گاڤ

دۆنالد ترەمپ هوشدارییێ ددەتە ئیرانێ کو ئەگەر بزاڤا ئاڤاکرنا بنگەهێن سەربازی یێن خۆ بدەن، ئەمریکا دێ وان زڤرینیتەڤە خالا دەستپێکێ و ب ئاشکرایی رادگەهینیت کو رێبەرێ بلند یێ ئیرانێ دڤێت ترس و دلگرانییەکا مەزن هەبیت.

چارشەمبییێ 4ێ شوباتێ 2026ێ، دۆنالد ترەمپ، سەرۆکێ ویلایەتێن ئێگرتی یێن ئەمریکا، د لێدوانەکا نوی دا بۆ کەنالێ (NBC News) هوشدارییەکا توند ددەتە تەهرانێ و رادگەهینیت، هەر بزاڤەک بۆ ئاڤاکرنا بنگەهان، بەرسڤا توند یا ئەمەریکا دێ ل دویڤ هێت و دبێژیت ژی: "دڤێت خامنەیی گەلەک یێ دلگران بیت".

دۆنالد ترەمپ، ل دۆر بزاڤێن ئیرانێ بۆ چالاککرنا بەرنامەیێن خۆ، پەیامەکا رۆهن ئاراستەیی وی وەلاتی کر و گۆت: "بابەت ب ڤی رەنگی یە، ئەگەر جارەکا دی بزاڤێ بکەنەڤە، دبێژمە وان ئەم دێ وان زڤرینینەڤە بۆ خالا دەستپێکێ و هەمان کاری کەینەڤە".

ترەمپ ئاماژە ب وێرانکارییا بنگەهێن بەرێ یێن ئیرانێ کر و گۆت: "وان بزاڤ کر ڤەگەرنە جهێ بنگەهی، بەلێ نەشیان خۆ نێزیک بکەن، چونکی ب تەمامی وێران ببوو".

د پشکەکا دی یا ئاخڤتنێن خۆ دا، ترەمپی ئاشکرا کر، ئاگەهدارێ لڤینێن ئیرانێ بوویە بۆ ڤەگوهاستنا چالاکییێن خۆ و گۆت: "وان هزر دکر ل جهەکێ دی یێ وەلاتی بنگەهەکێ نوی دروست بکەن، بەلێ ئەم پێ حەسیاین. من ژی گۆتە وان: ئەگەر وێ چەندێ بکەن، دێ کارەکێ گەلەک خراب بەرانبەر هەوە کەین".

د بەرسڤا پرسیارا پەیامنێرێ ئێن بی سی دا کو "ئەرێ دڤێت رێبەرێ بلند یێ ئیرانێ ل نوکە دلگران بیت؟" دۆنالد ترەمپ ب کورتی و رۆهنی بەرسڤ دا: "دڤێت گەلەک یێ دلگران بیت".

هەر ئەڤرۆ چارشەمبییێ، عەباس عێراقچی، وەزیرێ دەرڤەیێ ئیرانێ، د تۆرا جڤاکی یا (ئێکس) دا نڤیسییە: گفتوگۆیێن ل دۆر بەرنامەیێ ئەتۆمی یێ تەهرانێ ل گەل ئەمریکا دێ ل رۆژا ئەینییێ دەمژمێر 10:00ی سپێدێ ل مەسقەت هێنەبرێڤەبرن.

هەروەسا وەزیرێ دەرڤەیێ ئیرانێ سوپاسییا سەرکردەیێن عومانێ، بۆ رێکخستنا وان دانوستاندنان کر.