گاڤ

مالپەرێ نووچەیان یێ "ئەکسیۆس" یێ ئەمریکی ژ زارێ بەرپرسێن بلند یێن واشنتنێ بەلاڤکر، دانوستاندنێن چاڤەرێکری یێن دناڤبەرا ئەمەریکا و ئیرانێ دا هاتنە هەلوەشاندن، کو بریار بوو رۆژا ئەینییێ بهێنەکرن.

چارشەمبییێ 4ێ شوباتێ 2026ێ، مالپەرێ نووچەیان ئەکسیۆس یێ ئەمریکی، ژ زارێ بەرپرسێن بلند یێن واشنتنێ بەلاڤکر، بەرپرسێن ئەمریکا پەیامەکا ئێکلاکەر ئاراستەیب تەهرانێ کریە و گۆتییە: "واشنتن سازشێ ل سەر جهـ و شێوازێ دیارکری یێ دانوستاندنان ناکەت".

وان بەرپرسان ئاماژە ب وێ چەندێ کر، دانوستاندنێن چاڤەرێکری یێن دناڤبەرا واشنتن و تەهرانێ دا، کو بریار بوو رۆژا ئەینییێ بهێنەکرن، هاتنەهەلوەشاندن.

ئەڤ بڕریارە پشتی وێ چەندێ هات کو ئیرانێ ڕەتکر بچیتە د ناڤ گفتوگۆیەکێ دا کو بابەتێن "نە ئەتۆمی" (وەکی مۆشەکێن بالستی و رۆلێ هەرێمی) بخۆڤەبگریت، هەروەسان داخوازا گوهۆرینا جهێ دانوستاندنان کربوو.

بەری بەلاڤبوونا نووچەیێ هەلوەشاندنێ، مارکۆ روبیۆ، وەزیرێ دەرڤەیێ ئەمریکا راگەهاندبوو: کو وەلاتێ وی یێ بەرهەڤە رۆژا ئەینیبێ ل گەل ئیرانبیان کۆم ببیت.

روبیۆیی ئاماژە ب وێ چەندێ دابوو: "ئیرانی ل دەستپێکێ ل سەر شێوازەکێ دیارکری بۆ گفتوگۆیان رازی ببوون، بەلێ پاشی بۆچوونا خۆ گوهۆۆی." هەروەسان هشیاری دا بوو کو دۆنالد ترەمپ سەرۆکێ ئەمەریکا، "کۆمەکا بژاردەیان بۆ بەرسڤدانێ ل بەر دەست هەنە".

وەزیرێ دەرڤەیێ ئەمەریکا ئەو چەندە ژی دیار کربوو کو هەتا وی دەمی جهێ کۆمبوونێ ل ژێر گۆتوبێژکرنێ دا بوو.

ژ ئالییەکێ دی ڤە و بەروڤاژی لێدوانێن ئەمریکی، میدیایێن فەرمی یێن ئیرانێ بانگەشەیا وێ چەندێ دکر کو دانوستاندن رۆژا ئەینییێ ل "مەسقەت"ـا پایتەختێ عومانێ دێ هێنەکرن.

ل دویڤ ڤەگوهاستنا میدیایا ئیرانێ، بڕیار بوو گفتوگۆ "نەئێکسەر" بن و بتنێ گرنگییێ ب "دۆسیەیا ئەتۆمی و راکرنا سزایان" بدەن، بێی بەحسکرنا چو مەرجێن دی یێن ئەمەریکا.

ئەڤ دژبەریبە د لێدوانان و رەتکرنا مەرجێن ئێکدو دا، ئاماژەنە بۆ کویراتییا باوەرپێنەبوونێ و جوداهییا ستراتیژی دناڤبەرا هەردو وەلاتان دا، کو ل دویماهییێ بوو ئەگەرێ هەلوەشاندنا دانوستاندنان بەری دەستپێبکەن.