گاڤ

مەسروور بارزانی ل دوبەیی راگەهاند، پەیوەندیێن وان ل گەل ئیماراتێ د ئاستەکێ بلند دانە و دیدگەهەکا هەڤپشک بۆ پرسان هەیە. مەسروور بارزانی تەکەزی کر کو نابیت پێکئینانا حکومەتا هەرێمێ ب بەغدا ڤە بهێتە گرێدان و رەخنە ل سیاسیکرنا پرسا مووچەیی گرت، هەروەسان راگەهاند کو دڤێت سەرۆککۆمار نوینەراتییا پترییا خەلکێ کوردستانێ بکەت نە بتنێ یێ پارتییەکێ بیت کو د هەلبژارتنان دا سەرنەکەفتییە.

چارشەمبییێ 4ێ شوباتێ 2026ێ، مەسرور بارزانی، سەرۆکوەزیرێ هەرێما کوردستانێ د دەما سەرەدانا خۆ دا بۆ ئیماراتێ بەحس ل پەیوەندییێن ل گەل ئیماراتێ کر و راگەهاند: "دەمەکێ درێژە پەیوەندییێن بازرگانی و ئابۆری یێن بهێز دناڤبەرا هەرێما کوردستانێ و ئیماراتێ دا هەنە کو ل سەر بنەمایێ پشتراستییێ هاتینە ئاڤاکرن و رۆژ ب رۆژ بەرەڤ پێش دچن. هەبوونا کۆمپانی و وەبەرهێنەرێن هەردو ئالییان د بازارێن ئێکدو دا، ئەگەرەکێ سەرەکی یێ بهێزبوونا پەیوەندییێن سیاسی و بازرگانییە".

گۆت ژی: "ل گەل ئیماراتێ دیدگەهەکا هەڤپشک بۆ پترییا پرسێن نوکە یێن دەڤەرێ هەیە و ب بەردەوامی بۆ پاراستنا سەقامگیرییێ و سەرکەفتن ب سەر قەیرانان دا راوێژێ ب ئێکدو دکەین".

ل دۆر ئارمانجا پشکداریکرنێ د گۆپیتکا حکومەتان دا ل دوبەیی، مەسروور بارزانی ئاماژە ب وێ یەکێ دا کو ئەڤ گۆپیتکە دەلیڤەنە بۆ کۆمبوونا سەرکردە و بازرگانان و ئالوگورا دیدگەهێن سیاسی ب مەرەما رێگریکرن ل بەرفرەهبوونا قەیرانان.

سەرۆکوەزیرێ هەرێما کوردستانێ رۆهنکر، ئەڤ گۆپیتکە دەلیڤەیەکە بۆ مفاوەرگرتنێ ژ ئەزموونا سەرکردەیێن ئابۆری یێن جیهانێ. "خۆشبەختانە هەرێما کوردستانێ وەک ئەزموونەکا سەرکەفتی دهێتە دیتن و گەلەک وەلات حەز دکەن ڤەکۆلینێ ل سەر ڤێ ئەزموونێ بکەن، چونکی ب دیتنا وان دەلیڤەیێن باش ل هەرێمێ پەیدا بووینە". تەکەزی ژی کر کو راکێشانا وەبەرهێنەران دێ هاریکار بیت بۆ ڤەژاندنا ئابۆری و پەیداکرنا دەلیڤەیێن کاری.

ل دۆر پرسا پێکهاتنا کابینەیا نوی یا حکومەتا هەرێما کوردستانێ، مەسروور بارزانی گۆت: "پێکئینانا حکومەتێ دڤێت ل سەر بنەمایێ دەنگێ خەلکی بیت. دەمێ ئالییێن سیاسی رێز ل ئیرادەیا دەنگدەری گرت، پرۆسە دێ ب ساناهی بیت. مە چو کێشە ل سەر کارنامە و ئەجێندایا حکومەتێ نینن و ئەم رێککەفتینە، بەلکو کێشە ل سەر وەرگرتنا پۆستانە و هندەک کەسان کێشەیێن کەسۆکی هەنە".

دوپاتکر ژی: "نابیت بەرژەوەندییا بلند یا وەلات د بەرژەوەندییا کەسی یان پۆستەکێ دیارکری دا بهێتە کورتکرن. پێداگرییا مە ل سەر هندەک پۆستێن وەزاری بۆ وێ یەکێ یە کو بشێین باشتر خزمەتا وەلاتییان بکەین، چونکی مخابن هندەک ئالییان ب حکومەتەکا ئێکگرتی یا سەرانسەری ڤە پابەند نەبوونە، د دەمەکی دا کو مە دڤێت خزمەتگۆزارییان بگەهینینە هەمی پارێزگەهان بێ جوداهی".

سەرۆکوەزیرێ هەرێمێ رەتکر کو پێکهاتنا حکومەتا هەرێمێ ب پێکئینانا حکومەتا ئیراقێ ڤە بهێتە گرێدان و راگەهاند: "پتر ژ سالەکێیە هەلبژارتنێن هەرێمێ هاتینە کرن و ڤیابا پار حکومەت پێکهاتبا، لێ ئالییێ بەرامبەر ڤیا ب حکومەتا فیدرال ڤە گرێدەت دا کو دەستکەفتێن هەردو هەلبژارتنان تێکهەل بکەت. ل دەف مە ئەڤە دو پرسێن جودانە و دڤێت جودا-جودا سەرەدەری ل گەل بهێتە کرن".

ل دۆر پۆستێ سەرۆککۆمارێ ئیراقێ، مەسروور بارزانی ئاشکرا کر، هەتا نوکە چو رێککەفتنەک نەمایە، لێ تەکەزی کر، "کاندیدێ سەرۆککۆماری دڤێت ژ ئالییێ هەمی خەلکێ کوردستانێ ڤە بهێتە قەبویلکرن، نە کاندیدێ حزبەکێ بیت کو هەلبژارتن ژی نەبرینە. باشترین میکانیزم ئەوە کاندیدێ سەرۆککۆماری د پەرلەمانی دا بهێتە ئێکلاکرن و ب دەنگێ پترییێ بهێتە دیارکرن".

ل دۆر پرسا مووچەیی، سەرۆکوەزیری رەخنە ل بەغدا گرت ب وێ یەکێ کو پرسا مووچەیی سیاسی کریە و گۆت: "دڤێت سەرەدەرییەکا یەکسان ل گەل وەلاتیێن هەرێمێ بهێتە کرن. ئەگەر بەغدا کێشەیا سیولەیێ هەبیت، دڤێت کارتێکرنا وێ بۆ هەیمیان وەک ئێک بیت".

ئاماژە ب وێ یەکێ ژی دا، د دویماهی کۆمبوونا خۆ دا ل گەل محەمەد شیاع سوودانی، سەرۆکوەزیرێ ئیراقێ ل هەولێرێ بەحس ل پرسا مووچەیی کریە، "وی گۆت، کو ئەم د قەیرانەکا ئابۆری داینە، لێ هیڤی خواست کێشەیا مووچەیێ فەرمانبەرێن هەرێما کوردستانێ ب زویترین دەم بهێتە چارەکرن، ئەم ژی هیڤیدارین ب زویترین دەم مووچەیێ فەرمانبەرێن هەرێمێ بهنێرن کو نوکە وان دەست ب بەلاڤکرنا مووچەیی ل سەر فەرمانبەرێن خۆ کریە".

مەسروور بارزانی رۆهنکر ژی، هەرێما کوردستانێ پابەندییێن خۆ بجهئیناینە؛ "چونکی پەترۆلا هەرێمێ دهێتە فرۆتن و 120 ملیار دینار ژی ژ داهاتێ نەپەترۆلی ب وەزارەتا دارایی یا ئعیراقێ دهێنە دان ، کو ئەڤە دییتە نێزیکی 60% بۆ 70%ێ مووچەیێ فەرمانبەرێن هەرێمێ، بەغدا بتنێ 200 ملیار دیناران دئێخیتە سەر وی پارەیی بۆ تەمامکرنا مووچەیی، لەوما ئەم هیڤیدارین ب زویترین دەم شایستەیێن دارایی بهنێرن."