گاڤ

پەیمانگەها نەتەوەیی بۆ ڤەکۆلینێن فەلەکی ل مسرێ د راپۆرتەکێ دا ئاماژە ب وێ یەکێ کر، رۆژا سێشەمبییێ 20ێ کانوونا دویێ 2026 ئێکەم رۆژا هەیڤا شەعبانێیە، هەروەسان رۆژا پێنجشەمبییێ 19ێ شوباتا 2026، ئێکەم رۆژا هەیڤا رەمەزانا پیرۆزە.

ئەڤڕۆ پێنجشەمبییێ 25ێ کانوونا ئێکێ 2025ێ، پەیمانگەها نەتەوەیی بۆ ڤەکۆلینێن فەلەکی ل مسرێ، د راپۆرتەکا زانستی دا زانیارییێن دروست یێن هژمارکرنێن فەلەکی بۆ دیارکرنا دەستپێکا هەیڤێن شەعبان و رەمەزانا سالا 1447ێ کۆچی (2026ێ زایینی) بەلاڤکرن.

ل دویڤ داتایێن بەلاڤکری، ڕۆژا دوشەمبییێ 19ێ کانوونا دویێ 2026 دێ بیتە تەمامکەرا هەیڤا رەجەبێ و رۆژا سێشەمبییێ 20ێ کانوونا دویێ 2026، ل دویڤ پیڤەرێن فەلەکی وەک ئێکەم رۆژا هەیڤا شەعبانا سالا 1447ێ کۆچی هاتییە دیارکرن.

ل دۆر هەیڤا رەمەزانا پیرۆز، پەیمانگەهێ ئاماژە ب وێ یەکێ کر، کو دویماهییا هەیڤا شەعبانێ دکەڤیتە رۆژا چارشەمبییێ 18ێ شوباتا 2026. ب ڤێ یەکێ رۆژا پێنجشەمبییێ 19ێ شوباتا 2026، دێ بیتە ئێکەم رۆژا هەیڤا رەمەزانێ.

تایبەتمەندییا رەمەزانا سالا 2026 د وێ یەکێ دایە کو ل گەل دویماهیهاتنا وەرزێ زڤستانێ و دەستپێکا وەرزێ بهارێیە. ئەڤ چەندە ژی دێ کارتێکرنێ ل دەمژمێرێن رۆژیگرتنێ کەت ب ڤی رەنگی:

ناڤنجییا دەمژمێرێن رۆژیگرتنێ دێ ناڤنجی بیت (دناڤبەرا 12 بۆ 13 دەمژمێران دا).

ل رۆژا ئێکێ هەیاما رۆژیگرتنێ دێ نێزیکی 12 دەمژمێر و 40 خۆلەکان بیت.

ب هەڤەبەری ل گەل وان سالێن کو رەمەزان دکەفتە د وەرزێ هاڤینێ دا، ئەڤ سالە دێ هەیاما وێ کورتتر و سەقا وێ گونجاییتر بیت.

دەمێ جەژنا رەمەزانێ

ل دویڤ هەمان پێشبینیێن فەلەکی، هەیڤا رەمەزانا 1447ێ کۆچی بەرامبەری 2026ێ زایینی دێ 30 رۆژان تەمام کەت و رۆژا دویماهییێ دکەڤیتە 19ێ ئادارێ، ب ڤێ یەکێ رۆژا ئەیینیێ 20ێ ئادارا 2026، وەک ئێکەم رۆژا جەژنا رەمەزانێ هاتییە دیارکرن.

ل دویماهییا ڕاپۆرتێ پەیمانگەها نەتەوەیی بۆ ڤەکۆلینێن فەلەکی دوپاتکریبە، کو ئەو پشتا خۆ ب دروستترین پیڤەرێن زانستی گرێددەن ، لێ بڕیارا دویماهییێ و ئێکلاکەر بۆ دیارکرنا هەلکەفتێن ئایینی، بۆ دیتنا هەیڤێ و راگەهاندنا فەرمی یا ئالییێن ئایینی یێن پەیوەندیدار ل وەلاتێن ئیسلامی ڤەدگەڕیت.