گاڤ

شاندەکێ بلند یا ئێکەتییا ئەورۆپا گەهشتە دیمەشقێ و بریارە ل گەل سەرۆکێ قویناغا ڤەگوهاستنێ ل سووریێ کۆم ببیت، چاڤەرێ دهێتە کرن رەوشا حەلەبێ و داخوازا پاراستنا مافێ نەتەوە و پێکهاتەیان د گۆتوبێژێن شاندێ ئەورۆپا دا بن.

ئەینیێ 9ێ کانوونا دویێ 2026ێ، ئۆرسۆلا ڤۆندەر لاین، سەرۆکا کۆمسیۆنا ئەورۆپا، گەهشتە دیمەشقێ و ژ ئالییێ ئەسعەد شەیبانی، وەزیرێ دەرڤە یێ سووریێ ڤە پێشوازی لێ هاتە کرن. ژبلی ڤۆندەر لاین، ئەنتۆنیۆ کۆستا، سەرۆکێ جڤاتا ئەورۆپا ژی د ناڤ شاندێ ئێکەتییا ئەورۆپا دایە.

ئەڤە ئێکەم سەرەدانا سەرۆکا کۆمیسیۆنێ و جڤاتا ئەورۆپایە بۆ دیمەشقێ پشتی کەفتنا ڕژێما سووریێ. پاولا پینهۆ، پەیڤدارا کۆمیسیۆنێ د کۆنفرانسەکێ ڕۆژنامەڤانی دا ل برۆکسل راگەهاند، سەرەدانا ڤۆندەر لاین بۆ دیمەشقێ پشکەکە ژ گەشتەکا بەرفرەهتر بۆ رۆژهەلاتا ناڤین کو ئارمانج ژێ بهێزکرنا پەیوەندییان و گۆتوبێژکرنا رەوشا دەڤەرێ یە.

ئێکەتییا ئەورۆپا پێنجشەمبییێ 8-1-2026 دلگرانییا خۆ یا کویر ل دۆر شەڕێ شێخ مەقسوود و ئەشرەفییێ ل حەلەبێ دیار کر. رۆژا پێنجشەمبی، ئەنوەر ئەلعەنوونی، پەیڤدارێ ئێکەتییا ئەورۆپا ل دۆر رەوشا حەلەبێ راگەهاند، "ئەم داخواز دکەین ڕێز ل مافێن مرۆڤی بهێتە گرتن و ب رێیا زمانێ دیپلۆماسی و ئاشتییانە چارەسەری بۆ کێشەیان بهێتە دیتن".

ئێکەتییا ئەورۆپا و ئەمریکا داخوازا "حکومەتەکا گشتگیر" ل سووریێ دکەن، لێ هێشتا حکومەتا سووریێ چەندین کێشە چارەنەکرینە، ل سەر هەمییان ژی بجهئینانا رێککەفتنا 10ـی ئادارا 2025 کو دناڤبەرا جەنەرال مەزلووم عەبدی، فەرماندەیێ گشتی یێ هێزێن سووریا دیموکرات و ئەحمەد شەرع، سەرۆکێ قویناغا ڤەگوهاستنێ دا هاتییە ئیمزاکرن.