تۆم باراک: سووریێ، ئەمریکا و قەتەر بەرەڤ پاشەرۆژەکا نوی گاڤان دهاڤێژن
بەلاڤ بکە
گاڤ
هنارتییێ تایبەت یێ ئەمریکا ل سووریێ راگەهاند، ئیمزاکرنا یاداشتنامەیا لێکتێگەهشتنێ دناڤبەرا سووریێ و کۆمپانییێن شێڤرۆن و پاوەر ئینتەرناشنال دا، وێستگەهەکا دیرۆکی یە بۆ ڤەگەریانا ئۆمێدێ و ڤەژاندنا ئابۆری بۆ گەلێ سووریێ ب رێیا سامانێن وێ یێن سروشتی.
چارشەمبییێ 4ێ شوباتێ 2026ێ، تۆم باراک، هنارتییێ تایبەت یێ ئەمریکا ل سووریێ د تۆرا جڤاکی یا (ئێکس) دا نڤیسییە، کۆمپانییا نەفتا سووریێ ئێکەمین یاداشینامەیا لێکتێگەهشتنێ بۆ لێگەریانێ ل دویڤ گازێ د دەریایی دا ل گەل هەر ئێک ژ کۆمپانییا شێڤرۆن یا ئەمریکی و پاوەر ئینتەرناشنال هۆلدینگ یا قەتەری ئیمزا کر.
تۆم باراک، ئاماژە ب وێ چەندێ دایە کو بەرهەڤبوونا وی د ڤێ رویدانێ دا جهێ شانازیێیە و ب وێستگەهەکا دیرۆکی بۆ دیتن و لێگەریانا ل دویڤ گازا سروشتی ل سووریێ وەسفکر.
باراک د پەیاما خۆ دا تەکەز ل وێ چەندێ کر کو ئەڤ گاڤە نیشاندەرا ئیرادەیا بهێز یا گەلێ سووریێ یە و نڤیسییە: "رحا پۆلاین و نەشکەستی یا گەلێ سووریێ ل گەل ژێدەرێن مەزن یێن وی وەلاتی، پێکڤە دێ پاشەرۆژەکێ ئاڤاکەن کو دێ یا تژی بیت ژ ڤەژاندنێ، گشتگیری و نویبوونێ".
ئیمزاکرنا ڤێ یاداشتنامەیێ د ناڤبەرا سووریێ و دو کۆمپانیێن مەزن یێن ئەمریکی و قەتەری دا، وەکی گوهۆرینەکا مەزن یا ئابۆری و سیاسی ل دەڤەرێ تەماشە دهێتەکرن، ب تایبەتی د کەرتێ وزەیێ دا.
