گاڤ

ژێدەرەکی ژ وەزارەتا دارایی یا حکومەتا هەرێما کوردستانێ بۆ گاڤ راگەهاند، سوبەهی دێ دەست ب رێکارێن هنارتنا داهاتێ نەپەترۆلی بۆ سەر هژمارا وەزارەتا دارای یا ئیراقێ هێتەکرن و هەفتییا بهێت ژی بەغدا دێ مووچەیێ مەها کانوونا دوویێ 2026ێ یێ فەرمانبەرێن هەرێما کوردستانێ هنێریت.

چارشەمبییێ 4ێ شوباتێ 2026ێ، ژێدەرەکی ژ وەزارەتا دارایی یا حکومەتا هەرێما کوردستانێ کو نەخواست ناڤێ وی بهێتە گۆتن بۆ گاڤ راگەهاند، سوبەهی پێنجشەمبییێ دێ دەست ب رێکارێن هنارتنا 120 ملیار دینارێن داهاتێ نەپەترۆلی یێ هەرێما کوردستانێ بۆ سەر هژمارا وەزارەتا دارای یا ئیراقێ هێتەکرن، ئەگەر گەهشتن دێ وی پارەیی هنێرن، ئەگەر نە، هنارتنا وێ پارەیی دێ کەڤیتە ئێکشەمبییا بهێت.

ل دویڤ گۆتنا وی ژێدەری، پشتی هنارتنا وان 120 ملیار دیناران، بەغدا دێ دەست ب رێکارێن خەرجکرنا مووچەیێ مەها ئێک کەت و حەفتییا بهێت دێ وێ پارەیی هنێریت.

ئەڤە د دەمەکی دا یە، 35 رۆژ ژ سالا نوی دەربازبووینە و هەتا نوکە فەرمانبەرێن هەرێما کوردستانێ مووچەیێ مەها کانوونا دویێ وەرنەگرتییە، ئەڤە د دەمەکی دایە کو بەری نوکە حکومەتا ئیراقێ مووچەیێ مەها ئێک یێ هێزێن ئەمنی و سەربازی دایە و ژ پێنجشەمبییا بۆری وەرە ژی دەست ب خەرجکرنا مووچەیێ فەرمانبەرێن شارستانی بۆ مەها ئێک کریە.

دوهی سێشەمبییێ جڤاتا وەزیرێن حکومەتا فیدرال کۆمبوو و بناس دۆسکی پەرلەمانتارێ پارتی دیموکراتی کوردستان بۆ خۆلا شەشێ تایبەت بۆ گاڤ گۆت: "رازەمەندی ل دۆر خەرجکرنا مووچەیێ مەها کانوونا دویێ یێ مووچەخۆرێن هەرێما کوردستانێ هاتە دان.'

رۆژا سێشەمبییێ 27ێ کانوونا دوویێ 2026، لیستا مووچەیێ مەها کانوونا دویێ یا فەرمانبەر و مووچەخۆرێن هەرێما کوردستانێ ژ ئالییێ تیمێ تەکنیکی یێ وەزارەتا دارایی و ئابۆری یا هەرێما کوردستانێ ڤە بۆ بەغدا هاتە هنارتن و رۆژا پاشتر رادەستی فەرمانگەها ژمێریاری یا وەزارەتا دارای یا حکومەتا فیدرال هاتە کرن.

دویماهی مووچەیێ فەرمانبەرێن هەرێما کوردستانێ ل 29ێ کانوونا ئێکی 2025 هاتەبەلاڤکرن، کو مووچەیێ مەها چریا ئێکی یا 2025ێ بوو.