گاڤ

لیژنەیا رێک و پێکییێ ل ئێکەتییا تەپاپێ یا ئیراقێ، مللەت جەمال ئەندامێ کارگێرییا یانەیا دهۆک ژبەر "لێدوانێن وی د کۆنگرەیەکێ رۆژنامەڤانی دا" بۆ هەیاما سێ مەهان ژ چالاکییێن وەرزشی بێبەهر کر و سزایەکێ پارەیی ژی بسەردا سەپاند.

چارشەمبییێ 21ێ کانوونا دویێ 2026ێ، لیژنەیا رێک و پێکییێ د بەیانەکێ دا راگەهاند، پشتی بەلاڤبوونا ڤیدیۆیا مللەت جەمال ئەندامێ کارگێرییا یانەیا دهۆک، لیژنەیێ دەست ب لێکۆلینێ کر. د ڤیدیۆیێ دا، ناڤهاتی بەحسێ کێشەیا یاریزان 'محەمەد سەعید' دکەت و دبێژیت کو وان پارە وەک "بەرتيل" داینە لیژنەیا رێک و پێکییێ دا کو سزایێ ل سەر وی یاریزانی هاتییە سەپاندن سڤک بکەن.

ئێکەتییا تەپاپێ یا ئیراقێ دبێژیت: "سزایێ بەراهییێ یێ ل سەر یاریزان محەمەد سەعید هاتبوو سەپاندن ب بریارا ژمارە 187 ل رێککەفتی 13-7-2025، ئەو ژی بێبەهرکرنا وی بۆ هەیاما سالەکێ و سزایەکێ پارەیی ب کوژمێ (15,000,000) دیناران."

ئێکەتییا تەپاپێ یا ئیراقێ هەروەسان ئاشکراکر، "لیژنەیێ دیارکر کو وان مللەت جەمال و سەرپەرشتیارێ تیمێ جاسم حاجی داخوازکرییە و هەردو ل رۆژا 19ێ-1-2026 ل بەرسینگێ لیژنەیێ بەرهەڤبوون. د دانپێدانێن خۆ دا، مللەت جەمال گۆت: ڤیدیۆ یا وی یە، لێ مەرەما وی لیژنەیا رێک و پێکییێ نەبوو و ئەو پارەیێ هاتییە دان بۆ رسوومێن سکالایێ ل لیژنەیا تێهەلچوونێ و کرێیا پارێزەری بوویە."

ئێکەتییێ ئەو ژی دیارکر،"سکرتێرێ یانەیا دهۆک جاسم حاجی ژی گۆتێن مللەت جەمال پشتراست کرن و گۆت کو مەرەما وی خەرجییێن تێهەلچوونێ بوون و چ پەیوەندی ب چو لژنەیێن ئێکەتییێ ڤە نەبوو."

ل گۆرەیی بەیانێ، پشتی گوهداریکرن ل هەردو ئالییان و تەماشەکرنا بریارا تێهەلچوونێ یا ژمارە 33 ل رێککەفتی 6-10-2025 کو سزایێ یاریزانی بۆ سێ مەهان کێم کربوو، لیژنەیێ بریار دا:

بێبەهرکرنا مللەت جەمال ژ چالاکییێن وەرزشی بۆ هەیاما سێ مەهان و سزادانا وی ب کوژمێ 10 ملیۆن دینارێن ئیراقی، ل گۆرەیی حوکمێن ماددەیێ (48-5-أ) ژ رێنماییێن رێک و پێکییێ بۆ وەرزێ 2025-2026.

ژ ئالییەکێ دی ڤە، ژێدەرەکێ تایبەت بۆ گاڤ دازانین، سزایێ بەرهەڤنەبوونا پشتەڤانان ل سەر یانەیا دهۆک هاتەراکرن و پشتەڤان دشێن ل یارییا بەرانبەری زەورا بەرهەڤ ببن.

ئەڤە د دەمەکی دا یە، ئێکشەمبییێ 18ێ کانوونا دویێ 2026ێ، ئێکەتییا تەپایێ یا ئیراقێ راگەهاند، ل گۆرەیی راپۆرتا رێکخەرێ ئەمنی و چاڤدێرێ یارییا دهۆک و هەولێرێ، پشتەڤانێن دهۆک تێکدان کرییە لەوما یانەیا وان ب کوژمێ 15 ملیۆن دیناران هاتە سزادان و پشتەڤان بۆ ئێک یاری بەرهەڤ نابن.

ژ ئالییێ خۆ ڤە، یانەیا دهۆک هەمان رۆژ ژ ئالییێ خۆ ڤە یانەیا دهۆک بەیانەکێ دا راگەهاند، "به‌ری ده‌ستپێكرنا یاریيا مه‌ ل گه‌ل یانه‌یا هه‌ولێر بۆ ده‌ما 15 خۆله‌كان سه‌رپه‌رشتێ یارییێ نه‌هێلا یاری بهێتە برێڤه‌برن و دخواست یاری به‌ره‌ڤ ئاقاره‌كێ دی بچیت و ئەگەرێ سه‌ره‌كی بوو كو یاری تێكبچیت و مه‌ گۆمان هه‌بوویه‌ دڤیا نه‌ئارامییێ په‌یدا بكه‌ت."

یانەیا دهۆک گۆتبوو: "مه‌ ب رێیا پارێزه‌رێ خۆ داخواز ژ لیژنه‌یا رێكوپێكیێ كرییه‌ دوباره‌ چاڤخشاندنێ د بریارا خۆ دا بكه‌ت و دخوازین ب راستگۆیانه‌ سه‌ره‌ده‌ری ل گه‌ل بهێته‌ كرن .دیارکر، "هه‌می به‌لگه‌ ل سه‌ر هه‌می رویدانان يێن به‌ری و پشتی ب دویماهیهاتنا یارییێ بۆ ئێكه‌تییا تەپاپێ یا ئیراقێ هاتینه‌ هنارتن و دێ هه‌رده‌م به‌ره‌ڤانییێ ژ مافێ پشته‌ڤانێن خۆ كه‌ین."