گاڤ

مالیکۆڤ، سەرۆکێ جڤاتا هناردنکاران و پیشەسازییا پەترۆلا گران ل ئۆزباکستانێ راگەهاند، قەبارەیێ بازرگانییا وان ل گەل ئیراقێ ب گشتی 80 ملیۆن دۆلارن و دڤێت ڤێ یەکێ زێدەتر بکەن، هەروەسان دڤێت پەیوەندییێن دناڤبەرا بازرگانێن ئۆزباکستانێ دا ل گەل هەرێما کوردستانێ زێدەتر پێشڤەببەن.

چارشەمبییێ 4ێ شوباتێ 2026ێ، یارکین مالیکۆڤ، سەرۆکێ جڤاتا هناردنکاران و پیشەسازییا پەترۆلا گران ل ئۆزباکستانێ پشتی کۆمبوونا خۆ ل گەل ژوورا بازرگانی و پیشەسازییا هەولێرێ راگەهاند، ب شاندەکێ بەرفرەهـ کو ژ 50 بازرگانان ژ هەشت بیاڤێن جودا-جودا پێکدهات، هاتینە هەرێما کوردستانێ و گۆت: "ئەم بزاڤان دکەین پەیوەندییەکا باشتر ل گەل هەرێما کوردستانێ دروست بکەین".

یارکین گۆت ژی: "قەبارەیێ بازرگانییا مە ل گەل ئیراقێ ب گشتی 80 ملیۆن دۆلارن، مە دڤێت ڤێ یەکێ زێدەتر بکەین، هەروەسان مە دڤێت پەیوەندییێن دناڤبەرا بازرگانێن ئۆزباکستانێ دا ل گەل هەرێما کوردستانێ زێدەتر پێشڤەببەین و مە دڤێت کەلوپەلێن زێدەتر یێن وەلاتێ خۆ بهنێرینە کوردستانێ".

هەروەسان ئاماژە ب وێ یەکێ ژی دا، "مە دڤێت خودانکار و بازرگان ژی ب هەمان شێوە سەرەدانا مە بکەن و ئەم پێشوازییێ ل وان بکەین، د وی چارچۆڤەیی دا ژی مە بانگهێشتناما فەرمی ئاراستەیی ژوورا بازرگانی یا هەولێرێ کر".

یارکین مالیکۆڤ بەحس ل وێ یەکێ کر، "مە دڤێت بەرهەمێن کوردستانێ ژی بنهێرینە ئۆزباکستانێ، حکومەتا مە پشتەڤانییێ ل وەبەرهێنانا بیانی دکەت، هیڤیدارین پەیوەندیێن مە ل گەل ئیراق و کوردستانێ ب رێیا بازرگان و خودانکارێن مە زێدەتر بەرەڤ پێش بچن."