گاڤ

چارچۆڤەیێ هەماهەنگییێ د دویماهی کۆمبوونا خۆ دا کۆمەکا پرس و دۆسیەیێن هەستیار یێن ئەمنی و سیاسی گۆتوبێژکرن و تەکەز ل سەر پێدڤییا پاراستنا سەروەرییا ئیراقێ و رێگریکرن ل بکارئینانا ئاخا وێ بۆ لێدانا وەلاتان کر.

چارشەمبییێ 4ێ شوباتێ 2026ێ، چارچۆڤەیێ هەماهەنگییێ د بەیانەکێ دا ئەنجامێ کۆمبوونا ئاسایی یا خۆ بەلاڤکر و تێدا تەکەز ل سەر گرنگییا پێگیریکرن ب ژڤانێن دەستووری، ب وی رەنگی کو د دەستوورێ ئیراقێ دا هاتی کر.

د تەوەرەکێ ئەمنی و هەستیار دا، چارچۆڤەیێ هەماهەنگییێ داخواز ژ هێزێن ئەمنی کر کو رێکارێن پێدڤی و خۆپارێزییا زێدەتر وەربگرن و د هەمان دەم دال سەر خۆ بن بەرانبەری هەر جۆرە پالدانەکێ (ئیستیفزازەکێ)؛ ئەڤە ژی ب ئارمانجا بڕینا ڕێکێ ل هەر بزاڤەکێ کو وەکی بەهانە بۆ ب ئارمانجگرتنا ئیراقێ یان تێکدانا سەقامگیرییا وەلاتی بهێتە بکارئینان.

هەروەسان تەکەز ژی ل سەر رەتکرنا رەها یا بکارئینانا ئاخا ئیراقێ بۆ دەستدرێژیکرن ل سەر هەر دەولەتەکا دی کر.

ل دۆر رەوشا سیاسی و پەککەفتنا سازییان، د بەیانێ دا ئاماژە ب وێ چەندێ هاتییە کرن، بەردەوامییا ڤێ رەوشێ و ژکارئێخستنا سازییێن دەولەتێ، ل گەل قەبارەیێ وان ئالنگارییێن سیاسی، ئابۆری و ئەمنی ناگونجیت یێن کو دەووروبەرێن وەلاتی گرتین.

د پشکەکا دی یا بەیانێ دا و سەبارەت پۆستێ سەرۆککۆماری، چارچۆڤەیێ هەماهەنگیییێ گۆت: پێدڤییە ئەڤ دۆسیەیە د دەمەکێ کێم دا بهێتە ئێکلاکرن. د وی چارچۆڤەیی دا ژی بڕیار دایە کو ل ئەگەرێ نەگەهشتن ب رێککەفتنێ ل سەر بەربژارەکێ هەڤپشک بۆ پۆستێ سەرۆککۆماری، پەرلەمانتارێن چارچۆڤەیی د هەلبژارتنا خۆ دا د ئازاد و سەرپشک بن.