ل زاخۆ.. کەسەکی 3 پهزكویڤى كوشتن و هاته گرتن
گاڤ – تایبەت
ل سنۆرێ قەزا باتیفا سهرپێچكارهكى 3 پهزكویڤى كوشتینه و ژ ئالییێ هێزەکا پێشمهرگەیی یا زێرهڤانێن سنۆرى ڤە هاتییه گرتن و نوکە ل ژێر لێکۆلینێیە.
چارشەمبییێ 10ێ کانوونا ئێکێ یا 2025ێ، رائید عەلی یووسف ئەفسەرێ بنگەهێ پۆلیسێن دارستان و ژینگەها قەزا باتیفا د لێدوانەکێ دا بۆ گاڤ راگەهاند؛ دوهی رۆژا سێشەمبییێ ل دەمژمێر 03:00 ئێڤاری، هاتینە ئاگەهدارکرن کو کەسەک ب ناڤێ (ب، ح، ش) تاوانەک کریە و رابوویە ب کوشتنا 3 پەزکویڤییان و پاشی ڤەکوشتییە و قەد-قەد کرییە و کرییە د سندۆقێن مێشێن هنگڤینی دا و خواستبوو بئینیتە سەنتەرێ قەزا باتیفا.
ل دۆر چاوانییا گرتنی وی تۆمەتباری رائید عەلی گۆت: تۆمەتبار ژ ئالییێ زالگەهێن پۆلیسێن پاراستنا سنۆری ڤە هاتییە گرتن و پاشی ئەو و ل گەل هەمی کەلوپەلێن وی رادەستی هێزەکا پێشمەرگەیی [لیوا 45 یا پیشمهرگهیی، هێزا دهۆک یا پێشمهرگهیێ پاراستنا ژینگههێ یا پێشتر] کریە.
رائید عەلی هەروەسان ئاشکرارکر؛ ب بڕیارا دادوەرێ ڤەکۆلینێ ل قەزا باتیفا تۆمەتبار ل گۆرەیی بەندێ 42 ژ یاسایا پاراستن و چاککرنا ژینگەها هەرێما کوردستانێ، ل زیندانا زاخۆ هاتییە راگرتن و ل ژێر ڤەکۆلینێیە.
ل دۆر چاوانییا سزادانا وی کەسی، ئەفسەرێ بنگەهێ پۆلیسێن دارستان و ژینگەها قەزا باتیفا بۆ گاڤ دازانین؛ ل گۆرەیی رێنماییێن سالا 2023ێ دەرکەفتین، هەر کەسەکێ گیانەوەرێن کویڤی بکوژیت دێ ب کۆژمەکێ پارەیی و زیندانکرنێ هێتە سزادان، بۆ نموونە سزایێ وی کەسی یێ پەزکویڤییەکی بکوژیت دگەهیتە 10 ملیۆن دیناران، هەروەسان بۆ پلنگی دگەهیتە 20 ملیۆن دیناران، هەروەسان بۆ زیندانکرنێ ژی؛ ژ هەیڤەکێ کێمتر ناهێتە سزادان.
GAV