گاڤ

 ئیندریک، ستێرێ لاو یێ بەرازیلی دویماهی ب دەنگۆیان ئینا و راگەهاند کو ئەو دێ ب ئێکجاری ل یانەیا ئۆلۆمپیک لیۆن یا فرەنسی مینیت و ڤەناگەریتە ریال مەدرید.

ئێندریک، یاریزانێ تەمەن 19 سال کو د مێرکاتۆیا زڤستانێ دا ب شێوەیێ خواستن چووبوو لیۆن، د هەڤپەیڤینەکێ دا ل گەل رۆژنامەیا "مارکا" یا ئیسپانی راگەهاند؛ وی بریارا خۆ دایە کو ب ئێکجاری ل فرەنسا بمینیت. ئیندریک سوپاسییا فلۆرێنتینۆ پێرێز، سەرۆکێ ریال مەدرید کر و گۆت: "پێرێز د حەزا من تێگەهشت کو من دڤێت پتر یارییێ بکەم، ئەو مرۆڤەکێ دلۆڤان بوو."

ئیندریک ئاماژە ب هندێ ژی کر کو وی مفایەکێ زۆر ژ چابی ئەلۆنسۆ، راهێنەرێ دویرئێخستی یێ مێرێنگییێ دیتییە، لێ نوکە دەمێ هندێ یە ل بن دەستێ فۆنسیکا (راهێنەرێ لیۆن) فێری تشتێن نوی ببیت. دەربارەی هەلبژارتییێ بەرازیل ژی، ئیندریک دیار کر کو ئەو هەمی بزاڤان دکەت ل گەل کارلۆ ئەنچیلۆتی بگەهیتە ئاستەکێ باش دا کو ڤەگەریتە ناڤ رێزێن سیمباو.

ئیندریک ل هاڤینا 2024ێ ژ یانەیا پالمێراس بەرەڤ ریال مەدرید هاتبوو، لێ پشتی وەرز و نیڤەکی و نەبوونا دەلیڤەیا یاریکردنێ، د 3ێ کانوونا دویێ یا ئەڤسالە دا ب شێوەیێ خواستن چوو ئۆلۆمپیک لیۆن و ل وێرێ شیا د دەمەکێ کورت دا ئاستەکێ نایاب نیشان بدەت.