ره‌مه‌زان زه‌كه‌ریا

ده‌زگه‌هێ رووانگه‌ ل ده‌مێ بوری شیایه‌ ل كوردستانێ و ده‌ڤه‌رێ كارێن باش ئه‌نجامبده‌ت د وارێن مرۆڤی و خێرخوازی و ده‌هان گه‌نجان ژ بێ هیڤی بوونێ ڕزگار بكه‌ت و بكه‌ته‌ خودان پرۆژه‌ د جیهانا ئەڤرۆ دا، کو گوهۆڕینێن تەکنەلۆژی و زانستی ب لەزاتیەکا مەزن دهێنە پێش، گەنج پێدڤی ب پشته‌ڤانی و ژینگەهه‌کا گونجایی نە کو بشێن داهێنانێ بکەن، دەزگەهێ رووانگە وەک رێکخراوەکا نەحکومی و پێشەنگ شیایە ببیتە ئەو گۆپیتكا کو گەنجێن کوردستانێ تێدا خەونێن خۆ بکەنە راستی و شیانێن خۆ یێن ڤەشارتی بكه‌نه‌ به‌رهه‌م.

رووانگە هه‌ر رێکخراوەك نینە، هێزا کارکرنێ یە کو باوەری ب وێ چه‌ندێ هەیە مرۆڤ مەزنترین سامانه‌ و ئارمانجا سەرەکی یا دەزگەهی ئەوە کو دەلیڤێن وەکهەڤ بۆ هەموو گەنجان پەیدا بکەت بێی جوداهی د وارێن پەروەردە و داهێنان و کارێن مرۆڤی دا پێش بکەڤن و ببن خودان داهات و ئابۆره‌كێ سه‌ربه‌خۆ رێكێن كاری و گه‌هشتن ب بازارێن جیهانی بزانن.

ده‌زگه‌هێ رووانگە باوەریەکا موكم ب هێزا زانستی و مرۆڤایه‌تییێ هەیە ب رێکا دابینکرنا ده‌لیڤێن خواندنێ و نووژەنکرنا قوتابخانەیان رێخۆشکەر بوویە بۆ سەدان قوتابیان کو بەردەوامییێ بدەنە خواندنا خۆ، هه‌روه‌سا ئێک ژ سەرکەفتیترین پڕۆژێن دەزگەهی کو سالانە دهێتە ئەنجامدان خه‌لاتێ رووانگه‌یه‌ كو دەلیڤەیێ ددەتە گەنجان د بوارێن: وێنەکێشان، نڤیسین، مۆزیک، داهێنانا زانستی، و چەندین وارێن دی دا هەڤرکیێ بکەن و بهێنە خەلاتکرن.

ب رێکا خۆلێن مەشق و راهێنانێ گەنجان فێری کارامەییێن سەردەم دکەت وەک: زمان، کۆمپیوتەر، سەرکردایەتی و بڕێڤەبرنا کاران، کو ب ساناهیتر بچنە د بازارێ کاری دا، ئەو به‌رفره‌هیا رووانگە بۆ گەنجان دابین کری، هیڤی و باوەری بخۆبوونە دەمێ گەنجەک دبینیت کو لایەنەک هەیە گرنگییێ ب هزرێن وی ددەت و پشتەڤانییێ ل پڕۆژەیێ وی یێن بچوویک دکەت ئەڤە دبیتە پالدەرەک کو یێ بەرهەمهێن بیت د جڤاکیدا و ده‌هان گه‌نجێن دی پۆۆژه‌یێن خۆ بكه‌نه‌ به‌رهه‌م ژبه‌ر وێ هاندانا مرۆڤی و زانستی.

رووانگە شیایە كه‌ڤاله‌كێ جوان یێ کارێ مەدەنی نیشان بدەت کو تێدا گەنج خودان بڕیار و داهێنەرن ئەڤ دەزگەهە بوویە ده‌رگه‌هه‌ك کو تێدا گەنجان فێری چەوانیا مەلەڤانیكرنێ د دەریا یا پێشكه‌فتنێ دا بكه‌ت، نەك چه‌وانیا گەهشتن ب لێڤا ده‌ریایێ.

دەزگەهێ رووانگە کلیلا گۆهرینێ یە د دەستێ نفشێ نووی دا، مانەڤە و بەردەوامیا پڕۆژێن دەزگەهی رامانا بەردەوامیا گەشەپێدانا مرۆڤی ل کوردستانێ دده‌ت، ئەڤرۆ ئەرکێ مە هەمووانە کو پشتەڤانییێ ل دەستپێشخەریێن ده‌زگه‌هی بکەین کو گەنجێ مە د ئاستێ هه‌ڤڕكیێن جیهانی دا بهێته‌ دیتن و ببیته‌ پێشه‌نگ.