گاڤ

ژ دۆرگەهێن دویر یێن زەریایا هێمن هەتا دگەهیتە گۆرەپانێن قەرەبالغ یێن ئەمریکا، جیهان بۆ هەیاما 26 دەمژمێران د رەوشا ئاهەنگگێرانێ دا دمینیت. پێشوازیکرن ل سالا نوى ژ وەلاتەکێ بۆ وەلاتەکێ دی دهێتە گوهۆرین.

ل گەل لێدانا زەنگلێن نیڤا شەڤێ، گۆیا ئەردی دەست ب گەشتەکا دەمکی یا نایاب دکەت، ئەڤ گەشتە کو نێزیکی 26 دەمژمێران ڤەدکێشیت، ملیارەها مرۆڤان ل سەرانسەری جیهانێ کۆم دکەت بۆ پێشوازیکرنا سالەکا نوى، لێ ب دەم و گاڤێن جودا. ل گۆرەیی جوداهییا ناوچەیێن دەمی، وەلات ئێک ل دویڤ ئێکی مالئاڤاهییێ ل سالا 2025 دکەن و دەرگەهان بۆ سالا نوى ڤەدکەن.

رێزبەندیا دەمێ هاتنا سالا نوى بۆ وەلاتێن جیهانێ:

کیریباتی؛ ئێکەم تیشکا سالا نوى

ل گۆرەیی سیستەمێ دەمێ جیهانی، دۆرگەهێن "لاین" یێن سەر ب کۆمارا کیریباتی ڤە، ب تایبەتی دۆرگەها "کیریتیماتسی" (کو ب دۆرگەها کریسمس دهێتە نیاسین)، پێشەنگا وان ناوچەیێن ئاڤادانە کو پێیێ خۆ دهاڤێنە د سالا نوى دا. ئەڤ دۆرگەهە کو دکەڤنە ناوچەیا دەمی یا (UTC+14)، هەرچەندە ئاهەنگێن وان هێمن و سیمبۆلیکن، لێ وەک "ئێکەم راوەستگەها دەمی" ل جیهانێ، جهێ سەرنجا میدیایێن جیهانی نە.

نیوزلەندا؛ ئاهەنگا قەرەبالغ و دەنگبلندی ل ئۆکلاندێ

ئێکسەر پشتی کیریباتی، نیوزلەندا دبیتە دویەم راوەستگەهـ، ب رەنگەکی کو ده‌ستپێكێ دۆرگەهێن "چاتام" و پاشی باژێرێ ئۆکلاند ب نیشاندانەکا نایاب یا یارییێن ئاگری ژ بۆرجێ "سکای تاوەر" ڤە ئەسمانێ باشوورێ ئەردی رۆهن دکەن.

ئۆسترالیا؛ سیدنی ل پێشییە

ئۆسترالیا، کیشوەرەکە کو هەردەم د رێزبەندییا وەلاتێن مەزن دا یە بۆ پێشوازیکرنا ل سالا نوى. بەندەرێ سیدنی و باژێرێ مێلبۆرن ب ئێک ژ مەزنترین و ب ناڤ و دەنگترین نیشاندانێن ئاگری یێن جیهانێ دهێنە نیاسین، کو سالانە ملیۆنان بینەر ب رێیا شاشەیان تەماشە دکەن.

رۆژهەلاتێ ئاسیا: ژاپۆن و کۆریا باشوور

دەمێ کاروانێ سالا نوى دگەهیتە رۆژهەلاتا ئاسیا، شێوازێ ئاهەنگان رەنگەکێ رۆحی و کلتووری وەردگریت. ل ژاپۆن و کۆریا باشوور، لێدانا زەنگلێن پەرستگەهێن بوودی (108 جاران ل ژاپۆنێ) دبیتە سیمبۆلا پاقژبوونێ ژ گونەهان و دەستپێکەکا نوى.

باشوورێ ئاسیا و باشوورێ رۆژهەلاتا کیشوەرى

ژ ئالییەکێ دی ڤە، باشوورێ رۆژهەلاتێ ئاسیا (چین، سەنگاپوورە، تایلەند و ئیندۆنیزیا) و باشوورێ ئاسیا (هندستان، پاکستان و بەنگلادیش)، تێکهەلەیەک ژ ئاهەنگێن جەماوەری یێن مۆدێرن و کۆمبوونێن خێزانی ساز دکەن، کو تێدا رۆناهی و مۆزیک رۆلێ سەرەکی دگێرن.

رۆژهەلاتا ناڤین؛ دناڤبەرا ئاهەنگگێران و هێمنییێ دا

وەلاتێن رۆژهەلاتا ناڤین ئێک ل دویڤ ئێک دچنە د سالا نوى دا، وەک شاهنشینێن ئێکگرتی یێن عەرەبی (ئیمارات) کو ب نیشاندانا یارییێن ئاگری یێن بۆرج خەلیفە ل دۆبەیی ب ناڤ و دەنگە، د دەمەکی دا کو ئاهەنگ ل وەلاتێن دی پتر ب رەنگەکێ هێمن یان خێزانی هەیە، ل گەل جوداهییا دابونەریتان.

ئەورۆپا؛ شەڤەکا درێژ و قەرەبالغ

ئەورۆپا درەنگتر پێشوازییێ ل سالا نوى دکەت و باژێرێن وەک پاریس، بەرلین، لەندەن و رۆما وەک ناڤەندێن سەرەکی یێن ئاهەنگان دەردکەڤن، کو تێدا گۆرەپانێن گشتی ژ هزاران کەسان تژی دبن و ئاهەنگ و نیشاندانێن مۆزیکێ هەتا سپێدێ بەردەوام دبن.

هەردو ئەمریکا؛ ئاهەنگگێران هەتا سپێدێ

ل ئەمریکا باشوور، وەلاتێن وەک بەرازیل و ئەرجەنتین ل سەر کەناران و گۆرەپانان ئاهەنگان دگێرن، ل باکور ژی، ویلایەتێن ئێکگرتی یێن ئەمریکا و کەنەدا ب تایبەتی ل گۆرەپانا "تایمز سکوێر" ل نیویۆرک، ب هاتناخوار یا گۆیا کریستالی، گەرمترین چرکەیێن سالا نوى تۆمار دکەن.

دویماهی جهێ پێشوازییێ ل سالا نوى دکەت

ساموایا ئەمریکی ب ئێک ژ دویماهی ناوچەیا ئاڤادان دهێتە هژمارتن کو دچیتە د سالا نوى دا، بەری کو پەردە ل سەر دەمی بهێتە دانان ل دۆرگەهێن "بەیکەر" و "هاولاند"، کو سەر ب ویلایەتێن ئێکگرتی یێن ئەمریکا نە و ب دویماهیک خال ل سەر رۆیێ ئەردی دهێنە هژمارتن کو پیا خۆ دئیننە د سالا نوى دا.

سەرێ سالا نوى

سەرێ سالا نوى یا زایینی ئانکو ئێکەم رۆژا سالێ ل گۆرەیی رۆژژمێرا گریگۆری، کو دکەڤیتە 1ـێ کانوونا دویێ یا هەمی سالەکێ.

ئەڤ رۆژە وەک هەلکەفتەکا جیهانی بۆ ئاهەنگگێرانێ ب هەلکەفتا مالئاڤاهییێ ل سالا بۆری و دەستپێکرنا سالەکا نوى هاتییە دیارکرن.