گاڤ

81 کەسان خۆ بۆ پۆستێ سەرۆککۆمارێ ئیراقێ بەربژار کرینە کو 4 ژ وان ژنـن، و پشتی هویربینییا د دۆسیەیێن وان دا، دێ ناڤ ب فەرمی هێنە راگەهاندن. سەفوان گەرگەری، ئەمیندارێ جڤاتا نوینەرێن ئیراقێ راگەهاند، 81 کەسان ناڤێن خۆ بۆ پۆستێ سەرۆککۆمارێ ئیراقێ تۆمارکرینە و لژنەیا پەیوەندیدار نۆکە یا مژویلی هویربینییێ یە. هەروەسا ئاماژە دا وێ چەندێ ژی کو د ناڤا وان کەسان دا یێن خۆ تۆمارکرین، 4 ژن هەنە.

رۆژا 30ێ کانوونا ئێکێ یا 2025ێ، سەرۆکاتییا جڤاتا نوینەران دەرگەهێ خۆتۆمارکرنێ بۆ پۆستێ سەرۆککۆماری بۆ دەما 3 رۆژان ڤەکر و ل دەمژمێر 3ی ئێڤاری دەرگەهـ هاتەگرتن. ل گۆرەی دەستووری، پێدڤیە د دەما 30 رۆژان ژ جڤینا ئێکێ یا جڤاتا نوینەران، سەرۆککۆمارێ نوی بهێتە هەلبژارتن.

پشتی هەلبژارتنا وی، سەرۆککۆمار دێ د دەما 15 رۆژان دا بەربژارێ مەزنترین فراکسیۆنا پەرلەمانی بۆ پۆستێ سەرۆکوەزیران راسپێریت. پشتی دەستنیشانکرنا وی ژی، دێ 30 رۆژ ل بەر سەرۆکوەزیرێ راسپاردی هەبن دا کو کابینەیا حکومەتێ پێکبئینیت.