گاڤ

ل رۆژئاڤا.. تاوانەکا هۆڤانە؛ خێزانەکا کورد هاتە کۆمکوژکرن، پیستێ کچەکێ ژێڤەکرییە و چاڤێ گەنجەکی دەرئێخستییە.

تیمەکێ (CPT) ل رۆژئاڤایێ کوردستانێ کەیسێ کۆمکوژییا خێزانەکا کورد بەلاڤ دکەت کو تێدا شەش ئەندامێن خێزانێ ب رەنگەکێ هۆڤانە هاتینە شەهیدکرن و شەشێن دی ژی ب گرانی هاتینە بریندارکرن.

ل گۆرەیی تیمێ تیمێ دروستکەرێن ئاشتییا جڤاکی (CPT) ل هەرێما کوردستانێ، ل رۆژا 18ێ کانوونا دویێ، د دەما هێرشا چەکدارێن سووریێ بۆ سەر باژێرێ رەققایێ، خێزانەکا کورد کو ژ 12 کەسان پێکدهات، کو د رێکێ دا بوون بۆ باژێرێ حەسەکێ، دهێنە گرتن.

خێزان ب ترومبێلەکا ژ جۆرێ "کیا - بارهەلگر" ژمارە 40013، ژ باژێرێ رەققایێ بەرەڤ حەسەکێ ب رێ کەفتبوو. دەمێ دگەهنە نێزیک گوندێ ئەبۆ خەشەب دناڤبەرا رەققا و حەسەکێ دا، ژ ئالییێ گرۆپەکێ چەکدار یێن سەر ب سووریێ ڤە دهێنە راوەستاندن. پرسیار ژێ دهێتە کرن "هوین خەلکێ کیرێ نە؟"، ئەو بەرسڤ ددەن "رەققا". بەرپرسێ گرۆپێ چەکداری دبێژیت "کوردن یان عەرەب؟". ئەوژی د بەرسڤێ دا دبێژن "ئەم کوردین، لێ سەر ب چ حزب و هێزەکێ ڤە نینین". بەرپرس دبێژیت: "بەسە، نوکە دێ دویماهییێ ب هەوە هەمییان ئینم"!

بەرپرس فەرمانێ ددەت کو ئەوێن دانعەمر هەمی بهێنە کوشتن. خێزان ژ ترسا گیانێ خۆ دڤێت ژ ترومبێلێ بهێنە دەر، لێ چەکدار تەقەیێ دکەن و ل دەستپێکێ گولـلەیەکێ ل ناڤچەڤێن سەرۆکخێزانێ "محەمەد ئیسماعیل سالح – کو ژییێ وی 50 سالن" ددەن و شەهید دکەن. دەستێن دایکا خێزانێ ب ناڤێ "سارا شاهین سالح – کو ژییێ وێ 49 سالن" ژ پشتێ ڤە گرێددەن و گولـلەیەکێ ل سەرێ وێ ددەن و وێ ژی شەهید دکەن. پاشی ب رەنگەکێ هەرەمەکی تەقەیێ ل خێزانێ دکەن و 4 ئەندامێن دی یێن خێزانێ ب ناڤێن "یووسف محەمەد سالح - 20 سال، لەیلا محەمەد ساڵح - تەمەن 17 سال، ئەڤین محەمەد سالح - تەمەن 10 سال، مەحمود ئەحمەد ساڵح - تەمەن 26 سال" شەهید دکەن کو دو ژ وان زارۆک بوون.

پشتی کوشتنا وان 6 ئەندامێن خێزانێ، چەکدار پیستێ سەروچاڤێن "لەیلا یا 17 سالی" ژێڤەدکەن و ب کێرێ زکێ وێ شەق دکەن. هەروەسان چاڤێ راستێ یێ "مەحموودێ 26 سال" دەردئێخن. پاشی لۆگۆیێ هێزێن ئاسایشا ناڤخۆ دداننیە سەر سینگێ مەحموودی.

پشتی هینگێ، شەش ئەندامێن دی یێن خێزانێ درەڤن و دڤێن خۆ ژ دەستێ چەکداران رزگار بکەن، لێ چەکدار تەقەیێ لێ دکەن و هەمیان ب گرانی بریندار دکەن. چەکدار، تەرمێن وان ل جهێ رویدانێ دهێلن و برینداران ل گەل خۆ دبەن. پشتی دەمژمێرەکێ، برینداران ل بیابانەکێ ل نێزیک باژێرێ دێرەزوورێ دهاڤێژن. خێزانەکا گوندەکی برینداران دبینیت و وان ڤەدگوهێزیتە نەخۆشخانەیا گشتی یا دێرەزوورێ. ل نەخۆشخانەیێ، چارەسەرییا پێدڤی بۆ برینداران ناهێتە کرن و ئێک ژ نۆشداران بێرێزیێ لێ دکەت و دبێژیت: "دڤیابا هوین ژی هاتبانە کوشتن و نەئینابانە ڤێرە." پشتی 40 دەمژمێران، بریندار دهێنە بۆ باژێرێ رەققایێ ڤەگوهاستن و ل وێرێ ژی ژ ئێکدو دهێنە جوداکرن.

ناڤێن برینداران، تەمەن و جۆرێ برینێن وان:

شرین محەمەد سالح - 25 سال: چار گولـلە ب زکێ وێ کەفتینە.

غەزال محەمەد سالح - 16 سال: گوللـەیەک ب پێ وێ کەفتییە.

ئیبراهیم محەمەد سالح - 13 سال: گولـلە ب دەست و پێیێن وی کەفتینە.

شادی مەحموود سالح - 6 سال: گولـلەیەک ب پێ وی کەفتییە و سەروچاڤێن وی ژی بریندارن.

لاوەند مەحموود سالح - 2 سال و نیڤ: گولـلەیەک ب پیستێ سەرێ وی کەفتییە و دو تبلێن دەستێ وی یێ راستێ ژی هاتینە ژێڤەکرن.

ئیبراهیم مەحموود سالح - 4 سال: گوللـە ب پێ و ئەندامێ وی یێ نێرینە کەفتییە.

پشتی دو رۆژان ژ رویدانێ، هندەک وەلاتییێن گوندێ ئەبۆ خەشەب، تەرمێن وان شەهیدان کۆم دکەن و دبەنە نەخۆشخانەیا پارێزگەها دێرەزوورێ. هەتا نوکە ژی تەرم ل وێ نەخۆشخانەیێ ماینە و نەهاتینە ڤەشارتن.

رێکخراوا CPT راگەهاند کو هەمی بەلگەنامەیێن ڤێ کۆمکوژییێ، وەک ڤیدیۆ، وێنە و دەنگ ل بەر دەستێ وانن و پشتراستی ل سەر رویدانێ کرییە و دێ ل سەر تۆمارکرنا وان بنپێکارییێن دژی وەلاتییێن مەدەنی دهێنە کرن بەردەوام بن.