گاڤ

سه‌قاناسییا هه‌رێمێ راگه‌هاند كو ژ سوبه‌هى‌ شه‌ڤ پێڤه‌، پێله‌كا به‌فر و بارانێ دێ بسه‌ر هه‌رێمێ دا هێت. سه‌قاناسییا ئیراقێ ژى دبێژیت، بارانبارین ب درێژاهیا هه‌فتییا بهێت دێ به‌رده‌وام بیت.

ئه‌ڤرۆ، رێڤه‌به‌رییا سه‌قاناسییا هه‌رێما كوردستانێ به‌لاڤكر، سوبه‌هى ئا‌سمان دێ نیڤ ئه‌ور بیت و ل ده‌مێن ئێڤارێ دێ هێدی هێدی هێته‌ گهۆڕین بۆ ئه‌ورێ تمام و دیاركر ژى، ژبه‌ر كاریگه‌رییا نزمەپه‌ستانه‌كا باكۆرێ ده‌ریا ناڤه‌ڕاست،پێله‌كا نه‌رمه‌ باران و  به‌فرێ ل ده‌سپێكا حه‌فتیا بهێت دێ ده‌ڤه‌رێن هه‌رێمێ ڤه‌گریت.

سه‌قاناسى د ده‌ته‌ زانین، سوبه‌هى ب شه‌ڤ پێلا بارانبارینێ دێ ده‌ستپێكه‌ت و به‌فره‌كا كێم ل ده‌ڤه‌رێن چیایی یێن سنووری ل رۆژهه‌لات و پارێزگه‌ها سلێمانییێ ژى دێ باریت. و رۆژا شه‌مبییێ دێ ئه‌ڤ پێله‌ پترییا ده‌ڤه‌رێن هه‌رێما كوردستانێ ڤه‌گریت.

سه‌قاناسییا ئیراقێ ژى دیار كر، ب درێژاهیا هه‌فتیێ دێ ئا‌سمان ئه‌ور بیت دگه‌ل بارینا باران و هه‌بوونا بریسییان، ل ده‌ڤه‌رێن چیایی ژی دێ به‌فر باریت.