گاڤ

بهایێ تمەنێ ئیرانی جارەکا دی نزمترین ئاست د دیرۆکا خۆ دا تۆمارکر، کو ل بازاران هەر دۆلارەکێ ئەمریکی ب 150 هزار تمەنان دهێتە کڕین و فۆتن.

پشتی دەمەکێ ژ سەقامگیرییێ، چەند رۆژە بهایێ تمەنی جارەکا دی بەر ب داکەتنێ ڤە چوویە و نزمترین بهایێ خۆ د دیرۆکێ دا تۆمار دکەت.

ل 28ـی کانوونا ئێکێ یا سالا بۆری، بهایێ هەر دۆلارەکی گەهشتە 144 هزار تمەنان، کو بوو ئەگەرێ دائێخستنا بازارێن تەهرانێ و پشتی وێ ژی نەرازیبوونێن مەزن دروست بوون.

مەسعوود پزیشکیان، سەرۆککۆمارێ ئیرانێ، بۆ چارەکرنا ڤێ رەوشێ سەرۆکێ بەنکَا ناڤەندی گوهۆری و شیا بۆ دەمەکێ کێم بهایێ تمەنی بلند بکەت و بگەهینیتە 135 هزار تمەنان، لێ پاشی جارەکا دی داکەفت.

ئەڤ رەوشە تنێ چەند رۆژان بەردەوام بوو و د دو حەفتیێن بۆری دا بهایێ دۆلاری ل بازارێن تەهرانێ دناڤبەرا 138 هزار تمەن هەتا 141 هزار تمەنان دا سەقامگیر ببوو.

ژ دەستپێکا ڤێ حەفتبیێ، رۆژ بۆ رۆژێ بهایێ تمەنی پتر دادکەڤیت و ئەڤرۆ رۆژا سێشەمبییێ، هەر دۆلارەک ب 150 هزار تمەنان ژی بازار پێ هاتە کرن، کو د دیرۆکا وی پارەیی دا بێ وێنەیە.

بەردەوامییا سزایان، ئەگەرێ رویدانا شەڕى، لێدوانێن توند یێن بەرپرسێن ئیران و ئەمریکا دژی ئێکدو و بێ باوەرییا د اڤ بازارێن ئیرانێ دا بووینە ئەگەر کو بهایێ تمەنی پتر داکەڤیت.