گاڤ

نوینەرێ تایبەت یێ ئەمریکا بۆ سووریێ دیارکر، پێشوازییێ ل وێ ئاگربەستا دەمکی دکەن یا کو ژ ئالییێ حکومەتا سووریێ ڤە هاتییە راگەهاندن و دێ کار بۆ درێژکرنا وێ کەن.

ئەینییێ 9ێ کانوونا دویێ 2026ێ، تۆم باراک، نوینەرێ تایبەت یێ ئەمریکا بۆ کاروبارێن سووریێ ل ئێکس (X) بەلاڤکر، "ویلایەتێن ئێکگرتی ب گەرمی پێشوازییێ ل وێ ئاگربەستا دەمکی دکەت یا کو شەڤا بۆری ل تاخێن ئەشرەفیە و شێخ مەقسوود یێن حەلەبێ هاتییە راگەهاندن". هەروەسان دبێژیت، وەلاتێ وی "سوپاسییێن خۆ یێن کویر ئاراستەیی هەمی ئالییان دکەت، حکومەتا سووریێ، هێزێن سووریا دیموکرات، دەستهەلاتێن خۆجهی و کەساتییێن جڤاکی بۆ وێ خۆراگری و نیازپاقژییێ کو بوویە ئەگەر ئەڤ راگرتنا گرنگ چێببیت".

شەڤا بۆری، وەزارەتا بەرگرییا یا سووریێ بەلاڤکر، ژ دەمژمێر 3ی سپێدێ هەتا 9ی سپێدێ ئاگربەستە و رێ ب دەرکەفتنا هێزێن ئاسایشا ناڤخۆ ژ تاخێن ئەشرەفیە و شێخ مەقسوود ددەن.

باراکی هەروەسان گۆت: "ئەم ب چڕی کار بۆ درێژکرنا ڤێ ئاگربەستێ و ڤی گیانێ لێکتێگەهشتنێ بۆ پشتی دەمێ دەمژمێر 9ی سپێدەهییا ئەڤرۆ دکەین." ئاماژە ب وێ یەکێ ژی کر، "ب هەماهەنگییەکا بەردەوام و ب فەزلا خودایێ ئێکانه کو هەمی پێکهاتێن مە هەرئێک ب ڕەنگێ خۆ ڕێزێ لێ دگریت، ئەم هیڤیدارین ئەڤ دویماهییا حەفتییێ ئارامیەکا بەردەوامتر و دیالۆگەکا کویرتر ب خۆڤە ببینیت".

ل دویماهییا نڤیسینا خۆ، باراکی ئاشکراکر، "د دەمێن تەنگاڤییێ دا، گەلەک جاران رۆهنی و تێگەهشتنەکا نوی سەر هەلددەت. ئەڤ ئاگربەستە دەستپێکا کارەکێ گرنگە بۆ ئاراستەکرنا ئاراستەیێن جودا-جودا یێن سووریێ بۆ سەر ئێک رێیا هەڤپشک بەرەڤ ئاسایش، گشتگیری و ئاشتییەکا بەردەوام. رەنگە ئاستەنگ بهێنە پێش، لێ ئارمانجا مە یا هەڤپشک ب رۆهنی هەماهەنگییێ ل شوینا رویبرویبوونێ پەسەند دکەت".

ئەڤە د دەمەکی دا یە، سێشەمبییا بۆری، هێزێن سوپایێ عەرەبی یێ سووریێ هێرش کرە سەر تاخێن ئەشرەفیە و شێخ مەقسوود ل حەلەبێ و ئاسایشا ناڤخۆ یا تاخان کو سەر ب رێڤەبەرییا خۆسەرە، ب توندی بەرگری کر و نەهێلانا پێشڤەچوونێ بکەن.