گاڤ

فەرماندەیا ناڤەندی یا هێزێن ئەمریکا راگەهاند، د هەیاما حەفتیسا بۆری دا ب رێسا ئۆپەراسیۆنەکا ئەسمانی یا بەرفرەهـ، دربێن کوژەک ل ژێرخانەیا سەربازی و لۆجیستیکی یا داعشێ ل سووریێ داینە. ئەڤ هێرشێن کو ب بکارئینانا ب دەهان مۆشەکێن هویربین هاتینە کرن، وەک پشکەک ژ ئۆپەراسیۆنا "هۆک ئای سترایک" دهێن، کو ئارمانج ژێ بەرسڤدانا کوشتنا سەربازێن ئەمریکی یە و رێگریکرنە ل خۆرێکخستنا رێکخراوێن تیرۆرستی.

چارشەمبییێ 4ێ شوباتێ 2026ێ، فەرماندەیا ناڤەندی یا هێزێن ئەمریکا (سێنتکۆم) د بەیانەکێ دا ئاشکرا کر، دناڤبەرا 27ێ کانوونا دویێ بۆ 2ێ شوباتێ، هێزێن وان پێنج هێرشێن ئەسمانی کرینە سەر چەندین ئارمانجێن دیارکری یێن داعشێ ل دەڤەرێن جودا-جودا یێن سووریێ.

ل گۆرەیی بەیانێ، هێزێن ئەمریکا ب ئاراستەکرنا 50 مۆشەکان کو ب رێیا فرۆکەیێن جەنگی، هەلیکۆپتەر و فرۆکەیێن بێفرۆکەڤان، شیاینە پێگەهێن هەستیار یێن داعشێ وێران بکەن. ئارمانجێن هاتینە کرن پێکدهاتن ژ؛ بنکەیەکێ پەیوەندییان، ناڤەندەکا گرنگ یا لۆجیستیکی، چەندین کۆگەهێن هەلگرتنا چەک و تەقەمەنییان.

ژ ئالییێ خۆ ڤە براد کوپەر، فەرماندەیێ سێنتکۆمێ، ل دۆر ڤان ئۆپەراسیۆنان راگەهاند: "لێدانا ڤان ئارمانجان بەلگەیە ل سەر بەردەوامییا تەرکیز و رژدبوونا مە بۆ رێگریکرن ل سەرهەلدانا داعشێ ل سووریێ".

ناڤبری ئاماژە ب رۆلێ هەڤپشکان کر و گۆت: "کارکرن ب هەماهەنگی ل گەل هێزێن هەڤپەیمان و هەڤپشکێن مە بۆ پشتراستبوون ژ شکاندنا ئێکجاری یا داعشێ، دێ بیتە ئەگەر کو ئەمریکا، دەڤەر و جیهان پاراستیتر بن".

ئەڤ زنجیرا هێرشان د چارچۆڤەیێ ئۆپەراسیۆنا ب ناڤێ "هۆک ئای سترایک" (Operation Hawk eye Strike) دهێنە کرن، کو هێزێن ئەمریکا و هەڤپشکێن وان وەک بەرسڤەک بۆ هێرشا 13ێ کانوونا ئێکێ یا بۆری دەستپێکرینە.

د وێ رێککەفتێ دا، چەکدارێن داعشێ د بویسەیەکێ دا ل دەڤەرا تەدمورێ هێرشی هێزێن ئەمریکا و سووریێ دا، کو ژ بەر وێ یەکێ دو سەربازێن ئەمریکی و وەرگێرەک هاتنە کوشتن.

سێنتکۆمێ ئامارا دو هەیڤێن بۆری یا ئۆپەراسیۆنان ئاشکرا کریە، کو تێدا پتر ژ 50 چەکدارێن داعشێ هاتینە کوشتن و گرتن.

د دەستکەفتەکێ هەوالگیری یێ گرنگ دا، هێزێن سێنتکۆمێ ل 16ێ کانوونا دویێ یا 2026ێ، ل باکورێ رۆژئاڤایێ سووریێ، "بیلال حەسەن جاسم" د هێرشەکا هویر دا کوشت. ل گۆرەیی زانیارییان ڤی سەرکردەیێ داعشێ پەیوەندییا ئێکسەر ب وێ گرۆپێ چەکدار ڤە هەبوویە کو بەرپرس بوو ژ هێرشا خویناوی یا 13ێ کانوونا ئێکێ یا سالا بۆری.