گاڤ

ناڤەندا فەلەکناسییا ناڤدەولەتی دبێژیت: ل گۆرەیی پێشبینییێن فەلەکی، رۆژا پێنجشەمبییێ 19ێ شوباتا 2026، دێ بیتە رۆژا ئێکێ یا مەها رەمەزانێ، چونکی دیتنا هەیڤێ ل ئێڤارا سێشەمبیسێ 17ێ شوباتێ مەحالە بیت.

ل گۆرەیی ناڤەندێ، پترییا وەلاتێن ئیسلامی رۆژا سێشەمبییێ، 17ێ شوباتا 2026، دێ چاڤدێرییا دیتنا هەیڤێ کەن، لێ ل گۆرەیی هەمی پیڤەرێن فەلەکی، دیتنا هەیڤێ ل وێ رۆژێ ل هەمی وەلاتێن عەرەبی و ئیسلامی مەحالە، چ ب چاڤێ ئاسایی بیت یان ب تلسکۆپێ.

ناڤەندا فەلەکناسییا ناڤدەولەتی، ئەگەرێ نەدیتنا هەیڤێ ل 17-2-2026، بۆ وێ یەکێ ڤەدگەرینیت کو هەیڤ بەری ئاڤابوونا رۆژێ، یان د هەمان دە مدا ل گەل ئاڤابوونا رۆژێ ئاڤا دبیت.

بۆ نموونە:

ل جاکارتا، هەیڤ 6 خۆلەکان بەری رۆژێ، ئاڤا دبیت.

ل ئەبووزەبی، هەیڤ ئێک خۆلەک بەری رۆژێ، ئاڤا دبیت.

ل ریاز، هەیڤ 42 چرکەیان بەری رۆژێ، ئاڤا دبیت.

ل قاهیرە، هەیڤ بتنێ 2 خۆلەکان پشتی ئاڤابوونا رۆژێ دمینیت، لێ ژبەر کو بتنێ 1.3 پلەیان ژ رۆژێ دویرە، دیتنا وێ مەحالە.

رۆژا سێشەمبییێ 17ێ شوباتێ، دێ رۆژغەیرینەکا بازنەیی ل باشوورێ ئەفریقا و جەمسەرێ باشوور رویددەت، ئەڤە بەلگەیەکا دی یە ل سەر وێ یەکێ کو هەیڤ وی دەمی دناڤبەرا ئەرد و رۆژێ دایە و ناهێتە دیتن.

ناڤەند هوشدارییێ ددەت کو دبیت هندەک کەس ب شاشی بانگەشەیا دیتنا هەیڤێ بکەن، چونکی ل وێ ئێڤارێ هەسارا ڤینۆس (زەهرە) دێ ل نێزیک جهێ هەیڤێ بیت و رەنگە ل گەل هەیڤا نوی بهێتە تێکهەلکرن.

کەنگی رۆژا ئێکێ یا رەمەزانێ یە؟

ژ بەر مەحالییا دیتنا هەیڤێ ل رۆژا سێشەمبییێ ئەو وەلاتێن پشتا ب دیتنا ئێکسەر یا هەیڤێ گرێددەن، رۆژا چارشەمبییێ 18ێ شوباتێ، وەک تەمامکەرا هەیڤا شەعبانێ ددانن و رۆژا پێنجشەمبییێ 19ێ شوباتا 2026، دکەنە رۆژا ئێکێ یا رمەزانێ.

لێ ئێڤارا رۆژا چارشەمبییێ 18ێ شوباتێ، هەیڤ ب ساناهی و ب چاڤێ ئاسایی ل پترییا وەلاتێن ئیسلامی دێ هێتە دیتن، چونکی بۆ دەمەکێ درێژ پشتی ئاڤابوونا رۆژێ دێ ل ئەسمانی مینیت.