گاڤ

نوینەر و هنارتییێ دۆنالد ترەمپ، سەرۆکێ ئەمریکا بۆ سووریێ ل گەل ئەحمەد شەرعی و وەزیرێ دەرڤە یێ سووریێ کۆمبوو و داخواز راگرتنا شەڕی کر.

نوینەرێ تایبەت یێ دۆنالد ترەمپی ل سەر تۆرا ئێکس نڤیسییە: بوویەرێن حەلەبێ ل سەر رێککەفتنا ئادارێ مەترسینە و رێکێ بۆ ئالییێن دەرڤە ڤەدکەن مایتێکرنێ د سووریێ دا بکەن. داخوازێ ژ هەمی ئالییان دکەین خۆ ئارام رابگرن و ب زویترین دەم ڤەگەرنە دانوستاندنێن رێککەفتنێن 10ێ ئادارێ و 1ێ نیسانا 2025ێ.

هەروەسا نڤیسییە: حکومەتا سووریێ دوبارە پێگرییا خۆ ب رێککەفتنا تێکەلکرنا هێزێن سووریا دیمۆکرات ل گەل سازییێن نشتیمانی و پاراستنا مافێن کوردان دوپاتکر.

تۆم باراک دوپات ژی کر: وەزارەتا دەرڤە یا ئەمریکا بەرهەڤە گەرەکا دی یا دانوسستاندنان د ناڤبەرا حکومەتا سووریێ و هەسەدێ دا دەستپێبکەت. داخوازێ ژ جیرانێن سووریێ دکەین پشتەڤانییا ڤێ دیدگەهێ بکەن و دهاریکاربن.

نوینەر و هنارتییێ دۆنالد ترەمپ نڤیسییە ژی: ئەمریکا هەردەم پشتەڤانییا هەڤپشکی و هەماهەنگییا ل گەل هەسەدێ دکەت د شەڕێ دژی داعشێ دا و قوربانیدانا وان بلند د نرخینیت.