گۆتار.. رێدار سەلیم

د دیرۆکا نوی یا سووریێ دا، چ جاران رۆلێ راگەهاندنێ وەک یێ ڤی سەردەمی یێ کاریگەر نەبوویە، د شەرێ ڤێ دویماهییێ یێ د ناڤبەرا هێزێن سووریا دیمۆکرات (هەسەدە) و هێزێن حکومەتا سووریێ، ئەگەر ئەم بێژین چەتە و ملیشیاتێن هەڤپەیمانێن وێ دا، میدیایا کوردی ب هەمی جۆرێن خۆ ڤە (کەنالێن ئاسمانی، رادیۆ و سوشیال میدیا) وەک ئەکتەرەکێ سەرەکی د مەیدانێ دا دیار بوو.
ڤەگۆهاستنا راستییێن مەیدانی 
حکومەتا سووریێ چەندین سال بوو بزاڤدکرن کو رەوشا (باکۆر و رۆژهەلاتێ سووریێ) رۆژئاڤایێ کوردستانێ ب شێوەیەکێ نیشان بدەت کو تەنێ بژاردەیا سەربازی چارەسەرییە، یان ژی وان دەڤەران وەک دەڤەرێن بێ سەقامگیری وەسف بکەت، د هەمبەر دا میدیایا کوردی رۆلەکێ دیرۆکی گێرا بۆ شکاندنا وی وێنەیێ حکومەتێ کورد و دەڤەرێن وان پێ نیشانی جیهانێ ددان، ب رێکا نووچە، پەیام و گۆتارێن جودا -جودا، هەلبەت ژی شیا وێنەیەکێ راستەقینە ژ قوربانیدانێن شەرڤانان و ئیرادەیا خەلکێ سڤیل بۆ جیهانێ بڤەگوهێزیت، ئەڤ چەندە بوو ئەگەر کو جیهان ب چاڤەکێ دی بەرێ خۆ بدەنە کوردان و پتر بنیاسن.
شەرێ ناسنامێ و بەرسینگگرتنا پرۆپاگەندەییان
میدیایا حکومەتا سووریێ گەلەک جاران زمانەکێ نەتەوەیی یێ تۆند یان زمانێ تۆمەتبارکرن ب خیانەتێ دژی کوردان ب کاردئینیت، د بەرامبەر دا میدیایا کوردی نەک تەنێ بەرسڤ دا، بەلکو شەرعیەتەکا نوی دا ڤێ هێزێ و وێ دوپاتی ل سەر وێ چەندێ کر کو هەسەدە هێزەکا نشتیمانی یە و ل سەر بنەمایێ نەتەوەیا دیمۆکرات هاتییە ئاڤاکرن، ئەڤ تێگەهشتنە د میدیایێ دا رۆلەکێ مەزن هەبوو د پاراستنا تەباییێ د ناڤبەرا پێکهاتێن کورد، عەرەب و سریان دا، و رێگری ل وێ چەندێ کر کو حکومەت بشێت فتنەیەکا نەتەوەیی د ناڤبەرا وان دا دروست بکەت.
ئامرازێ بلندکرنا مۆرال و هشیارییا جەماوەری
د شەرێن دۆمدرێژ دا، شەرێ دەروونی گرنگییەکا کێمتر ژ شەرێ سەربازی نینە، میدیایا کوردی ب بەلاڤکرنا سرودێن شۆرشگێری، دیمەنێن سەرکەفتنێن مەیدانی و چیرۆکێن قارەمانییێ، شیا جەماوەرەکێ مەزن ل دەردۆرێن هێزێن کوردی کۆم بکەت، هەروەسا وێ رۆلەکێ هشیارکەر هەبوو بۆ خەلکێ سڤیل ژی د دەمێ بۆردومانان یان دەربەدەریێ دا، ب دابینکرنا زانیاریێن دروست بۆ پاراستنا ژیانا وان.
ئالۆزی و ئاستەنگ
دگەل ڤان دەستکەفتان، میدیایا کوردی رویبروی ئاستەنگێن مەزن ژی بوو، ئێک ژ وان هەستا نەتەوەیی بوو کو گەلەک جاران دبوو ئەگەر هندەک راستییێن تەحل یێن شەری ب تەمامی نەهێنە گۆتن و ڤەگۆهاستن، یان ژی گفاشێن سیاسی ل سەر دەزگەهێن راگەهاندنێ هەبوون دا کو پەیامەکا ئێکگرتی بەلاڤ بکەن.
دەرئەنجام
ب کورتی، میدیایا کوردی د شەرێ دژی چەتەیێن جۆلانی دا، شیا زێدەتری کارێ خۆ یێ ڤەگۆهاستنا نووچەیان بکەت وێ سەلماند کو دەنگ و رەنگ دشێن سنۆرێن سەربازی ببەزینن و پشتەڤانییەکا نێڤدەولەتی و ناڤخۆیی بۆ دۆزا رەوا یا گەلێ کورد و پێکهاتەیێن دی یێن رۆژئاڤا دابین بکەن.