گاڤ

سەرۆک بارزانی و ئەحمەد شەرع ب رێیا تەلەفۆنێ ئاخڤتن و سەرۆک بارزانی تەکەز ل سەر بنیاتدانانا سووریایەکێ کر کو هەمی و ئالی و پێکهاتەیان ب خۆ ڤە بگریت.

ئەینییێ 9ێ کانوونا دویێ 2026ێ، سەرۆک مەسعوود بارزانی ب رێیا تەلەفۆنێ ل گەل ئەحمەد شەرع سەرۆکێ سووریێ بۆ قویناغا ڤەگوهاستنێ ئاخڤت.

ل گۆرەیی بارەگایێ بارزانی، د پەیوەندییا تەلەفۆنی دا، دویماهی پێشهاتێن سیاسی یێن سووریێ و گوهۆرینێن دەڤەرێ هاتنە بەحسکرن و هەردو ئالیان دوپاتی ل گرنگییا سەقامگیری و هەماهەنگییا هەڤپشک کر.

بارەگایێ بارزانی دبێژیت: "شەرعی دوپاتکر کورد پێکهاتەیەکێ رەسەن و سەرەکی یێ گەلێ سووریێ یە و پابەندبوونا تەمام یا دەولەتا سووریێ بۆ گەرەنتیکرنا هەمی مافێن نیشتیمانی، سیاسی و مەدەنی یێن کوردان ل گەل پێکهاتەیێن دی یێن سووریێ ب رەنگەکێ یەکسان و بێ جوداهی دوپاتکر."

بارەگایێ بارزانی هەروەسان ئاماژە ب وێ یەکێ دا، سەرۆک بارزانی سوپاسییێن خۆ بۆ دیدگەها شەرعی هەبوون و پشتەڤانییا خۆ بۆ خواست و هیڤییێن سوورییان بۆ ئاڤاکرنا دەولەتەکێ راگەهاند کو هەمی ئالی و پێکهاتەیان ب خۆ ڤە بگریت و تێدا هەڤپشک بن. هەروەسان گرنگی دا پێدڤییا بەردەوامییا راوێژ و هەماهەنگییێ، ئەو ژی ژ پێخەمەت بەرچاڤگرتنا بەرژەوەندییێن هەمی ئالییان و پاراستنا ئاشتییا جڤاکی.

ل سێشەمییا بۆری ل حەلەبێ و ل شێخ مەقسوود و ئەشرەفییێ، دەنگێ تۆپبارانێ بلند بوو و هێرشێن دژوار هاتنە کرن، کو تێدا جهێن مەدەنی و خەلکێ بێتاوان بێ جوداهی بوونە ئارمانج. ل هەمبەری ستەمێ، هێزێن ئاسایشا ناڤخۆ یێن سەر ب رێڤەبەرییا خۆسەر ڤە و خەلکێ خۆراگر ب ئێکرێزی ڕاوەستیان، دا بەرەڤانییێ ژ مافێن خۆ بکەن و رادەست نەبن. دۆرپێچەکا دژوار هاتە دانان، نەخۆشخانە ژ کارکەفتن و مرۆڤ د ناڤ سەرمایێ و برینان دا مان، کو ڕەوش گەهشتە ئاستەکێ مەترسیدار یێ مرۆڤی.

شەڤا بۆری، وەزارەتا بەرگرییا یا سووریێ بەلاڤکر، ژ دەمژمێر 3ی سپێدێ هەتا 9ی سپێدێ ئاگربەستە و رێ ب دەرکەفتنا هێزێن ئاسایشا ناڤخۆ ژ تاخێن ئەشرەفییە و شێخ مەقسوود ددەن.

جڤاتا تاخێن کوردی یێن شێخ مەقسوود و ئەشرەفییێ ل حەلەبێ راگەهاند، مە بڕیار دایە بمینین و بەرەڤانییێ بکەین.