گاڤ

وەزیرێ دەرڤە یێ ئەمریکا راگەهاند، بەرهەڤن ل گەل ئالییێ ئیرانی کۆمببن، لێ دڤێت تێدا گۆتوبێژ ل دۆر پرۆگرامێن وێ یێن ئەتۆمی و مۆشەکی بهێتە کرن.

چارشەمبییێ 4ێ شوباتێ 2026ێ، مارکۆ روبیۆ، وەزیرێ دەرڤە یێ ئەمریکا د بەرسڤا رۆژنامەڤانان دا ل واشنتنێ ل دۆر کۆمبوونا ل گەل بەرپرسێن ئیرانێ راگەهاند، "ئەگەر ئیرانێ کۆمبوون بڤێت، ئەم بەرهەڤین". هەروەسان گۆت ژی: "پێدڤییە د وێ کۆمبوونێ دا گۆتوبێژ ل دۆر پرسا ئەتۆمی یا وی وەلاتی، پرۆگرامێ وێ یێ مۆشەکی و گرۆپێن نێزیکی وی وەلاتی ل رۆژهەلاتا ناڤین بهێتە کرن".

ئەڤ گۆتنێن وەزیرێ دەرڤە یێ ئەمریکا د دەمەکی دانە کو بڕیارە رۆژا ئەینی، عەباس عیراقچی، وەزیرێ دەرڤە یێ ئیرانێ و ستیڤ ویتکۆف، نوینەرێ ئەمریکا بۆ کاروبارێن رۆژهەلاتا ناڤین، کۆمببن. ل گۆرەیی میدیایا ئیرانێ، کۆمبوون دێ ل عومانێ بیت لێ روبیۆ دبێژیت، جهێ برێڤەبرنا کۆمبوونێ هێشتا ئێکلا نەبوویە.

دەستپێکرنا ڤان بزاڤێن دیپلۆماسی پشتی وێ یەکێ دهێت کو سالا بۆری (نیسان بۆ خزیرانا 2025ێ)، چەندین گەرێن دانوستاندنێن نەئێکسەر ل رۆما و مەسقەتێ هاتبوونە کرن، لێ ژ بەر دەستپێکرنا شەرێ ئسرائیل و ئیرانێ و هێرشێن ئەمریکا بۆ سەر سازییێن ئەتۆمی، پرۆسە بسەرنەکەفت.

کۆمبوونا بەرپرسێن ئەمریکا و ئیرانێ د دەمەکی دایە کو هەیڤا بۆری ئالۆزییێن دناڤبەرا هەردو ئالییان دا زێدەتر ببوون. ئەڤە ژی پشتی وێ یەکێ هات کو ئەمریکا هێزەکا مەزن بەرەڤ سنورێن ئیرانێ ڤەگوهاست و وان ژی دەست ب بەرهەڤییێن بەرسڤدانێ کر.

زێدەبوونا ئالۆزییان پشتی دەستپێکرنا خۆنیشاندانان ل ئیرانێ بوو کو رۆژا 28ێ کانوونا ئێکێ یا بۆری دەستپێکربوون. ل گۆرەیی رێکخراوێن مافێن مرۆڤی، د وان خۆنیشاندانان دا ب هزاران کەس هاتنە کوشتن. دۆنالد ترەمپ، سەرۆکێ ئەمریکا ژی گەفێن وێ یەکێ کربوون کو ل ئەگەرێ بەردەوامبوونا کوشتنا خۆنیشاندەران دێ هێرش کەنە سەر وی وەلاتی.