروسترکرنا شیانان - ئیراق

سوپایێ ئەلمانیا ژ سالا 2015ێ وەرە د هەڤپەیمانپیا ناڤدەولەتی یا دژی داعش دا پشکدارە. ژبلی وێ چەندێ پشکدارە د ئەرکێ ناتۆیێ دا ل ئیراقێ (NATO Mission Iraq - NMI)، کو شیانان بۆ هێزێن ئەمنی و چەکدار یێن ئیراقێ دروست دکەت. درێژکرنا مانەڤا سوپایێ ئەلمانیا هەردو ئەرکان بخۆڤەدگریت.

ئەڤ کارێن سەرەکی سوپایێ ئەلمانیا ل هەرێما کوردستانێ و ئیراقێ دکەت:

● دانا سۆتەمەینیێ ژ ئاسمانی

● ڤەگوهاستنا ئەسمانی بۆ رێکخراوێن ناڤدەولەتی، هەڤپەیمانان و هەڤپشکان

● چاڤدێرییا هاتنوچوونا ئەسمانی و دەریایی د چارچۆڤەیێ ئەرکێ ناتۆیێ دا

● پشتەڤانییا شیرەتکارییێ بۆ هەڤپشکێن ناڤدەولەتی د چارچۆڤەیێ دروسترکرنا شیانان دا

● بجهئینانا ئەرکێن شیرەتکاری و هەماهەنگییێ ل ئیراقێ

● دروستکرنا شیانان بۆ هێزێن ئەمنی و شەرکەر یێن ئیراقێ

● بجهئینانا ئەرکێن خزمەتگۆزارییێن ساخلەمییێ

ئەڤ ئەرکێ سوپایێ ئەلمانیا دشیاندایە هەتا 500 سەرباز و شیرەتکاران بخۆڤەبگریت و هەتا د دەمێ لهەڤگوهارتنێ دا، دشیاندایە ژمارە زێدەتر ژی ببیت.