کاوار رەسوول نێروەیی

هەیامەما درێژە، ل سەر شاشەیێن تەلەفزیۆنان و میدیان، دناڤا کۆمبوونێن سیاسیان دا، ب دەنگەکێ بلند بەحس ل دویرکەفتنا نفشێ نوی ل بابەتێن نیشتیمانی دهاتەکرن.

پترییا شرۆڤەکار و سیاسەتمەداران ب خەم و دلگرانی ڤە بەحس ل درزێن جیلێ نوی دکر و دگۆت: نفشێ دیجیتالی ل ژێر کارتێکرن و هەژموونا جیهانگیری و تۆرێن جڤاکی دا یێ هاتییە پەروەردەکرن، هەستا نیشتیمانی و پەیوەندییێن وی ب کێشەیێن نەتەوەیی ڤە یا لاوازە.

ئەڤ گۆمانە نە تنێ موناقشەیەکا جڤاکی بوو، لێ دلگرانییەکا سیاسی ژی بوو، چونکی پاشەرۆژا هەر بزاڤەکا نەتەوەیی یا گرێدایی هەستا بەرپرسیارییەتا جیلێ نوی ڤە یە.

رۆژئاڤا تاقیکرنەک بوو، بەرسڤا وان پرسیار و گۆمانان دا، یێن ل سەر گەنجێ مە هەیین، دەما رۆژئاڤایێ کوردستانێ کەفتییە بەر مەترسییێ، نفشێ نوی یێ کوردان ب رەنگەکێ بێ وێنە رابوو سەرخۆ، ل هەولێرێ بو سلێمانییێ، ل دهۆکێ بو کەرکووکێ، ل ئەورۆپا بو ئەمریکا، گەنجان ب ئێک دەنگ هەوار دکر 'ئێکە ئێکە، ئێکە، گەلێ کورد ئێکە' و ب دەهان هوتاف و درویشمێن نەتەوەیی دهاتنە گۆتن.

ئەڤە نە تنێ خۆنیشاندان بوون، لێ بەرهەمئینانا هشیارییا نەتەوەیی بوو، ب رەنگەکێ مۆدێرن و ئێکگرتی.

نفشێ نوی یی چەند راستییەک سەلماندن

ئێک: هشیارییا نەتەوەیی: نفشێ نوی سەلماند، هشیارییا نەتەوەیی تنێ ب رەنگەکێ کلاسیکێ (پارت و رێکخراوان) ناهێتەکرن، وان ب رێیا تۆرێن جڤاکی، خۆ رێکدئێخست و بزاڤەکا نەتەوەیی یا بەرفرەهـ دروست دکر.

دو: دیپلۆماسییا جەماوەری: گەنج بوونە دیپلۆماتکارێن ئازاد یێن کوردستانێ، ب چێکرن و بەلاڤکرنا هزاران پەیام و ڤیدیۆیان، دەنگێن کوردستانییان گەهاندە رایا گشتی یا جیهانێ.

سێ: درستبوونا ئێکدەستییا نیشتیمانی: دناڤ خۆنیشاندانان دا جوداهییا پارتاتییێ نەبوو، هەمی هێز و ئایدۆلۆجی ل ژێر ئالایێ کوردستانێ، ئالایێ نیشتیمانپەروەرییێ کۆمببوون.

چار: بەرپرسیارییەتا دیرۆکی: نفشێ نوی گەلەک ب جوانی تێدگەهشتن، کو رۆژئاڤا پشکەکا گرنگ و جودانەکرییە ژ پرۆژەیێ نیشتیمانی و ب ئەرکێ خۆ یێ نەتەوەیی دزانی بپارێزن.

پێنج: بکارئینانا ئامرازێن مۆدێرن: تەکنەلۆژیا و تۆرێن جڤاکی بوونە چەکەکێ نەرم ددەستێ گەنجان دا، بۆ بەرگریکرنێ ژ مافێن نەتەوەیی.

وانەیێن درۆکی ژ ڤان خونیشاندانان

ڤان رویدانان وانەیەکا مەزن دا دیارکرن، کو هەستێ نیشتیمانی نامریت، تنێ دهێتە گوهۆرین و خۆ نوی دکەتن.

نابیت نفشێ نوی بهێتە تۆمەتبارکرن، کو ب شێوازێ جیلێ بەری خۆ دەربرین و بزاڤان ناکەتن، چونکە ئەو ل سەر دەمەکێ جودا مەزن بووینە، ئامراز د جودانە، لێ ئارمانجا وان هەمان ئارمانجە (کوردستانەکا ئازاد، سەربخۆ، ئێکگرتی)

لەوما ئەرکێ هێزین سیاسی و جڤاکی ئەو دڤێت، باوەرییێ ب نفشێ نوی بئینن، گوهدارییا دەنگێ وان بکەن، رێکێ بدەنێ زێدەتر پشکداری بریارێن سیاسی ببن.

رۆژئاڤا بوو تاقیکرنەک، نفشێ نوی بوو بەرسڤ. نوکە دەما وێ چەندێ یە، ئالییێن سیاسی و دەستهەلات بەرسڤەکا ژ هەژی هەلویست و تێگەهشتنا وان یا نەتەوەیی و نیشتیمانپەروەری ب باوەری، ب رێز و ب پشتەڤانی بدەن.

چونکی جیلێ نوی ن بتنێ ئۆمێدە، لێ هێزا نوکە و سۆزا پاشەرۆژەکا رۆهنترە.