گاڤ

ئێکەتییا تەپایێ یا ئیراقێ راگەهاند، ل گۆرەیی راپۆرتا رێکخەرێ ئەمنی و چاڤدێرێ یارییا دهۆک و هەولێرێ، پشتەڤانێن دهۆک تێکدان کرییە لەوما یانەیا وان ب کوژمێ 15 ملیۆن دیناران هاتە سزادان و پشتەڤان بۆ ئێک یاری بەرهەڤ نابن.

ئێکشەمبییێ 18ێ کانوونا دویێ 2026ێ، ئێکەتییا تەپایێ یا ئیراقێ د بەیانەکێ راگەهاند، لیژنەیا دیسپلینێ ل ئێکەتییا تەپاپێ، پشتی کۆمبوون و گۆتوبێژکرنا راپۆرتا ڕێکخەرێ ئەمنی و چاڤدێرێ یارییا دناڤبەرا یانەیێن هەولێر و دهۆک دا د چارچۆڤەیێ خۆلا ستێرێن ئیراقێ دا، دو سزایێن فەرمی دەرکرن.

ل گۆرەیی ئێکەتیی، یاری رۆژا 13-1-2026ێ ل یاریگەها فرەنسۆ حەریری هاتبووکرن و ب ئەنجامێ (2-1) د بەرژەوەندییا یانەیا هەولێرێ ب دویماهی هاتبوو. ل گۆرەیی راپۆرتێ، ژبەر چەندین سەرپێچییێن پشتەڤانێن یانەیا دهۆک ڤە هاتینە کرن، کو ئەڤە بوون:

● دەستپێکرنا ئالۆزییێ ژ ئالییێ پشتەڤانێن دهۆک ڤە هەر ژ خۆلەکێن ئێکێ یێن هاتنا وان بۆ ناڤ یاریگەهێ.

● شکاندنا دەرگەهێن چوونە ژوور یێن یاریگەهێ.

● هاڤێتنا بوتلێن ئاڤێ بۆ ناڤ ئەردێ یاریگەهێ.

● پاشئێخستنا دەستپێکرنا یارییێ بۆ هەیاما 15 خۆلەکان ژ ئەگەرێ کارێن ئالۆزییێ.

● شکاندنا کورسییێن یاریگەهێ ژ ئالییێ پشتەڤانێن یانەیا دهۆک ڤە.

● تێوەرکرنا یاریێن دویکێلێ د یاریکەرێن یانەیا هەولێرێ.

● بکارئینانا پەیڤێن نەژهەژی و درویشمێن خراب د ناڤ یاریگەهێ دا.

● گۆتنێن نەشرین ب دادڤانێ یارییێ و دادڤانێ هاریکار.

ل سەر بنەمایێ ڤان سەرپێچیان، لژنێ ئەڤ بڕیارە دان:

سزادانا یانەیا دهۆک ژ ئالییێ دارایی کو بهایێ وێ (15,000,000) پازدە ملیۆن دینارێن ئیراقی نە، ل گۆرەیی ماددەیێن (49-2-أ-ب) ژ رێنمایێن دیسپلین و رەوشتی یێن ڤی وەرزی.

بێبەهرکرنا پشتەڤانێن یانەیا دهۆک ژ بەرهەڤبوونێ ل یاریگەها خۆ (بۆ ئێک یاری)، ل گۆرەیی ماددەیێ (49-1-2) ژ هەمان رێنماییان. ل دەما دوبارەبوونێ دا دێ سزا بهێزتر بیت.

ژ ئالییێ خۆ ڤە یانەیا دهۆک بەیانەکێ دا راگەهاند، "به‌ری ده‌ستپێكرنا یاریيا مه‌ ل گه‌ل یانه‌یا هه‌ولێر بۆ ده‌ما 15 خۆله‌كان سه‌رپه‌رشتێ یارییێ نه‌هێلا یاری بهێتە برێڤه‌برن و دخواست یاری به‌ره‌ڤ ئاقاره‌كێ دی بچیت و ئەگەرێ سه‌ره‌كی بوو كو یاری تێكبچیت و مه‌ گۆمان هه‌بوویه‌ دڤیا نه‌ئارامییێ په‌یدا بكه‌ت."

یانەیێ دیارکر، "هۆسا دیاره‌ سه‌رپه‌رشتێ ئێمناهییێ ل یاریگه‌هێ دژا‌تییا دهۆكێ كرییه‌ و راپۆرتا خۆ دویری بێئالیبوونێ هنارتییه‌ و رویدان گه‌له‌ک مه‌زنكرینه‌ و لیژنه‌یا رێكوپێكیێ بتنێ پشتا خۆ ب گۆتنێن وی گرێدایە، ل ده‌مه‌كی سه‌رۆكێ ئێكه‌تییا تەپاپێ یا ئیراقێ عه‌دنان درجال ل ناڤ یاریگه‌هێ یێ بەرهەڤبوو و دیدەڤان بوویه‌ كو رویدان ژ پشته‌ڤانێن هه‌ردو یانه‌یان بوویه."

ئاماژە ب وێ یەکێ ژی دا، "په‌یدابوونا رویدانان ل نک پشته‌ڤانێن مه‌ ڤه‌رێژا وێ یه‌كێ بوو ده‌ما په‌رپرسێ راگه‌هاندنا یانه‌یا هه‌ولێر ب ره‌فتارێن كرێت كو ڤیدیۆ هه‌نه‌ به‌رانبه‌ر پشته‌ڤانێن مه‌ دكه‌ت و دبیته‌ ئەگەرێ په‌یدابوونا ئالۆزییەکا بچویک و كاریگەری ل رویدانێن یارییێ نه‌كرییه‌. "

یانەیا دهۆک گۆت:  مه‌ ب رێیا پارێزه‌رێ خۆ داخواز ژ لژنه‌یا رێكوپێكیێ كرییه‌ دوباره‌ چاڤخشاندنێ د بریارا خۆ دا بكه‌ت و دخوازین ب راستگۆیانه‌ سه‌ره‌ده‌ری ل گه‌ل بهێته‌ كرن .دیارکر، "هه‌می به‌لگه‌ ل سه‌ر هه‌می رویدانان يێن به‌ری و پشتی بدویماهیهاتنا یارییێ بۆ ئێكه‌تییا تەپاپێ یا ئیراقێ هاتینه‌ هنارتن و دێ هه‌رده‌م به‌ره‌ڤانییێ ژ مافێ پشته‌ڤانێن خۆ كه‌ین."