د گێژەڤانکا دێرینی و سەردەمییێ دا
بەلاڤ بکە
دلدار محەمەد
ئێڤارەکێ کو پرتووکا دیرۆکا گوندەکی دهاتە ئیمزاکرن بەحس بەحسێ دێرینییێ بوو سیتافکەک هاتە بەر گوهێ من و گۆت: ئەرێ ئەم کینه و مە دڤێت کیڤه بچین؟ ئەوا ژ مە دهێتەخواستن پاراستنا دوهییە یا غاردانە بەرەڤ سوبەهی؟
ئەرێ شالۆک و تەفرک، مەر و مەربێلێن باپیرێ من دێ من ب (ئەی ئایا- AI) ڕاگەهینن؟
ئەز ڤەگەریامە مال من د تەلەفزیۆنێ دا دیت، وەلاتییێن گوندەکی ب جۆتیار، نڤیسەر، هونەرمەند، رویسپی و گەنجێن خۆ ڤه چووینە سەیرانا گوندییێن خۆ، دیسان ئەز ژ خۆ پرسیم، ئەم کینە و ئەم چو د پارێزین، ئەرێ پاراستن رامانا ڤەمانێ ددەت؟
ما وەلاتەکێ وەک ژاپونێ گرنگی بۆ کلتوورێ خۆ نینه، پا بۆچی بوویە وەلاتەک یان هەما بێژە کیشوەرەکێ جودا؟
هندەک جاران مرۆڤی دڤێت و نەڤێت پرسیارەک د مرۆڤی دا سەرهلددەت، ئەرێ ئاڤریدان ل دوهی رامانا مانێ ل دوهی ددەت؟
هەکو ئەڤ پرسیارە بەژنا خۆ کێل دکەت، گرنگییا پاراستنێ دبێژیت ئەز سەرێ ژووری مە، لێ مانا ل جهێ خۆ ب هێجەتا پاراستنێ نیسکێن وێ ل گەل ڤی دەمی ئنیەتا گونجانێ نینە.
ب دیتنەکا سادە و ساکار دبێژین: دیرۆک و مانا وێ د قالبێ پاراستنێ بتنێ دا ئانکو دەربازی توخویبێ داغبارییێ نەبیت، دێ مە فێری هندێ کەت، د ئەڤرۆ دا بژین دوهی وەک ناسنامە بهێلین، لێ ئەو ناسنامە دەستێن مە قەید نەکەت.
هندەک جاران هەتا نوییاتی ئاڤا دبیت گرنگە کو دێرینی ب هەلبوەشیت لێ مرۆڤ دترسیت ئەو هەلوەشیان مرۆڤی دناڤ هەرفتەیێ خۆ دا ڤەمایی بهێلیت، لێ هەمجا دەنگەک د مرۆڤی دا دبێژیت: ئەڤە شانازییا وان بوو، تە ژی تشتەک کرییە نەڤییێن تە پێ شاناز بن؟
ل وی دەمی مرۆڤ ڤەدجنقیت و دبێژیت: دڤێت شانازییا من یا دوهی من ژ کوڕینییا ئەڤرۆ و پەیداکرنا شانازییێن سوبەهی ڤەدەر و بێ-بها نەکەت، ما شانازییا دەستێن مە دادهێلیت تێرا هندێ هەیە کو پاشەرۆژ ب هزرێن مە یێن ئەڤرۆ ب گاڤێن مە یێن سوبەهی ئاڤا ببیت؟
نزایەک د مرۆڤی دا شوین دبیت و دیسان ژ خۆ د پرسیت، ئەرێ من هند خۆ د تەکنەلۆژیایێ دا مەلەڤان کرییە کو سوبەهی مۆزەخانە ژ شوینتبلێن من تژی ببیت؟!
گێژەڤانکەکە بەرێ مرۆڤی جار ددەتە بێ ناسنامەبیێ جار ژی تەمبەلی و بێ-بەرهەمییێ.
هندەک جاران مرۆڤ هزردکەت ڤی دەمی پێدڤیاتی، مرۆڤێ ڤی سەردەمی د هاژۆن ئانکو بەرژەوەندی وی سواری دەواران ژی دکەت و وی دکەتە شۆفێرێ ترومبێلەکا نوترین مۆدێل، دبیت هەر ئەڤە بیت کو وی هەردو ژدەستداین ئانکو نە کورتانەکی چێ دکەت و نە ژی ترومبێلەکا مۆدێلێ نوی و ب مشەخۆرییێ قایل دبیت.
